Чемпионыр кърагъэблэгъэж
2019-09-20
- Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетым гуапэу къыщрагъэблэгъэжащ Урысейм дзюдомкIэ и чемпионатым дыщэ медалыр къыщызыхьа, ПедагогикэмкIэ, психологиемрэ физическэ щэнхабзэ-спорт егъэджэныгъэмкIэ институтым (ИППиФСО) и магистр Бабыгуей Олег. АбыкIэ хъыбар къыдигъэщIащ КъБКъУ-м и пресс-IэнатIэм.
- Нэзрэн къалэм щекIуэкIа къэрал-псо зэхьэзэхуэм хэтащ щIыналъэ 61-м къикIа спортсмен 550-м щIигъу. ЗэIущIитху иригъэкIуэкIам ящыщу 3-м хухаха зэманыр имыух щIыкIэ щытекIуа ди лъэпкъэгъум дыщэ медалыр къыхуагъэфэщащ.
- Къыхэгъэщыпхъэщи, иджырейр спортсменым и япэ ехъулIэныгъэкъым. Бабыгуейр Урысейми дуней псоми самбэмкIэ я чемпионщ, самбэмкIэ Дунейпсо кубокыр къихьащ, СамбэмкIэ дунейпсо федерацэм 2016 гъэм спортсмен нэхъыфIу къилъытащ.
- Бабыгуей Олег ехъуэхъуну зэIущIэм кърихьэлIат КъБКъУ-м и ректор Алътуд Юрий, гъэсэныгъэмкIэ проректор Геккиев СулътIан, ИППиФСО-м и директор Михайленкэ Ольгэ, КъБКъУ-м и «ГринХилл-Локомотив» спорт клубым хэтхэр, студсоветымрэ профкомымрэ я лIыкIуэхэр.
- «ТIуащIэу гуапэщ чемпионыр ди институтым и магистру зэрыщытыр, дрогушхуэ апхуэдэ ехъулIэныгъэм. Си фIэщ мэхъу а зэфIэкI лъагэм хуэкIуэным ди материально-техникэ базэр сэбэп зэрыхуэхъуар. Ректор Алътуд Юрий и фIыгъэкIэ институтыр къызэгъэпэщащ егъэджэныгъэм, зыгъэсэныгъэм ехьэлIа IэмэпсымэхэмкIэ. Ди институтым къыщIигъэкIа спортсмен 400-м нэблагъэ спортым и мастер хъуащ, абыхэм ящыщу 10-р спортым щIыхь зиIэ и мастерщ, 16-м дунейпсо категорие яIэщ. Нобэ институтыр мэгушхуэ, псори уи текIуэныгъэм щогуфIыкI. ЕхъулIэныгъэ уиIэ-ну дынохъуэхъу», — зыхуигъэзащ чемпионым Михайленкэ Ольгэ.
- Спортсменхэм къадэщIхэм щIэгъэкъуэн зэрахуэхъум, зыгъэсэныгъэ программэм, урысей, дунейпсо зэхьэзэхуэхэм зэрызыхуагъэхьэзыр щIыкIэм теухуауэ Олег епсэлъылIащ Алътуд Юрий. Ар ехъуэхъуащ республикэм, къэралым я пщIэр зыIэт текIуэныгъэ куэд иджыри зыIэригъэхьэну.
- Чемпионым фIыщIэ яхуищIащ зэрагъэлъэпIам къыхэкIыу икIи къигъэгугъащ и зэфIэкIхэм дяпэкIи хигъэхъуэным яужь зэритынумкIэ.
- АдэкIэ Бабыгуей Олег жэуап яритащ «ГринХилл-Локомотив» клубым хэт дзюдоист ныбжьыщIэхэм я упщIэхэм. АдэкIэ и мурадхэм теухуауэ абы жиIащ: «Токио щекIуэкIыну XXXII Гъэмахуэ Олимп джэгухэм сыхэтыну сыхуейщ. Сыщогугъ Урысейм и командэ къыхэхам сыхэхуэну».
- Псалъэмакъым хэтахэр Бабыгуейм ехъуэхъуащ икIи Iэмал имыIэу олимп чемпион хъун хуейуэ къалэн щащIащ.
- ЖЫЛАСЭ Замир.