ФИФI ФЫМЫГЪЭПУД, ФИ IЕЙ ФЫМЫГЪЭПЩКIУ

АДЫГЭ ПСАЛЪЭ

Лъэпкъым и напщIэ

2019-12-10

  • Зумакуловэ Танзиля и ныбжьыр илъэс бжыгъэ дахэ зэрырикъум теухуа зэхыхьэм щыпащащ усакIуэр къыщалъхуа Тырныауз къалэм.

  • Кулиев Къайсын и цIэр зезыхьэ Щэнхабзэ уардэунэм Зумакуловэм и пшыхь щекIуэкIам хэтащ щIыпIэ администрацэм и лIыкIуэхэр, IуэхущIапIэ зэмылIэужьыгъуэхэм, жылагъуэ зэгухьэныгъэхэм я унафэщIхэр, щэнхабзэм и лэжьакIуэу Кавказ Ищхъэрэм, хамэ щIыналъэхэм щыщу а Iуэхум хэтыну къахуеблэгъахэр.
  • А пшыхьым щыIуащ Зумакуловэм и Iэдакъэ къыщIэкIа усэхэм, абы и псалъэхэр зыщIэлъ уэрэдхэм щыщ, Танзиля и щIалэгъуэр зыхиубыда лъэхъэнэм, абы къыдэгъуэгурыкIуа усакIуэхэм я гугъу щащIащ.
  • — Ди щIыналъэр щэнхабзэ телъыджэм и гущапIэщ, дэ къытхэкIащ усакIуэ, сурэтыщI, макъамэтх цIэрыIуэ куэд. Гъуазджэм и цIыхухэр лъэпкъым и гъуджэу къэплъытэ хъунущ. Иджырей тхакIуэхэм ди псалъэр пасэ зэманым уэрэдыжьхэр зэхэзылъхьэу щыта ди нэхъыжьхэм я джэрпэджэжщ. Лъагъуныгъэрэ цIыхугъэ лъагэкIэ псыхьауэ бгырыс усакIуэхэм я Iэдакъэ къыщIэкIа уэрэдхэм я фэ ди щIыналъэм къраплъыну сыхуейт, — жиIащ Зумакуловэм къыщыпсалъэм.
  • Тырныауз щIыналъэм и гугъу щищIым, абы жиIащ мы щIыпIэм щыпсэу цIыхухэр, щIыуэпсыр, и мывэ, удз цIыкIу нэгъунэ, къызэрымыкIуэу фIыуэ зэрилъагъур.
  • Iуащхьэмахуэ щIыналъэм и администрацэм и унафэщI Залиханов Къанщо-бий Зумакуловэм щехъуэхъум, а бгырыс бзылъхугъэ нэсыр Къэбэрдей-Балъкъэрым и напщIэу къызэрилъытэр къыхигъэщащ.
  • — Зумакуловэм и зэфIэкI инхэм я фIыгъэкIэ балъкъэр усыгъэр дуней псом къыщацIыхуащ. Абы хуэфащэ дыдэу къратащ литературэ саугъэт куэд, бзэ куэдкIэ зэрадзэкIащ Танзиля и IэдакъэщIэкIхэр. А усэхэм псэр ягъэхуабэ къудейкъым, атIэ цIыхугум иралъхьэ цIыхугъэмрэ лъагъуныгъэмрэ. Ар гъэщIэгъуэнкъым, езым и псэ Iыхьэ тхыгъэ къэс зэрыхилъхьар къэплъытэмэ.
  • Зумакуловэ Танзиля теухуауэ псалъэ дахэ куэд пшыхьым щыжаIащ абы кърагъэблэгъа хьэщIэ лъапIэхэм. Лъэпкъым и цIэр жыжьэ зыгъэIуфа бзылъхугъэм а псалъэхэр хуэфащэ дыдэщ.
  • Тарим Алисэ.