ЗэфIэкIыр цIыху бжыгъэм елъытакъым
2019-09-24
- «Спартак-Налшык» (Налшык) — «Спартак-Владикавказ» (Владикавказ) — 3:0 (1:0). Налшык. «Спартак» стадион. ФокIадэм и 21-м. ЦIыхуи 150-рэ еплъащ.
- Судьяхэр: Стрельцов (Дон Iус Ростов), Шрамко, Къуэшыкъуэ (тIури Белореченск щыщщ).
- «Спартак-Налшык»: Щоджэн, КIэдыкIуей, Клышэ, Сындыку (Запалацкий, 85), Ольмезов, Хьэшыр (Талабкэ, 85), Дэхъу, Iэпщацэ (Салахетдинов, 77), Шаваев, Машэжь (Ашу, 71), Бацэ (Лъэпщ, 89).
- «Спартак-Владикавказ»: Натабашвили, Бадоев, Хугаев, Шотаев, Кокаев, Цабиев, Камболов, Базаев, Гиоев (Кусов, 56), Кобесов (Тинаев, 64), Гатикоев.
- Топхэр дагъэкIащ: Дэхъум, 26 (1:0). Бацэм, 48 (2:0). Хьэшырым, 55 (3:0).
- Дагъуэ къыхуащIащ: Шотаевым, Кобесовым, Сындыкум.
- Джэгум къыхахуащ: Дэхъур.
- Адыгэхэм я дунейпсо махуэ лъапIэм къыпызыщэ дэрэжэгъуэ хъуащ щэбэт кIуам Налшык щызэхэта Къэбэрдей-Балъкъэрымрэ Осетие Ищхъэрэ — Аланиемрэ я футбол командэхэм я зэIущIэр. Топджэгум еплъыну къэкIуахэм я нэгуи зиужьащ гушхуэныгъи ягъуэтащ.
- Урысей Федерацэм футболымкIэ и етIуанэ дивизионым и «Ипщэ» гупым щекIуэкI зэхьэзэхуэм и Iуэхухэр щызэфIэувэжу хуежьа «Спартак-Налшыкым» къригъэблэгъат сыт щыгъуи и хьэрхуэрэгъу лъэщу къилъытэ «Спартак-Владикавказ»-р. ХьэщIэхэм зэпеуэм иужь дыдэ увыпIэр иджыпсту зэрыщаIыгъым къыкIыртэкъым абыхэм тыншу уапэлъэщыну. Ар къалъытэу ди щIалэхэм джэгур зэщIэкъуауэ икIи жэуаплыныгъэр зыхащIэу ирагъэжьащ — нэрылъагъут кIыхьлIыхь хъуа я зэхуэмыкIуэныгъэм кIэ иратыну мурад быдэ зэраIэр.
- «Спартак-Налшыкым» апхуэдизу лъэщу къыщIидзати, и хьэрхуэрэгъухэм я щхьэр къригъэIэтыртэкъым. Мызэ-мытIэу ди щIалэхэм Iэмал гъуэзэджэхэр яIащ топхэр дагъэкIыну, арщхьэкIэ джэгум и япэ Iыхьэм ар щахузэфIэкIар зэ закъуэщ. 26-нэ дакъикъэм Дэхъу Ислъам бжыгъэр къызэIуихащ. Жыжьэу щыта ар зэуа топым «Спартак-Владикавказым» и гъуащхьэтетыр пэлъэщакъым.
- Загъэпсэхуну имыкI щIыкIэ налшыкдэсхэр нэхъ мащIэ хъуащ. Дэхъу Ислъам и хьэрхуэрэгъум топыр къыщытрихым фэбжь хьэлъэ ирит пэтащ икIи судьям ар гулъытэншэ ищIакъым — джэгум занщIэу къыхихуащ.
- ЗэфIэкIыр цIыху бжыгъэм зэремылъытар «Спартак-Налшыкым» наIуэу къыщигъэлъэгъуащ зэIущIэм и етIуанэ Iыхьэм. Абы щIидзэри, дакъикъищ джэгуауэ арат бжыгъэр 2:0 щыхъуам. Бацэ Къантемыр мы зэхьэзэхуэм ебгъуанэ топыр щыдигъэкIащ икIи етIуанэ дивизионым и «Ипщэ» гупым и гъуащхьауэ нэхъ Iэзэ дыдэхэм яхы хьащ.
- Абдежми къыщыувыIакъым ди щIалэхэр. Аргуэру дакъикъэ зыхыбл дэкIри, бжыгъэр ин ящIащ. Хьэшыр Алан зэуа топым къезыгъэгъэзэфын щыIэу къыщIэкIынтэкъым.
- 3:0-у япэ ища иужькIэ, «Спартак-Налшыкым» и тренерхэм джэгупIэ губгъуэм кърагъэхьащ щIалэщIэ зыбжанэ. Абыхэм зэIущIэр фаджэ ящIакъым икIи текIуэныгъэ дахэкIэ ар тыншу ирагъэухащ.
- Ди жагъуэ зэрыхъунщи, Мейкъуапэ и «Дружба»-м лъэпкъ дэрэжэгъуэм къыпищэфакъым — абы етIуанэу зэкIэлъхьэужьу фIахьащ. Иджы Адыгейм и футболист-хэм очкоитхукIэ япэ ирагъэщащ зэхьэзэхуэм бжьыпэр щызыубыда Астрахань и «Волгарь»-р.
- Иджы фыщыдгъэгъуэзэнщ етIуанэ дивизионым и «Ипщэ» гупым щекIуэкI зэхьэзэхуэм ипкъ иткIэ иужьу зэ- хэта джэгугъуэм кърикIуа бжыгъэхэм. Мис ахэр: СКА (Дон Iус Ростов) — «Урожай» (Краснодар) — 3:0, «Легион-Динамо» (Мэхъэчкъалэ) — «Дружба» (Мейкъуапэ) -1:0, «Анжи» (Мэхъэчкъалэ) — «Биолог-Новокубанск» (Прогресс) — 1:0,«Алания» (Владикавказ) — «Интер» (Черкесск) -5:0,«Волгарь» (Астрахань) — «Мэшыкъуэ-КМВ» (Псыхуабэ) -1:0,«Краснодар-3» (Краснодар) — «Мэхъэчкъалэ» (Мэхъэчкъалэ) — 0:2, «Черноморец» (Новороссийск) — «Динамо-Ставрополь» (Ставрополь) — 3:0.
- Урысей Федерацэм футболымкIэ и етIуанэ дивизионым и «Ипщэ» гупым щекIуэкI зэхьэзэхуэм хыхьэ къыкIэлъыкIуэ зэIущIэр фокIадэм и 28-м зэхэтынущ. А махуэм «Спартак-Налшыкыр» Адыгейм и къалащхьэм щыдэджэгунущ Мейкъуапэ и «Дружба»-м.
- Жыласэ Заурбэч.