«Псыкуэдым» куэдыIуэ къыхудагъэкI
2019-07-16
- Къэбэрдей-Балъкъэрым футболымкIэ и гуп нэхъыщхьэм зэгуэрым лъэ быдэкIэ къыхыхьа Псыкуэд къуажэм и командэр иджы къыпхуэцIыхужынкъым.
- Мыгъэрей зэхьэзэхуэм и закъуэ «Псыкуэдыр» плIэнейрэ бжыгъэ зэгуэткIэ къыщыхагъэщIащ. Иужьу Прохладнэ щыIэу щIыпIэ «Энергетик»-р 12:0-у къызэрытекIуар 2019 гъэм екIуэкI зэпеуэм и рекордщ. Ику иту псыкуэддэсхэм зэIущIэ къэс топитхум щIигъу къыщыхудагъэкI. Апхуэдэурэ екIуэкIмэ, гуп нэхъыщхьэм щащIэн щыIэу къыщIэкIынукъым.
- Зэхьэзэхуэм бжьыпэр щызыIыгъхэм я гугъу пщIымэ, джэгугъуэ блэкIам текIуэныгъэр къэзыхьыфар «Автозапчасть»-мрэ «Энергетик»-мрэщ. Абы и фIыгъэкIэ ахэр адрейхэм мащIэу къащхьэщыкIащ.
- Япэ джэгугъуипщIым псори щыхэзыгъэщIа Къэхъун и «Керт»-м, тхьэмахуитI ипэкIэ Бахъсэн «зэрыщылъэпэрапэрэ», зыкъыхуэщIэжыркъым. Абы иужькIэ «Къудентейм» пэлъэщакъым, иджы «Ислъэмейр» и стадионым къыщытекIуащ. Арати, къэхъундэсхэр еплIанэ увыпIэм нэс къещэтэхащ.
- Пашэхэм якIэлъеIэ «Тэрчри» Нарткъалэ къыщызэтрагъэувыIащ. Ар щIы- пIэ «Нартым» ефIэкIыфакъым.
- Зэхьэзэхуэм иужь дыдэ увыпIэр зэрыщиIыгъщ «Нартаным». Тхьэмахуэ блэкIам ар тIэунейрэ (ягъэIэпхъуа зэIущIэри хэту) къыщыхагъэщIащ икIи и Iуэхухэр икъукIэ хэплъэгъуэ хъуащ. «Псыкуэдымрэ» Псынэдахэ и «Родник»-мри абы зэрыщхьэщыкIышхуа щыIэкъым.
- Гъуащхьауэхэм я зэпеуэм бжьыпэр гъуэрыгъуэурэ щаубыд «Малка»-м и пашэ ШащIэ Беслъэнрэ «Автозапчасть»-м щыджэгу Бэчбо Муратрэ. Иджы чэзур бахъсэндэсым къылъысащ. Ар мыгъэрей зэпеуэм 26-рэ къыхэжаныкIащ.
- Иджы фыщыдгъэгъуэзэнщ Къэбэрдей-Балъкъэрым футболымкIэ и чемпионатым и зи чэзу джэгугъуэм кърикIуа бжыгъэхэм. Мис ахэр: «Нарт» (Нарткъалэ) — «Тэрч» (Тэрч) — 0:0,«Родник» (Псынэдахэ) — «Автозапчасть» (Бахъсэн) — 1:9, «Спартак-Д» (Налшык) — «Малка» (Малкэ) — 3:1, «Энергетик» (Прохладнэ) — «Псыкуэд» (Псыкуэд) — 12:0, «Налшык» (Налшык) — «ЛогоВАЗ» (Бабугент) — 6:2,«ХьэтIохъущыкъуей» (ХьэтIохъущыкъуей) — «Акъбащ» (Акъбащ Ищхъэрэ) — 6:3, «Керт» (Къэхъун) — «Ислъэмей» (Ислъэмей) — 3:4, «Къундетей» (Шэджэм) — «Нартан» (Нартан) — 3:1.
- ЯгъэIэпхъуауэ щытауэ бэрэжьейм зэхэтыжа зэIущIэхэм «Налшыкыр» «Нартаным» 2:0-у щефIэкIащ, «Спартак-Д»-р и стадионым «Ислъэмейм» 2:3-уэ къыщыхигъэщIащ.
- Хьэтау Ислъам.