2018-09-29
- Адыгэ фащэм и махуэр ягъэлъапIэ
- Адыгей. ФокIадэм и 28-м АР-м щагъэлъэпIащ Лъэпкъ фащэм и махуэр. ГуфIэгъуэ Iуэхухэр щекIуэкIащ Мейкъуапэ дэт Къэрал филармонием.
- Художник-модельер цIэрыIуэ, Адыгейм щэнхабзэмкIэ щIыхь зиIэ и лэжьакIуэ Стащ Юрий, республикэм и модельер щIалэхэм ягъэхьэзыра лъэпкъ фащэхэр ягъэлъэгъуащ. Къызэхуэсахэм я нэгу зрагъэужьащ сабий творческэ гупхэм. Республикэм щыпсэухэмрэ хьэщIэхэмрэ папщIэ пщыхьэщхьэм адыгэ джэгу зэхаублащ.
- — Махуэшхуэм и мыхьэ-нэ нэхъыщхьэр лъэпкъ фащэхэр гъэлъэгъуэнырщ, ахэр хъумэнырщ, — жиIащ Адыгэ Республикэм Лъэпкъ IуэхухэмкIэ, хэхэсхэм запыщIэнымрэ хъыбарегъащIэ IэнатIэхэмкIэ и къэрал комитетым и унафэщI Щхьэлахъуэ Аскэр.
- Лъэпкъхэм я ЩIалэгъуалэ совет
- Къэрэшей-Шэрджэс.Республикэм и Iэтащхьэ Темрезов Рашид къыхилъхьащ КъШР-м Лъэпкъхэм я ЩIалэгъуалэ совет къыщызэрагъэпэщыну.
- Темрезов Рашид зэрыжиIамкIэ, щIалэгъуалэр дэIэпыкъуэгъушхуэ хъунущ лъэпкъхэм я зэгурыIуэныгъэр республикэм щыгъэбыдэнымкIэ. ЗэIущIэм щытепсэлъыхьащ щIэблэр лэжьыгъэкIэ къызэгъэпэщынымрэ абыхэм ябгъэдэлъ творческэ зэфIэкIыр пхыгъэкIыным-рэ.
- Мэзкуу щызэхашэ
- Абхъаз.ФокIадэм и 30-м Мэзкуу и «Красная Пресня» паркым щекIуэкIынущ Абхъазым и «Апсны» фестиваль.
- Мэзкуудэсхэр щыгъуазэ ящIынущ Абхъазыр дыгъэм, тенджызым я мызакъуэу, щэнхабзэм и къэралу зэрыщытым. ЦIыхухэм я нэгу зрагъэужьынущ «Амцабз», «Черкесия» къэфакIуэ гуп цIэрыIуэхэм, уэрэджыIакIуэхэу Викторие Лабиерэ Амрэ Барганджиерэ, Леонтьев Авангард къеджэнущ Искандер Фазиль и IэдакъэщIэкIхэм щыщ пычыгъуэхэм.
- Къызэхуэсхэм папщIэ абхъаз пщафIэхэм ирагъэкIуэкIынущ мастер-классхэр, гупыж зыщIхэр ирагъэсэнущ аиладж, хъынкIэл, хачапури гъэхьэзырыным.
- УЭРДОКЪУЭ Женя.