НэхъыфIхэр ягъэбелджылы
2019-03-19
- Бахъсэн районым и администрацэм иджыблагъэ щекIуэкIащ щIыпIэ администрацэхэм щIалэгъуалэм ядэлэжьэнымрэ спортымкIэ я къудамэхэм зэфIах лэжьыгъэхэм щыхэплъэ зэIущIэ. АбыкIэ хъыбар дигъэщIащ щIыналъэ администрацэм и пресс-IуэхущIапIэм и унафэщI Чылар Аринэ. Зэхуэсым хэтащ районым хиубыдэ жылэ псоми я лIыкIуэхэр.
- КъаIэта Iуэхум теухуауэ зэIущIэм доклад щищIащ щIыпIэ администрацэм щIалэгъуалэм ядэлэжьэнымкIэ и къудамэм и пашэ Гъут Резуан. Абы къызэрыхигъэщамкIэ, щIалэгъуалэм щIыпIэм щадолажьэ унэтIыныгъэ зыбжанэкIэ.
- Апхуэдэхэщ, къапщтэмэ, зи щIалэгъуэхэр волонтёр зэщIэхъееныгъэм хэшэным, IэщIагъэ къыхахынымкIэ чэнджэщхэр етыным, спортым, творчествэм дегъэхьэхыным, лъэпкъпсо, унагъуэ лъапIэныгъэр къегъэлъытэным, нэгъуэщIхэми епха лэжьыгъэхэр.
- — Жыджэрщ ди щIыналъэм и щIалэгъуалэр. Нэгъабэ и закъуэ къапщтэмэ, ди къудамэм иригъэкIуэкIа зэIущIи 101-м хэтащ зи щIалэгъуэхэм ящыщу цIыху 2342-рэ, — къыхигъэщащ Гъутым. — Апхуэдэ ехъулIэныгъэхэр зыIэрыдгъэхьэфынутэкъым, щIыпIэ къудамэхэр зэуIуу, зэгурыIуэу дызэдэмылэжьамэ.
- ЗэIущIэм я цIэр къыщраIуащ щIалэгъуалэм ядэлажьэ IэщIагъэлI зыбжанэм. Абыхэм ящыщщ ДыщэкI Эльвирэ (ХьэтIохъущыкъуей къуажэ), Балъкъэр Iэдэм (Кыщпэк къуажэ), Токъмакъ Тембот (Къулъкъужын Ищхъэрэ къуажэ). Абыхэм иратащ район администрацэм къыбгъэдэкI щIыхь, фIыщIэ тхылъхэр, саугъэт лъапIэхэр хуагъэфэщащ.
- Тамбий Линэ.