Къэралым и цIыхухэр узыфэм щыхъума хъуным хуэунэтIа унафэ
2020-03-26
- Гъатхэпэм и 30-м къыщыщIэдзауэ мэлыжьыхьым и 5 пщIондэ къэралым мылэжьэгъуэу щыщытынущ. Апхуэдэ унафэ ищIащ Урысей Федерацэм и Президент Путин Владимир.
- ТелевиденэмкIэ цIыхубэм защыхуигъазэм ар хэIущIыIу ищIащ къэралым и Президентым. Зэрымылажьэм щхьэкIэ цIыхухэм я лэжьапщIэри яубыдынукъым.
- Апхуэдэ щIыкIэкIэ, гъатхэпэм и 28 зыгъэпсэхугъуэ махуэм щегъэжьауэ мэлыжьыхьым и 5 тхьэмахуэ махуэри къыхиубыдэу цIыхухэр дэсынущ. Апхуэдэ унафэм и лъабжьэр коронавирус узыфэ зэрыцIалэм зэрызиубгъурщ.
- «Дэ долъагъу коронавирусым дуней псор псынщIэ дыдэу зэрызэщIищтэр. Къэрал куэдым сымаджэ хъуауэ къыщахутэхэм я бжыгъэм махуэ къэс къыхохъуэ. Дунейпсо экономикэми шынагъуэншэу щхьэщыкIынукъым ар.
- Иджыпсту икъукIэ мыхьэнэшхуэ иIэщ узыфэм псынщIэу земыгъэубгъуным, ар къызэтегъэувыIэным. Абы къыхэкIыуи дызыхуэкIуэ тхьэмахуэр мылэжьэгъуэу согъэув. ЦIыхубэм солъэIу дохутырхэмрэ властым и органхэмрэ къыхуагъэув чэнджэщхэм тетыну. Иджыпсту абы куэд дыдэ елъытащ», — жиIащ къэралым и УнафэщIым.
- «Псом хуэмыдэу а мардэхэр ехьэлIащ ди цIыхухэм ящыщ гуп хэхахэм — ди нэхъыжьхэмрэ уз гъэтIылъа зиIэхэмрэ. Абыхэми цIыху псоми иджыпсту ди къалэнщ узыфэм къыпкърыкI шынагъуэр Iэмал зэриIэкIэ дгъэмэщIэну», — къыхигъэщащ къэралым и Президентым.