Псори дощIэж
2019-08-22
- ШыщхьэуIум и 20-м Терскол къыщызэIуахащ «Фэеплъ вахтэ-2019» урысейпсо Iуэхур. 1942 гъэм Iуащхьэмахуэ и Iэшэлъашэм щыхэкIуэдауэ щыта совет сэлэт 15-м я къупщхьэлъапщхьэхэр щыщIалъхьэжащ, абы ехьэлIа дауэдапщэхэри ирагъэкIуэкIащ. Iуэхум къекIуэлIащ Урысей Федерацэм Зыхъумэ-жыныгъэмкIэ и министерствэм, КъБР-м и Правительствэм я лIыкIуэхэр, Iуащхьэмахуэ щIыналъэм щыпсэухэр.
-
Къардэн Мурат
ПэкIум цIыху куэд кърихьэлIат — Терскол къуажэ школым щегъэжьауэ Хэку зауэшхуэм хэкIуэдахэм я фэеплъым нэсыху иувыкIахэр. ЗэIущIэр къызэIуихащ КъБР-м и Правительствэм и УнафэщIым и къуэдзэ Къардэн Мурат.
- — «Фэеплъ вахтэм» и къызэгъэпэщакIуэхэм, Iуащхьэмахуэ и мылылъэхэм щытыкIэ гугъум иту щылэжьа лъыхъуакIуэхэм, архивым хэплъахэм, къытщIэхъуэ щIэблэр ущииныгъэм хуэунэтIа зэIущIэхэр езыгъэкIуэкIахэм — псоми фIыщIэ ин яхудощI. Зи Хэкум зи гъащIэр щIэзытахэм щIыр ягъуэтыж — я псэр тыншыжауэ Тхьэм къыщIигъэкI. Абыхэм зэрахьа лIыхъужьыгъэр дэ тщыгъупщэнкъым — жиIащ Къардэным.
- УФ-м ЗыхъумэжыныгъэмкIэ и министерствэм зауэм хэкIуэдахэм я фэеплъхэр хъумэнымкIэ и дзэ-мемориал IуэхухэмкIэ управленэм и къудамэм и унафэщI Миронов Игорь и гугъу ищIащ Европэм и бгы нэхъ лъагэ дыдэм и Iэгъуэблагъэхэм щрагъэкIуэкI къэлъыхъуэныгъэхэр лэжьыгъэ нэхъ гугъухэм зэращыщыр. Абы къыхэкIкIэ УФ-м ЗыхъумэжыныгъэмкIэ и министерствэр сыт и лъэныкъуэкIи щIэгъэкъуэн зэрыхъур къыхигъэщащ абы.
- Мыпхуэдэ къэлъыхъуэныгъэ Iуэхухэм хэтщ зыхуей-зыхуэфIхэмкIэ къызэгъэпэща цIыху миным щIигъу. Къагъуэтыжауэ зи цIэ ягъэнэIуэжыфахэм я сурэт хъума хъуахэри интернет сайтхэм къралъхьэ, абыхэм я гъащIэм, къызэпача гъуэгуанэм теухуауэ архивхэм къыщагъуэтыжахэри гъусэ хуащI. Хъыбарыншэу кIуэдам еплъытмэ, къэдгъуэтыжахэр мащIэщ, аращи, дызэкъуэту адэкIи ди лэжьыгъэм пытщэнущ, — жиIащ абы.
- АдэкIэ псалъэ иратащ Зауэм, лэжьыгъэм, IэщэкIэ ЗэщIэузэда Къарухэм, хабзэхъумэ органхэм, (пенсионерхэм) я ветеранхэм я республикэ советым и тхьэмадэ Шыхъуэбахъуэ Мухьэмэд.
- — Хэку зауэшхуэм хэкIуэдахэр къэлъыхъуэжыным теухуа мы Iуэхур зэрырагъажьэрэ илъэсибл зэрырикъум псори дыщыгъуазэщ. А зэманым къриубыдэу Iуащхьэмахуэ и щIыналъэм цIыху 250-м я хьэдэ къупщхьэхэр къыщагъуэтыжащ. Ахэр мы дыздэщыт щIыпIэм щыщIалъхьэжащ. Къэлъыхъуэныгъэ лэжьыгъэм хэта дэтхэнэми фIыщIэ хуэфащэщ. Унафэ къызэращтащи, «Фэеплъ вахтэ» зыфIаща акцэр екIуэкIынущ мыбы щыхэкIуэда совет зауэлI-хэм я иужьрей сэлэтыр къагъуэтыжыху. Нобэ екIуэкI Iуэхури абы щыщ лъэбакъуэщ. А зауэлIхэм я гъащIэр пщIэншэу зэрамытам и щыхьэт наIуэу дэ ахэр сыт щыгъуи ди гум илъынщ.
- Зауэм хэкIуэдахэм я хьэдэ къупщхьэхэр щIалъхьэн ипэкIэ муслъымэн, чыристан динхэм къаубыд дауэдапщэхэр иращIэкIащ.
- Урысей Федерацэм ЗыхъумэжыныгъэмкIэ и министерствэм КИФЩI-м щиIэ 49-нэ инженер дзэхэм я нэхъыщхьэ, полковник Бессмертный Роман и къэпсэлъэныгъэм къыхигъэщащ Кавказым зауэ гуащIэ зэрыщекIуэкIар, 1942 гъэм Iуащхьэмахуэ и бгылъэхэм щыхэкIуэда совет зауэлIхэм я къупщхьэлъапщхьэхэр къэлъыхъуэным зэрыпащэнур.
- — Хэку зауэшхуэр ди текIуэныгъэкIэ зэриухрэ илъэс 74-рэ зэрырикъуар Iэтауэ ди къэралым щагъэлъэпIащ, иджы а махуэшхуэ къэкIуэнум и юбилейм зыхуагъэхьэзыр. Дэ ди къалэнщ хэкум зи псэр щIэзытауэ нобэр къыздэсым хабзэм тету щIамылъхьэжа сэлэт хахуэхэм яхуэфащэ егъэзыпIэ едгъэгъуэтыжыну. Къэлъыхъуэныгъэ лэжьыгъэхэр ирагъэкIуэкIынущ Ищхъэрэ дзэ округым и зауэлIхэм, Iуэхум хэтынущ «Мемориал-Эльбрус» лъыхъуакIуэ гупыр. Лэжьыгъэхэр щрагъэкIуэкIынущ «Ледовая база», «Донгуз-Орун» бгъуэнщIагъым я Iэгъуэблагъэхэм.
- ПэкIум и кIэухым Iуащхьэмахуэ лъапэ щыхэкIуэда зауэлIхэм я цIэхэр зытетха шар хужьхэр уафэм яутIыпщащ, фэеплъым удз гъэгъахэр тралъхьащ.
- НафIэдз Мухьэмэд.