КIуэкIуэ Юрий: «Ар къызыхуигъэщIар сымаджэхэр гъэхъужынырт»
2015-12-08
- Дыгъуасэ цIыхуищэ бжыгъэхэр щызэблэкIащ щIэпхъаджащIэхэм яIэщIэукIа, КъБР-м и Парламентым и депутат, республикэ клиникэ сымаджэщым и дохутыр нэхъыщхьэ Боттаев Хьэдис Хьэсэней поселкэм дэт и унэм. Гузэвэгъуэ зэхыхьэм ирихьэлIащ республикэм и унафэщIхэр, Парламентым и депутатхэр, жылагъуэ зэгухьэныгъэхэм я лIыкIуэхэр, дунейм ехыжам и лэжьэгъухэмрэ ныбжьэгъухэмрэ.
- Щыгъуэ пэкIум къыщыщыпсалъэм Къэбэрдей-Балъкъэрым и Iэтащхьэ КIуэкIуэ Юрий жиIащ республикэм узыншагъэр хъумэнымкIэ и IэнатIэр егъэфIэкIуэным Боттаев Хьэдис къаруушхуэ зэрырихьэлIар. «Ар къызыхуигъэщIар сымаджэхэм еIэзэнырт. ИкIи абы и фэеплъ нэхъыфI дыдэу увынщ дунейм ехыжам республикэм и сымаджэщ нэхъ ин дыдэхэм ящыщ зым щригъэжьа Къэбэрдей-Балъкъэрым и цIыхухэм хуащIэ медицинэ Iуэхутхьэбзэхэр егъэфIэкIуэнымкIэ лэжьыгъэм адэкIи пыщэныр», — къыхигъэщхьэхукIащ КIуэкIуэ Юрий.
- КъБР-м и Iэтащхьэм къигъэлъэгъуащ лIыукIри абы и щIыбым къыдэтхэри хабзэхъумэ органхэм зэман кIэщIым къриубыдэу къызэрагъуэтыфынур быдэу и фIэщ зэрыхъур.
- Боттаев Хьэдис и зэфIэкIымрэ и цIыхугъэмрэ зэрыиным, ар лэжьэгъу, ныбжьэгъу пэжу зэрыщытам тепсэлъыхьащ УФ-м и Федеральнэ Зэхуэсым и Къэрал Думэм и депутат Геккиев Заур, КъБР-м Узыншагъэр хъумэнымкIэ и министерствэм и жылагъуэ советым и тхьэмадэ Бер Мухьэдин, Прохладнэ къалэ округым и щIыналъэ администрацэм и Iэтащхьэ Кладько Игорь сымэ.
- Боттаев Хьэдис дыгъуасэ Хьэсэней къуажэм щыщIалъхьащ.