Къэбэрдей-Балъкъэрым и комсомолым и тхыдэ
2018-10-20
- Иджыблагъэ «Эльбрус» тхылъ тедзапIэм дунейм къыщытехьащ лэжьыгъэ гъэщIэгъуэн. Лениным и цIэр зезыхьэ союзпсо комму- нист щIалэгъуалэ зэгухьэныгъэр (ВЛКСМ) илъэси 100 зэрырикъум теухуа «История комсомола Кабардино-Балкарии» тхылъыр Зумакулов Борисрэ Мэрзей Залымджэрийрэ зэхагъэуващ.
- «Ди республикэм и Iэтащхьэ КIуэкIуэ Юрий и унафэкIэ, ВЛКСМ-м и илъэс бжыгъэ дахэр зэрагъэлъэпIэну щIыкIэр зыубзыхуну къызэгъэпэщакIуэ комитет зэхашауэ щытащ, — щыжеIэ щIэджыкIакIуэхэм яхуэгъэза псалъэу тхылъыр къызэIузыхым, Правительствэм и УнафэщI, къызэгъэпэщакIуэ комитетым и тхьэмадэу хаха Мусуков Алий. — Комсомолым и ветеранхэмрэ а зэгухьэныгъэм и лэжьыгъэм жыджэру хэтахэмрэ юбилейм ехьэлIа Iуэхухэр зыхуей хуэзэу къызэдгъэпэщынымкIэ куэд къызэрыддащIар гуапэщ. ВЛКСМ-м и махуэр Iэтауэ дгъэлъэпIэныр ди республикэм и комсомолхэм я деж ди пщэ къыщыдэхуэ къалэнышхуэщ. Махуэшхуэр зыхуэтщIхэм, зэгухьэныгъэр къызэзыгъэпэщахэм, нэмыцэ зэрыпхъуакIуэхэм я топышэхэр бгъэгукIэ къэзыгъэувыIахэм, Берлин нэсу Рейхстагым зи псалъэ тезытхахэм ящыщ куэд псэужкъым, уеблэмэ 50-60 гъэхэм комсомолым хэтахэм я ныбжьыр илъэс 80-м щхьэдэхащ. Ди дежкIэ жэуаплыныгъэшхуэ зыпылъ Iуэхущ тхэмытыжхэм я цIэр тщIэныр, псэухэм пщIэ яхуэтщIыныр».
- КъБР-м и Iэтащхьэм и администрацэм и УнафэщI, ВЛКСМ-м и Къэбэрдей-Балъкъэр обкомым и япэ секретару щыта Къуэдзокъуэ Мухьэ-мэд и тхыгъэ кIэщIымкIэ дыхегъэгъуазэ тхылъым къыщыIэтахэм, ахэр зи IэрыкIхэм IуэхуфI зэралэжьыр къыхегъэщ, тхыдэми дыхегъэгъуазэ: «Лениным и цIэр зезыхьэ союзпсо коммунист щIалэгъуалэ зэгухьэныгъэр къызэрызэрагъэпэщрэ 2018 гъэм илъэси 100 ирокъу. Рабочэхэмрэ мэкъумэшыщIэ щIалэгъуалэмрэ я зэгухьэныгъэхэм я I Урысейпсо съездым къыщащтауэ щыта унафэм ипкъ иткIэ, 1918 гъэм жэпуэгъуэм и 29-м а махуэр ягъэлъэпIэну ягъэувауэ щытащ. 1924 гъэ пщIондэ ар щытащ ЩIалэгъуалэм я Урысей коммунист зэгухьэныгъэу (РКСМ), Ленин Владимир дунейм ехыжа иужь — Лениным и цIэр зезыхьэ Урысей коммунист щIалэгъуалэ зэгухьэныгъэ хъуащ, 1926 гъэм къыщыщIэдзауэ зэбграгъэкIыжыху — ВЛКСМ-щ. Абы хагъэхьэрт илъэс 14-м къыщыщIэдзауэ 28-рэ зи ныбжь щIалэгъуалэр».
- Тхылъым увыпIэ хэха щаубыд КПСС-м и Къэбэрдей-Балъкъэр обкомым и япэ секретарь Мэлбахъуэ Тимборэ, ВЛКСМ-м и Комитет нэхъыщхьэм и япэ секретарь Тяжельников Евгений сымэ комсомолхэм я зэIущIэшхуэхэм къыщапсэлъахэр.
- ВЛКСМ-м и тхыдэ гъуэгуанэм теухуауэ щIэныгъэлIхэм, тхыдэджхэм, журналистхэм, зэгухьэныгъэм жыджэру хэтахэм я тхыгъэ купщIафIэхэм я пэублэщ жыпIэкIэ ущыуэнукъым тхыдэ щIэныгъэхэм я доктор, профессор, КъБР-мрэ КъШР-мрэ щIэныгъэхэмкIэ щIыхь зиIэ я лэжьакIуэ Зумакулов Борис и «Этапы большого пути» IэдакъэщIэкIыр.
- Апхуэдэуи тхылъым итщ илъэс зэмылIэужьыгъуэхэм газетхэм къытехуа тхыгъэхэр, комсомолым хэтахэм я гукъэкIыжхэр, ВЛКСМ-м и Къэбэрдей-Балъкъэр обкомым къыдигъэкIыу щыта «Советская молодежь» газетым и редактор нэхъыщхьэу лэжьахэр, комсомолым теухуа уэрэдхэр, нэгъуэщIхэри.
- ИСТЭПАН Залинэ.