Къэбэрдей уэрамым щагъэлъагъуэ
2018-08-07
- КъБР-м и Жылагъуэ палатэм щыIэ ЩIалэгъуалэ советым илъэс етIуанэ хъуауэ къызэрегъэпэщ «Артмосфера» фIэщыгъэм щIэт псапащIэ фестивалыр. А Iуэху дахэмкIэ ди щIыналъэм щыпсэу творческэ щIалэгъуалэ нэхъыфI-хэр зэхуашэсри, я лэжьыгъэхэм я гъэлъэгъуэныгъэ, мастер-классхэр, нэгузыужь концертхэр, жармыкIэхэр ирагъэкIуэкI. Абы мылъкукIэ зыщIагъэкъуащ «Ростеле- ком»-м КъБР-м щиIэ къудамэмрэ рекламэмкIэ «Стрелец» IуэхущIапIэмрэ.
Иужьрей зэманым ди республикэм щызэхэта щIалэгъуалэ зэхыхьэхэм ящыщу «Артмосфера»-р нэхъ гукъинэж хъуахэм ящыщу къэплъытэ хъунущ. Бадзэуэгъуэм и 22-м Налшык и Къэбэрдей уэрамыр гуфIэгъуэмрэ дахагъэмрэ зэщIиубыдат. IэпщIэлъапщIэхэм я къалэ цIыкIу укъыдэхута къыпщагъэхъурт уи нэгу щIэкI псоми. Лъэпкъ фащэхэр, гуащэ цIыкIухэр, бзылъхугъэм зэрызигъэдахэ хьэпшып екIухэр, чысэ телъыджэхэр, цым къыхэщIыкIа щыгъынхэр, сэшхуэхэр, удз гъэгъахэр, нэгъуэщIхэри яIыгъыу уэрамым и бгъуитIым етIысэкIа щIалэгъуалэм уи псэр ягъэгуфIэрт. Декоративно-прикладной гъуазджэм и унэтIыныгъэ псори къызэщIаубыдэрт абы кърагъэблэгъа цIыху 40-м. ГуфIэгъуэ щытыкIэр нэхъри щIагъэхуабжьэрт артист ныбжьыщIэхэмрэ къэфакIуэ гупхэмрэ. Уэрэдри, къафэри, усыгъэри, IэрыкIхэри зэкIуу зэхаухуэнат къызэгъэпэщакIуэхэм.
Пхъэ лъакъуэ лъагэхэмкIэ къэзыкIухь иныжьхэр, гъуджэм къыхэщIыкIа фащэкIэ хуэпа цIыхухэр абдеж къыщызэрагъэпэща зэпеуэхэм щIалэгъуалэр хыхьэну трагъэгушхуэрт. А псом къыдэкIуэу, пхъащIэ IэщIагъэм, дыщэидэм, каратэм и щэхухэм хуей дэтхэнэми щадэгуашэ мастер-классхэри екIуэкIырт.- Фестивалым ипкъ иткIэ фэеплъ хьэпшып къэзыщэхуа дэтхэнэми ирата билет цIыкIухэр пщы-хьэщхьэхуэкIуэу ягъэджэгуати, цIыхуийм я насып къикIащ.
- — Си гуапэу къыхэзгъэщыну сыхуейт, кIуэ пэтми нэхъыбэ зэрыхъур зэфIэкI зыбгъэдэлъ щIалэгъуалэр. ЖармыкIэм щытлъагъу хьэпшып-хэм удамыхьэхынкIэ Iэмал иIэкъым. IэкIэ щIа хьэпшыпым абы елэжьам и хуабагъэр, гуапагъэр хелъхьэ, аращ ахэр уасэншэ зыщIыр, — жиIащ фестивалым и жэрдэмщIакIуэ, ЩIалэгъуалэ советым хэт Къардэн Линэ.
- — «Артмосфера»-р творческэ зэхыхьэ къудейкъым, ар псапэ щIэным, гуапагъэм хуэунэтIа Iуэхущ. Операцэ лъапIэ ирагъэщIын хуейуэ къызыпэщылъ зэанэзэкъуэм (Алийхэ Маринэрэ Залымрэ) зыщIагъэкъуэну абы кърихьэлIахэм Iэмал яIащ. КъищынэмыщIауэ, щIалэгъуалэ IэпщIэлъапщIэхэми я хьэпшыпхэм къыщIэкIам щыщ ахъшэ а унагъуэм хухахащ. Дыщогугъ ар сэбэп яхуэхъуну, — жиIащ ЩIалэгъуалэ советым и унафэщI Шэджэмокъуэ Оксанэ.
- Щомахуэ Залинэ.