ГЕРГОКОВЭ Тамарэ Хьэрун и пхъур
2020-07-28
- Къэбэрдей-Балъкъэрым и лъэпкъ щэнхабзэм хэщIыныгъэшхуэ игъуэтащ. 2020 гъэм бадзэуэгъуэм и 26-м и ныбжьыр илъэс 82-м иту дунейм ехыжащ Къэбэрдей-Балъкъэр Республикэм щIыхь зиIэ и артисткэ Гергоковэ (Созаевэ) Тамарэ Хьэрун и пхъур.
- Тамарэ Ленинград консерваториер къиухат уэрэджыIакIуэ IэщIагъэр иIэу. ЕджапIэ нэужьым илъэс куэдкIэ ар щытащ Къэбэрдей-Балъкъэр Республикэм и Къэрал филармонием и уэрэджыIакIуэ пажэу, балъкъэр лъэпкъ макъамэ щэнхабзэм и псыпэр езышэжьахэми ящыщщ. Абы бгъэдэлъ зэчийм пщIэ хуэзыщIхэм занщIэу къацIыхурт, фIыуи ялъагъурт и макъ дахэр. Тамарэ и уэрэд жыIэкIэм, ахэр Iэзэу зэригъэзащIэм я фIыгъэкIэ цIэрыIуэ хъуащ, цIыхубэм фIыуэ ялъэгъуащ Къэбэрдей-Балъкъэрым и композитор куэдым я IэдакъэщIэкIхэр, апхуэдэуи ящыгъупщэжа макъамэхэр цIыхубэм къахихьэжауэ нобэми жаIэ.
- Тамарэ и IэзагъымкIэ ядэгуашэрт Къэбэрдей-Балъкъэрым щэнхабзэмрэ гъуазджэмкIэ и училищэм щеджэхэм. ЩIалэгъуалэр абы хуигъасэрт уэрэд жыIэным. Абы и нэIэ зытета куэдым иужькIэ цIыхубэм я пщIэ къалэжьащ.
- Тамарэ Хьэрун и пхъум и гъащIэр тыхь хуищIащ фIыуэ илъагъу Iуэхум икIи лъэпкъ щэнхабзэм къыпхуэмылъытэным хуэдиз хэлъхьэныгъэ хуищIащ.
- ЦIыху псэ къабзэм, зэчиифIэм и фэеплъыр Къэбэрдей-Балъкъэрым щыпсэухэм ягу илъынщ.
- КъБР-м ЩэнхабзэмкIэ и министерствэ.