ФИФI ФЫМЫГЪЭПУД, ФИ IЕЙ ФЫМЫГЪЭПЩКIУ

АДЫГЭ ПСАЛЪЭ

Апхуэдэт Тхьэзэплъыр

2019-01-12

  • Адыгэ усакIуэ цIэрыIуэ, «Литературная Кабардино-Балкария» журналым и редактор нэхъыщхьэ, ЩIэныгъэхэмкIэ Дунейпсо Адыгэ Академием и академик, ЩIДАА-м и щIэныгъэлI-секретарь, УФ-м и ТхакIуэхэми Журналистхэми я союзхэм хэт, Урысей Федерацэм щэнхабзэмкIэ щIыхь зиIэ и лэжьакIуэ, Лермонтов Михаил и цIэр зезыхьэ дыщэ медалыр, Урысейм и литературэ саугъэт иныр, щытхъу, щIыхь тхылъхэр зыхуагъэфэща Тхьэзэплъ Хьэсэн гуапагъэ куэд мы щIылъэм щызыгуэшахэм ящыщщ. Къэсейхьэблэ (Бахъсэнёнкэ) къуажэмрэ абы дэсхэмрэ фIыуэ зылъагъуу щыта усакIуэр дунейм зэрехыжар щхьэжэ тщыхъуащ.

  • Хьэсэн си дыщымкIэ ди пхъурылъхут. ГъэщIэгъуэныракъэ, гу зэрылъыттэщи, ди зэманым апхуэдэ благъэхэр зэфIокIуэдыж е зэкIэлъыкIуэххэркъым, ауэ Тхьэзэплъыр абыхэм ящыщтэкъым, и адэ-анэ я лъэныкъуэкIэ и благъэ жыжьэхэри зэрызригъэцIыхуным, зэракIэлъыкIуэным и ужь итт. ДызэрыцIыхуа нэужь, Хьэсэн анэкъилъхум хуэдэу къысхуэгуапэу къызбгъэдэтащ.
  •   Ди къуажэм сыт хуэдэ Iуэху дахэ къыщетхьэжьэми, Хьэсэн фIэфIу къыд-диIыгът. Ар цIыху пэжт, зи IуэхущIафэмрэ псалъэмрэ зэтехуэт, зыхуэмыIэзэ Iуэхурэ зыхэмызагъэрэ къэгъуэтыгъуейт.
  • ГъащIэр щыдухынур зыми тщIэркъым, ауэ апхуэдэу гуащIафIэу, гумащIэу, псэ къабзэу дунейм тетауэ ахърэтым кIуэжым и насыпщ! Ахърэт нэху Алыхьым къуит, жэнэткIэ уигъэгуфIэ, си дэлъху цIыкIу! Ноби укъытхэтщ, удигъусэщ! Къэсейхьэблэ жылэм и щIэблэр, укъэзыцIыхуу щыта псори, щэнхабзэм и лэжьакIуэхэри, къуажэ егъэджакIуэхэри дыпхуощыгъуэ. Ноби дигу укъинэжащ нэфIэгуфIэу, угъурлыгъэр къызрих уи нэгур гуапагъэкIэ гъэнщIауэ. Мы усэри уи фэеплъщ, Хьэсэн!
  • ЩIэтщ си нэгум
  •  Тетащ дунейм и Iэгу и Iэнэу,
  • ХузэфIэкIыу зы къимыгъанэу.
  • ЕгуэпэкIт нэхъыжьи нэхъыщIи,
  • Хуэдэт пIащIэу игъакIуэ гъащIэр.
  • Къилъэтыхьт хьэндырабгъуэу
  • щIылъэр:
  • «Схунэмысым нэсхусыну си лъэр», —
  • ЖиIэ хуэдэу гуапагъэр игуэшт.
  • Iуэху ныкъуэщIэ къигъанэу, тезашэу
  • КъикIуэтыжхэм Хьэсэн ящымыщт.
  • И усэбзэр дахэу бзэрабзэт,
  • И къалэмыр и Iэщэ екIут.
  • Гузэвэгъуэм ар хуэгумахэт,
  • Зи гуфIэгъуэм и Iуэху диIэтт.
  • Iуэху къыкъуэкIым — и гуащIэ
  •  щымысхьт.
  • ФIым ныпэплъэу къигъэст и пщэдейр.
  • КъыздэткIуащ гъуэгуанэ мыкIыхьу,
  • Гуауи гуапи щыкуэд мы дунейм.
  • ЩIэтщ си нэгум Хьэсэн
  • къысхуэгуфIэу,
  • Къыслъигъэсу псэм щыщу гуапагъ…
  • Псалъэ Iущхэр мы си гум щызгъафIэу,
  • Ди Хьэсэн, сэ нобэ сыпхуогъ.
  • Зэгъэщтокъуэ Людэ.
  • КъБР-м щэнхабзэмкIэ щIыхь зиIэ и лэжьакIуэ, усакIуэ.