Гъуащхьэтет нэхъыфI Джэрыджэ Сэлим
2019-08-22
- Ди гуапэ зэрыхъущи, къытщIэхъуэ щIэблэм ящыщ куэд дехьэх физкультурэмрэ спортымрэ, ехъулIэныгъэфIхэри зыIэрагъэхьэ. Абыхэм ящыщщ «Фэ топ-2019» урысейпсо топджэгу зэпеуэм и кIэух Iыхьэм гъуащхьэтет нэхъыфIу къыщалъыта Джэрыджэ Сэлим. АбыкIэ хъыбар дигъэщIащ Бахъсэн район администрацэм и пресс-IэнатIэм и лэжьакIуэ Чылар Аринэ.
- Джэрыджэр Бахъсэнёнок (Къэсейхьэблэ) щыщщ, ар 7-нэ классым щоджэ. Сэлим топджэгум дехьэх илъэситху зэрыхъу лъандэрэ. Ивановэ къалэм щекIуэкIа иужьрей зэпеуэм адыгэ щIалэщIэр хуагъэхьэзыращ тренерхэу Зэракъуш Радмиррэ Тхьэкъуахъуэ Хъусенрэ. Абыхэм зэрыжаIэмкIэ, Сэлим зэфIэкIыфIхэр къыкъуэкIыну гугъэ уегъэщI. Дауи, турнирым хэта спортсменхэм набдзэгубдзаплъэу кIэлъыплъащ футбол клуб цIэрыIуэхэм я унафэщIхэр. Джэрыджэр гъуэм зэрыдэтыр гунэс ящыхъуащ ЦСКА клубым и пашэхэм. Абы и щыхьэтщ щIалэщIэр фокIадэ мазэм а клубым зэрырагъэблагъэр, и джэгукIэм еплъыну.
- Италием и гъуащхьэтет цIэрыIуэ Буффон Джанлуиджи ещхьу джэгуну щIохъуэпс Джэрыджэр. ЩIалэщIэм дохъуэхъу и мурадхэмрэ хъуэпсапIэхэмрэ ялъэIэсыну, ди щIыналъэр зэрыгушхуэн текIуэныгъэ куэд дяпэкIи зыIэригъэхьэну. Хьет жегъэIэ, Сэлим!
- ЖЫЛАСЭ Маритэ.