ФИФI ФЫМЫГЪЭПУД, ФИ IЕЙ ФЫМЫГЪЭПЩКIУ

АДЫГЭ ПСАЛЪЭ

Гъатхэмрэ хъыджэбзымрэ

2020-03-07

  • Жьыбгъэм уафэр
  • КIуэху еукъэбз…
  • Жьыуэ къэхъеяуэ,
  • Гъатхэ губгъуэм
  • Итщ хъыджэбз,
  • И ишэгъуэ хъуауэ.
  • Пщащэм и нэ,
  • И псэм хуехь
  • Гъатхэм и дахагъэр.
  • Гъатхэм и нэ,
  • И псэм хуехь
  • Пщащэм и дахагъэр.

  • Гъатхэ пасэ
  • КъэгуфIам
  • Пщащэр хуогуфIэжыр.
  • Жьыбгъэ щIасэ
  • Къеубзам
  • Бзэншэу йоубзэжыр.
  • Уафэ къащхъуэм
  • Пщащэр йоплъ:
  • «Абы и лъагагъыр!»
  • Хъыджэбз нащхъуэм
  • Уафэр къоплъ:
  • «Нэхэм я кууагъыр!»
  • Къурш щхьэ тхъуахэм
  • Пщащэр йоплъ:
  • «Ахэм я хужьагъыр!»
  • Хъыджэбз нэкIум
  • Бгыхэр къоплъ:
  • «Абы и къабзагъыр!»
  • Губгъуэм —
  • Бостей удзкIэ блам
  • Пщащэр йоплъыр:
  • «Дэгъуэщ!»
  • Хъыджэбз бостей
  • ХэдыкIам
  • Гъатхэр къоплъыр:
  • «Игъуэщ!»
  • Пщащэм жеIэ
  • «Нэкъуэлэн» —
  • Игу хыхьа уэрэдыр.
  • Бзум я макъкIэ
  • Къожьууж
  • Гъатхэр а уэрэдым.
  • А хъыджэбзым
  • И насыпщ
  • ЩIылъэм зэрытетыр,
  • Губгъуэ-анэм
  • И насыпщ
  • Пщащэр зэрытетыр.
  • ЗэхуогуфIэ,
  • Зэпапщыт
  • ТIуми яIэр фIыгъуэу.
  • Я дахагъэр
  • Зэралъыт,
  • Зыр зым емыфыгъуэу.
  • Сэри соплъ:
  • «Нэхъ дахэр хэт?» —
  • Си щхьэм соупщIыжыр.
  • «Дара гъатхэр,
  • Пщащэр хэт?» —
  • СфIызэхогъуэщэжыр…
  • Тхьэгъэзит  Зубер.
  • ***
  • Ди бзылъхугъэ IэфIхэ, дывохъуэхъур нобэ!
  • Фэ фи махуэ лъапIэр щIылъэм щыдоIэт.
  • Быну дунейм тетхэр фэращ зыгъэхуабэр,
  • Фэ фи махуэ лъапIэр псоми вдыдоIэт!
  • Сэ сохъуэхъур анэу дунейм тетхэм:
  • Фи бын я быныжхэм хъер ядэфлъагъун,
  • Фи дахагъэр ещхьу гъатхэм удз къэтIэпIхэм,
  • Узыншагъэ фиIэу куэдрэ фыпсэун!
  • Мы дунейри нэщIти, фэ фыдимыIамэ,
  • Дыгъэ-мазэр даури щIылъэм щыунэхунт?!
  • Ди анэфI-шыпхъуфIхэ, фэ фымыпсэуамэ,
  • Губгъуэм фэщхь удз дахэр даури къэтIэпIынт?!
  • Ди анэфI нэхъыжьхэ, Тхьэм фигъэщIэращIэ,
  • Унэгуащэ псори Тхьэм быныфIэ фищI!
  • Ди хъыджэбзхэр псори Тхьэм нысащIэ фищIхэ,
  • Фэ фи махуэ лъапIэр угъурлы Тхьэм тхуищI!
  • Тут Михаил.