Фэеплъымрэ щIыхьымрэ я илъэсым хуэгъэпсауэ
2020-02-20
- УФ-м ЕгъэджэныгъэмкIэ и министерствэм къыхилъхьауэ, нэгъабэ и дыгъэгъазэм и кIэухым къыщыщIэдзауэ 2020 гъэм и мазаери хиубыдэу ди къэра-лым хыхьэ щIыналъэхэм щрагъэкIуэкI «Зи пIалъэр зэи имыкI» («Без срока давности») тхыгъэ зэпеуэр. Фэеплъымрэ щIыхьымрэ я илъэсым, 2020 гъэм, хуэгъэпса сочиненэхэр ятхынущ курыт школхэм щеджэ ныбжьыщIэхэм.
- Зэпеуэм хэтынущ 5 — 11-нэ классхэм щIэсхэр. Тхыгъэ лэжьыгъэм абыхэм щызэпкърахынущ 1941 — 1945 гъэхэм екIуэкIа Хэку зауэшхуэм ди къэралым и цIыхухэм щызэрахьа лIыгъэр къызыхэщыж темэ зыбжанэ. Апхуэдэхэщ мыхэр:
- — Хэку зауэшхуэм и илъэсхэр ди къалэм (къуажэм) и тхыдэм къызэрыхэнар;
- — Ди жылэм (школым) Хэку зауэшхуэм и музей къызэрыщызэIуахам теухуауэ;
- — Хэку зауэшхуэм хэта, фронтым и щIыбагъ къыдэта ди лъахэгъухэм зэрахьа лIыгъэр;
- — Ди тхакIуэхэм (усакIуэхэм) я творчествэм Хэку зауэшхуэм и лъэхъэнэр къызэрыхэщыжыр;
- — Хэку зауэшхуэм и илъэсхэм ятха е абы хуэгъэпсауэ иужькIэ къагъэщIа макъамэхэр, уэрэдхэр, ятха тхылъхэр, траха художественнэ, документальнэ фильмхэр;
- — Хэку зауэшхуэм теухуа хъыбархэр зэхуэзыхьэсыж ныбжьыщIэ къэлъыхъуакIуэ гупхэм я лэжьыгъэр.
- Зэпеуэр IыхьитIу зэщхьэщыхауэ екIуэкIынущ — щIыналъэ Iыхьэрэ къэралпсо Iыхьэу. Япэм къызэщIеубыдэ 2019 гъэм и дыгъэгъазэ — 2020 гъэм и щIышылэ мазэхэр. Абы нэхъыфIу къыщалъыта тхыгъэхэр хэтынущ етIуанэ Iыхьэм. А Iуэхум хухахащ 2020 гъэм и мазае мазэ псор. Иужьрей зэпеуэм щытекIуауэ къалъытэнущ сочиненэ нэхъыфI дыдэу 8-р зи къалэмыпэм къыпыкIа школакIуэхэр. Ахэр Москва щагъэлъэпIэнущ, щIыхь тхылъхэр, фэеплъ саугъэтхэр къратынущ, я тхыгъэхэр зэрыт тхылъи иужькIэ къыдагъэкIынущ. КъищынэмыщIауэ, а школакIуэхэм балигъ зырыз я гъусэу Iэмал яIэнущ ТекIуэныгъэ Иным хуэгъэпса пэкIум Москва и Ут Плъыжьым щыхэтыну.
- Зэпеуэм теухуа хъыбархэм щыгъуазэ зыщыхуэфщI хъунущ [email protected] республикэ сайтым.
- КЪАРДЭН Тамбий.