Гъатхэм псори техьакъым
2019-03-19
- Нэгъабэ щэкIуэгъуэм и 11-м зэпагъэуа, Урысей Федерацэм футболымкIэ и етIуанэ дивизионым и «Ипщэ» гупым 2018 — 2019 гъэхэм щекIуэкI зэхьэзэхуэм щэбэт кIуам щIидзэжащ. Абы лъандэрэ блэкIа мазиплIым щIигъум зэхъуэкIыныгъэ инхэр командэхэм къыщыхъуащ икIи ахэр зэхуэмыдэу гъатхэм техьащ.
- Псом ящхьэращи, етIуанэ дивизионым и «Ипщэ» гупым щыджэгу командэхэм зы яхэщIащ. Понедельник Виктор и цIэр зэрихьэу Дон Iус Ростов къалэм дэт футбол академиер зэхьэзэхуэм хэкIыжащ, абы зэрыхэтын мылъку адэкIэ зэримыIэм къыхэкIыу.
- Иджы къэнэжа джэгугъуэхэм 0:3-уэ щыхагъэщIауэ «Академия»-м хуатхынущ. А Iуэхум нэхъ хилъэфар «Спартак-Налшыкырщ». Нэгъабэ щэкIуэгъуэм и 11-м ди командэр иужь дыдэу абы IущIащ икIи ди къалащхьэм къыщытекIуащ. Адрейхэм ростовдэсхэм ядэджэгуну къапэщылъу арат. Дауи, очко щырыщыр абыхэм я Iэрылъхьэщ. Япэу апхуэдэ тыгъэ зыIэрыхьар ДыщэкI Хьэзрэт зи тренер нэхъыщхьэ Новороссийск и «Черноморец»-ращ. Гъатхэпэм и 16-м Дон Iус Ростов нэс мыкIуэу абы текIуэныгъэр 3:0-у Iэрыхьащ икIи ещанэ увыпIэм нэс дэкIуэтеящ.
- Япэ дивизионым кIуэну Iэмал къезытыну пашэныгъэм ерыщу зэрыщIэбэнынур къигъэлъэгъуащ Краснодар и «Урожай»-м. Абы щэбэт кIуам къригъэблэгъа Дон Iус Ростов и СКА-р хуабжьу къеныкъуэкъуащ. АрщхьэкIэ Къалмыкъ Амур аргуэру хэгъэрейхэр къыдихыжащ икIи етIощIанэ дакъикъэм дигъэкIа топ закъуэм и фIыгъэкIэ текIуэныгъэр краснодардэсхэм зыIэрагъэхьащ. Ди лъахэгъу щIалэращ етIуанэ дивизионым и «Ипщэ» гупым гъуащхьауэхэм я зэпеуэм бжьыпэр щызыIыгъыр. Ар мы зэхьэзэхуэм пщыкIузрэ къыщыхэжаныкIащ.
- СКА-р зэрыхигъэщIам и фIыгъэкIэ адыгэ щIалэ зыбжанэ зыхэт «Урожай»-р зэхьэзэхуэм пашэныгъэр щызыIыгъ «Чайка»-м лъэщIыхьэжыпащ. Краснодардэсхэм зы зэIущIэкIэ нэхъ мащIэ зэрырагъэкIуэкIар къэплъытэмэ, абыхэм я Iуэхухэр, уеблэмэ, нэхъыфIщ. Песчанокопскэдэсхэм я стадионым щахухэгъэщIакъым Псыхуабэ и «Мэшыкъуэ-КМВ»-р икIи абы и зэранкIэ очкоитI яфIэкIуэдащ. Ахэр иужькIэ яхуримыкъужынкIи хъунущ.
- Иужь дыдэ увыпIэм щытынымкIэ зигъэнщIа хуэдэщ «Динамо-Ставрополь»-м. Ар Мейкъуапэ и «Дружба»-м текIуэри, къыдэкIуэтеящ. АдэкIэ кIэух увыпIэр «Академия»-м зэримыутIыпщынур нэрылъагъущ.
- Иджы фыщыдгъэгъуэзэнщ мы гъэм япэу етIуанэ дивизионым и «Ипщэ» гупым щызэхэта джэгугъуэм кърикIуа бжыгъэхэм. Мис ахэр: «Мэшыкъуэ-КМВ» (Псыхуабэ) — «Чайка» (Песчанокопское) — 1:1, «Динамо-Ставрополь» (Ставрополь) — «Дружба» (Мейкъуапэ) — 2:0, «Академия» (Дон Iус Ростов) — «Черноморец» (Новороссийск) — 0:3, «Спартак-Владикавказ» (Владикавказ) — «Биолог-Новокубанск» (Прогресс) — 3:1, «Урожай» (Краснодар) — СКА (Дон Iус Ростов) — 1:0, «Легион Динамо» (Мэхъэчкъалэ) — «Ангушт» (Нэзрэн) — 1:0.
- «Краснодар-3» (Краснодар) — «Волгарь» (Астрахань) зэIущIэр ягъэIэпхъуащ.
- КъыкIэлъыкIуэ джэгугъуэр гъатхэпэм и 23-м зэхэтынущ. А махуэм зэхьэзэхуэм къыхыхьэж «Спартак-Налшыкым» и стадионым къыщригъэблэгъэнущ «Краснодар-3» командэр.
- Жыласэ Заурбэч.