2019-01-31
- Бжьахъуэхэр зэгуохьэ
- Адыгей.Республикэм къыщызэрагъэпэщащ «Бжьахъуэхэм я урысей лъэпкъ зэгухьэныгъэ» жылагъуэ организацэм и щIыналъэ къудамэ. Адыгэ Республикэм Мэкъумэш IэнатIэмкIэ и министерствэм къызэритымкIэ, абы къызэщIеубыдэ бжьахъуэ 70.
- Зэгухьа гупым яхуэзащ республикэм мэкъумэш IэнатIэмкIэ и министр Свеженец Владимир. Ахэр тепсэлъыхьащ Iэмал имыIэу зыхуеину хущхъуэхэкIхэр зыIэрыгъэхьэным, гъатхэм губгъуэхэм зэрелэжьхэр бжьаIуэхэм зэран яхуэмыхъун папщIэ. Бжьахъуэхэм я лъэпкъ зэгухьэныгъэм хэтхэм Iэмал яIэщ кооперативу зэгухьэу къэралыр апхуэдэхэм зэрадэIэпыкъур зыIэрагъэхьэну.
- Адыгейм и щIыналъэм щыIэщ бжьаIуэ ин 300, бжьахъуэ унагъуэ мин 25-м нэблагъэ.
- Лъэпкъ парк хъунущ
- Къэрэшей-Шэрджэс.Республикэм и Тебэрды къэрал мэз гъэфIэныр (заповедникыр) лъэпкъ паркым хуагъэкIуэнущ. Апхуэдэ унафэ къыщащтащ щIышылэм и 27-м УФ-м и Президентым и полномочнэ лIыкIуэу КИФЩI-м щыIэ Матовников Александр «Домбай» зыгъэпсэхупIэм зегъэужьыным теухуауэ КъШР-м щригъэкIуэкIа зэIущIэм.
- Тебэрды къэрал мэз гъэфIэныр, блэкIа лIэщIыгъуэм и 30 гъэхэм къызэрагъэпэщащ. Абы къызэщIеубыдэ Къэрэшей-Шэрджэсым и Инжыдж, Карачаевск, Уарп районищым я щIыналъэхэр.
- Матовников Александр къыхигъэщащ «Домбай», «Архъыз» щIыпIэхэр зэрыцIэрыIуэр, зыгъэпсэхуакIуэрэ зыплъыхьакIуэу къакIуэм я бжыгъэм къызэрыхэхъуэр. Къыхуриджащ адэкIи зэрызаужьыным трагъэщIэну. «Iэмал имыIэу егъэфIэкIуэн хуейщ Iуэхутхьэбзэхэр къызэрызэрагъэпэщыр», — яхуигъэу-ващ абы унафэщIхэм. Апхуэдэуи Матовников Александр къалэн ящищIащ пIалъэ кIэщIым къриубыдэу «Домбай» зэрызиужьынум теухуа генплан зэхагъэувэну, зыгъэпсэхупIэхэр нэщIысауэ электрокъарукIэ къы-зэгъэпэщыным и Iэмалхэри ягъэбелджылыну.
- УЭРДОКЪУЭ Женя.