Нобэрэ пщэдейрэ
2019-12-19
- Дыгъэгъазэм и 19, махуэку
- ХуэмыщIауэ псэухэм защIэгъэкъуэным и дунейпсо махуэщ
- Урысей Федерацэм ШынагъуэншагъэмкIэ и Къэрал Къулыкъум и дзэ тIасхъэщIэх IэнатIэм и лэжьакIуэхэм я махуэщ. 1918 гъэм ЦIыхубэ комиссархэм я советым унафэ къыдигъэкIащ Дзэ Плъыжьым и къудамэ хэхахэр (дзэ тIасхъэщIэх гупхэр) къызэгъэпэщыным теухуауэ.
- 1863 гъэм Инджылызым щыщ Уолтон Фредерик лъэгухэм тралъхьэ линолеумыр къызэригупсысам щыхьэт техъуэ тхылъ къратащ.
- 1866 гъэм Урысейм и Телеграф агентствэр къызэрагъэпэщащ.
- 1917 гъэм Канадэм и лъэпкъ хоккей лигэм, иджырей НХЛ цIэрыIуэм — и япэ чемпионатыр екIуэкIащ. А илъэсырт лигэр къыщызэрагъэпэщари. Абы хыхьат командиплI — «Монреаль Канадиенс», «Монреаль Уондерерс», «Оттава Сенаторс» и «Торонто Аренас» жыхуиIэхэр.
- 1925 гъэм ТАСС-р (Совет Союзым и Телеграф агентствэр) къызэрагъэпэщащ.
- 1939 гъэм СССР-м ЗыхъумэжыныгъэмкIэ и комитетым и зэIущIэм унафэ къыщащтащ Дзэ Плъыжьым и Iэщэхэм Т-34 танкыр хагъэхьэным теухуауэ.
- 1943 гъэм Калинин (иджы Тверь), Свердловск (иджы Екатеринбург) къалэхэм къыщызэрагъэпэщащ Суворовым и цIэр зезыхьэ дзэ училищэхэр.
- 1965 гъэм Шарль де Голль Франджым и президенту хахащ.
- 1972 гъэм Мазэм къикIыжащ абы къэхутэныгъэхэр щезыгъэкIуэкIа «Аполлон-17» америкэ хьэрш кхъухьыр. Абы иса астронавтхэу Сернан Юджин, Эванс Рональд, Шмит Харрисон сымэ Мазэм дыгъэгъазэм и 7 — 19-хэм щылэжьащ.
- 1991 гъэм иужьрейуэ ди къэралым щатащ Вагъуэ Плъыжь орденыр.
- 1997 гъэм япэу ягъэлъэгъуащ дуней псом щынэхъ цIэрыIуэ дыдэхэм ящыщ хъуа, «Оскар» саугъэту 11 зыхуагъэфэща «Титаник» фильмыр. Режиссёрыр Канадэм щыщ Джеймс Кэмеронт.
- Парт, къэрал лэжьакIуэ, Маршал, Совет Союзым плIэнейрэ и ЛIыхъужь, Социалист Лэжьыгъэм и ЛIыхъужь, 1964 — 1982 гъэхэм СССР-м и унафэщIу щыта Брежнев Леонид къызэралъхурэ илъэси 113-рэ ирокъу.
- Франджы уэрэджыIакIуэ, актрисэ цIэрыIуэ Пиаф Эдит къызэралъхурэ илъэси 104-рэ ирокъу.
- «Современник» театрым и унафэщI, СССР-м и Къэрал саугъэтым и лауреат, Совет Союзым и цIыхубэ артисткэ Волчек Галинэ и ныбжьыр илъэс 86-рэ ирокъу.
- Филологие щIэныгъэхэм я доктор, Горькэм и цIэр зезыхьэ Дунейпсо литературнэ институтым и профессор Алий Аллэ къыщалъхуа махуэщ.
- Футболист Iэзэу щыта, СССР-ми РСФСР-ми я чемпион, КъБР-м физкультурэмрэ спортымкIэ щIыхь зиIэ и лэжьакIуэ Iэпщэ Александр къызэралъхурэ илъэс 80 ирокъу.
- РСФСР-м и цIыхубэ артисткэ Вертинская Анастасие и ныбжьыр илъэс 75-рэ ирокъу.
- Литвам щыщ баскетболист цIэрыIуэ, СССР-м спортымкIэ щIыхь зиIэ и мастер, дунеймрэ Европэмрэ, Олимп Джэгухэм я чемпион Сабонис Арвидас и ныбжьыр илъэс 55-рэ ирокъу.
- Дунейм и щытыкIэнур
- «pogoda.yandex.ru» сайтым зэритымкIэ, Налшык уэфIу щыщытынущ. Хуабэр махуэм градус 11 — 14, жэщым градуси 2 — 3 щыхъунущ.
- Дыгъэгъазэм и 20, мэрем
- ЦIыхухэм я зэкъуэтыныгъэм и дунейпсо махуэщ
- УФ-м Къэралым шынагъуэншагъэ къыщызэгъэпэщынымкIэ и органхэм я лэжьакIуэхэм я махуэщ
- Армением, Белоруссием, Къыргъызым Къэрал, лъэпкъ шынагъуэншагъэмкIэ я органхэм я лэжьакIуэхэм я махуэщ
- 1699 гъэм Пётр Езанэм Iэ тридзащ Урысейм ИлъэсыщIэр щыщагъэлъапIэ махуэу щIышылэм и 1-р гъэувыным теухуа унафэм. Нэхъапэм ар фокIадэм и 1-м техуэу щытащ.
- 1706 гъэм сыхьэтибгъум Москва Кремлым и Спасскэ чэщанэм япэ дыдэу къыщеуащ абы щагъэува сыхьэтыр. Тхьэгъуш 33-рэ зыхэт а сыхьэтыр Пётр Езанэм Голландием щригъэщIат.
- 1828 гъэм Канадэмрэ Урысей империемрэ дипломатие зэхущытыкIэхэр яку дэлъ хъуащ.
- 1917 гъэм ВЧК-р (Урысейпсо чрезвычайнэ комиссэр) къызэрагъэпэщащ. Абы и унафэщIу ягъэуват Дзержинский Феликс.
- 1920 гъэм ВЧК-м хэту къызэрагъэпэщащ хамэ къэралхэм щылэжьэным хуэгъэпса къудамэ. Абы и къалэн нэхъыщхьэр тIасхъэщIэх лэжьыгъэрт.
- 1934 гъэм Мордовие АССР-р къызэрагъэпэщащ.
- 1938 гъэм СССР-м и ЦIыхубэ комиссархэм я советым унафэ къыдигъэкIащ лэжьакIуэхэр IэнатIэ щыувкIэ я къулыкъур, щыува зэманыр, я лэжьыгъэм пыщIа нэгъуэщI-къинэмыщIхэр къыщагъэлъэгъуэну тхылъхэр къахузэIухыным теухуауэ.
- 1963 гъэм ФРГ-м щыпсэухэр хуит ящIащ Берлин блыныр зэпаупщIу, я Iыхьлыхэм я деж зы махуэкIэ щыхьэщIэн папщIэ ГДР-м кIуэну.
- 1971 гъэм Франджым къыщызэрагъэпэщащ «Дохутырхэм гъунапкъэ яIэкъым» дунейпсо зэгухьэныгъэр.
- 1999 гъэм Китайм и щIыналъэм къыхагъэхьащ Макао хытIыгур, 1987 гъэм зэращIылIауэ щыта зэгурыIуэныгъэм ипкъ иткIэ Португалием къритыжар.
- Адыгэпщ, урысеидзэм полковникыу къулыкъу щызыщIа ХьэтIэхъущокъуэ Исмэхьил-Бей къызэралъхурэ илъэс 259-рэ ирокъу.
- КъБР-м щIыхь зиIэ и журналист, публицист ГъуаплъащIэ Заудин и ныбжьыр илъэс 75-рэ ирокъу.
- ТхакIуэ, журналист, «Iуащхьэмахуэ» журналым жэуап зыхь и секретару щыта ХьэIупщы МуIэед къызэралъхурэ илъэс 67-рэ ирокъу.
- Урысей журналист, политолог, тхыдэ щIэныгъэхэм я кандидат Медведев Сергей и ныбжьыр илъэс 53-рэ ирокъу.
- Дунейм и щытыкIэнур
- «pogoda.yandex.ru» сайтым зэритымкIэ, Налшык уэфIу щыщытынущ. Хуабэр махуэм градуси 8 — 11, жэщым градуси 2 щыхъунущ.