ФИФI ФЫМЫГЪЭПУД, ФИ IЕЙ ФЫМЫГЪЭПЩКIУ

АДЫГЭ ПСАЛЪЭ

Бэлагъы Kъантемыр триха фильмыр «Оскар» тыгъэм папщIэ зэпеуэнухэм хагъэхьэ

2019-09-26

  • Налшык щыщ режиссёр щIалэ, «Сокуров Александр и кIыщ» зыфIаща, КъБКъУ-м епха еджапIэр къэзыуха Бэлагъы Къантемыр и «Дылда» фильмыр дуней псом нэхъ лъапIэ дыдэу къыщалъытэ «Оскар» саугъэтым папщIэ зэпеуэнухэм хагъэхьащ.

  • ТАСС IуэхущIапIэм къызэритамкIэ, хъыбарыр хэIущIыIу зыщIар Урысейм и «Оскар» комитетым и унафэщI Меньшов Владимирщ.
  • «Хамэ къэралыбзэкIэ траха фильм нэхъыфI дыдэ» — аращ Къантемыр и IэдакъэщIэкIыр зыхэтыну унэтIыныгъэр. Урысейм къыбгъэдэкIыу зэхьэзэхуэм къыщагъэлъэгъуэнухэм щахэдэм, къэпщытакIуэхэм зэпалъытар лэжьыгъитI къудейщ: Сидоров Алексей и «Т-34»-мрэ Бэлагъы Къантемыр и «Дылда» («КIыхьсолэ») фильмымрэ. Зэхьэзэхуэр IыхьитIу екIуэкI хабзэщ. Япэрейм блэкIыфыр фильм зытхухщ. Урысейм ирашауэ апхуэдэпщIэ къэзылэжьар закъуэтIакъуэххэщ. Псалъэм папщIэ, Михалков Никитэ и «Утомленные солнцем» фильмыр (2014).
  • Бэлагъым и лэжьыгъэм продюсер хуэхъуа Роднянский Александр зэрыжиIэмкIэ, дунейпсо саугъэт зыбжанэ къэзыхьа, кинокритикхэр зыщытхъуа Къантемыр и фильмыщIэм бгъэдэлъыпхъэ псори дыболъагъу, иджыблагъэ къыхахыну «лонг-лист» жыхуаIэ япэ Iыхьэм щIыблэмыкIыфын щхьэусыгъуэ щыIэкъым. Езы Роднянскэр 2016 гъэ лъандэрэ США-м и киноакадемием хэтщ, «Ос- кар» саугъэтыр зыхуэфащэр къэзыпщытэнухэм ящыщщ.
  • «Дылда»-р Хэку зауэшхуэм теухуащ. Абы лъабжьэ хуэхъуащ Нобель и саугъэтыр къэзыхьауэ щыта Алексиевич Светланэ «Зауэм цIыхубзыфэ теткъым» («У войны не женское лицо») зыфIища тхылъыр. Фильмым иужь ита интервьюхэм я зым Бэлагъым щызыпхигъэIукIащ къыкIэлъыкIуэу трихыну фильмыр Кавказ Ищхъэрэм теухуауэ зэрыщытынур.
  • Сокуров Александр и гъэсэнхэм яхуигъэувырт я фильмхэр езыхэм я анэдэлъхубзэмкIэ трахыну. Абы и фIыгъэкIэ и пэм щыщIэдзауэ и кIэм нэс адыгэбзэкIэ екIуэкI кинохэр дунейм къытехьауэ щытащ. Къантемыри иIэщ апхуэдэ теплъэгъуэ кIэщI, «Япэ итыр сэращ» фIищауэ. Абы уи нэгу щIегъэкI щIалэгъуалэмрэ нэхъыжьхэмрэ я зэхуаку къыдэхъуэ зэгурымыIуэныгъэр. И къуэм нэмэз ищIу япэу зылъэгъуа анэр къытехуэу сымаджэщым зэрашарат ар зытеухуар. Абы къыкIэлъыкIуа «Теснота»-м Бэлагъым, журт унагъуэм тепсэлъыхь хуэдэурэ, Урыс-Кавказ зауэм адыгэбзэкIэ щытепсэлъыхь пычыгъуэ хигъэхьэну и Iэзагъ хурикъуащ.
  • ЧЭРИМ Марианнэ.