Лыжэ къежэхыгъуэ лъэхъэнэщIэр къызэIуах
2019-12-17
- Дыгъэгъазэм и 14-м Iуащхьэмахуэ лъапэ къыщызэIуахащ бгы-лыжэ къежэхыгъуэ лъэхъэнэр. Мыпхуэдэ Iуэху дахэр ирагъэкIуэкIын зэрыщIадзэрэ мы гъэм илъэс 50 ирикъуащ. «Азау» хуейм деж щрагъэкIуэкIа гуфIэгъуэ зэхыхьэм хэтащ Урысейм и Президентым и полномочнэ лIыкIуэу КИФЩI-м щыIэ Матовников Александррэ Къэбэрдей-Балъкъэр Республикэм и Iэтащхьэ КIуэкIуэ Казбекрэ.
- Махуэшхуэм кърихьэлIат Къэбэрдей-Балъкъэрым щыпсэухэм къищынэмыщIа, Екатеринбург, Красноярск, Краснодар, Мэхъэчкъалэ, Владивосток, Улан-Удэ, Ростов къикIа зыгъэпсэхуакIуэ мини 4-м щIигъу.
- — Мы гъэм илъэс тхущI ирокъу Iуащхьэмахуэ дэкI кIапсэ гъуэгур зэрырагъажьэрэ. Шэч къытетхьэркъым зэман гъунэгъум Iуащхьэмахуэ лъапэ зыгъэпсэхупIэм зыужьыныгъэ зэригъуэтынум. ФыкъакIуэ, зыщывгъэпсэху мы щIыналъэ дахэм, — жиIащ Матовниковым. ЛыжэкIэ къэжыхьынымрэ бгым дэкIыным-рэ щыхуагъасэ республикэ сабий спорт школым иIэ зэфIэкIхэр хьэщIэм къыхигъэща нэужь, еджапIэм щIэс ныбжьыщIэхэр псом япэу лыжэкIэ бгым кърагъэжэхащ.
- КIуэкIуэ Казбек жиIащ Iуащхьэмахуэ бгыр насы-пым и Iуащхьэу къызэралъытэр. Ар зызыгъэпсэхухэм ехъуэхъуащ я унагъуэхэм мамырыгъэрэ насыпрэ илъыну. Сабий спорт школым и гъэсэнхэм ехъулIэныгъэшхуэхэр къагъэлъэгъуэну зэригуапэр къыхигъэщри, КъБР-м и Iэтащхьэмрэ Матовниковымрэ абыхэм саугъэту иратащ бгым къызэрежэх лыжэщIэхэр.
- — Кавказ Ищхъэрэм и IуэхухэмкIэ министерствэм фIыщIэ хуэсщIыну сыхуейщ, Iуащхьэмахуэ лъапэ зыгъэпсэхупIэм, къапщтэмэ, зэрыщыту Къэбэрдей-Балъкъэрым зедгъэужьынымкIэ зэпымыууэ дэIэпыкъуэгъу къызэрытхуэхъум папщIэ. НыбжьыщIэ цIыкIухэм нобэ сынывохъуэхъу мыпхуэдэу жыджэру, спортым фыщефIакIуэу фыкъэтэджыну. ХьэщIэхэми бысымхэми дынывохъуэхъу нобэрей махуэмкIэ, — жиIащ КIуэкIуэ Казбек.
- Урысейм и пощтым а махуэм хуигъэхьэзырат Къэбэрдей-Балъкъэрым и щIыпIэ нэхъ дахэ дыдэхэр зытет открыткэщIэхэр. ЦIыхухэм Iэмал яIащ я Iэр щIадзу тыгъэ зыхуащIыну зыхуейхэм пощткIэ ахэр хуаутIыпщыну. КъБР-м и Iэтащхьэри а Iуэхум хэтащ.
- Махуэшхуэр ягъэдэхащ щIыналъэм и артистхэм, «Кабардинка» къэрал академическэ ансамблым и къэфакIуэ Дер Мухьэмэд, «Балкария» къэрал IуэрыIуатэ-этнографие ансамблым хэтхэу Жабоевэ Анжелэрэ Анаев Муратрэ.
- Балигъхэри ныбжьыщIэхэри зэхьэзэхуэ зэмылIэужьыгъуэхэм хэтащ. Лыжэрэ сноубордкIэ къэзыжыхьхэм папщIэ спорт зэпеуэ зэхуэмыдэхэр ирагъэкIуэкIащ. Абы щытекIуахэм саугъэт лъапIэхэр иратащ, «Iуащхьэмахуэ зыгъэпсэхупIэ» акционер зэгухьэныгъэм, «Альпиндустрия» тыкуэным къабгъэдэкIыу. Къызэхуэсахэр еплъащ Iуащхьэма-хуэ и теплъэр мылым къызэрыхаIущIыкIми.
- Къыхэгъэщыпхъэщ а махуэм сыхьэт 11-м къыщыщIэдзауэ кIапсэ гъуэгухэр пщIэншэу зэрагъэлэжьар. Апхуэдэуи зыгъэпсэхуакIуэхэр еплъащ къегъэлакIуэхэр бгым зэгъусэу екIуу къызэрежэхам. Пщыхьэщхьэм цIыхухэм Iэмал яIащ бгым къызэрежэхыну Iэжьэхэр пщIэншэу къащтэну. Iуащхьэмахуэ лъапэ бгы-лыжэ лъэхъэнэр гъатхэпэм ику пщIондэ щокIуэкI. ИлъэсыщIэ зыгъэпсэхугъуэхэм ирихьэлIэу абы зыщагъэпсэхуну хуагъэфащэ махуэ къэс цIыху мини 3-м нэблагъэм.
- Махуэшхуэр зэхуащIыжащ хьэрэкIытIэхэмкIэ.
- БАГЪЭТЫР Луизэ.
- Сурэтыр Каюдин Евгений трихащ