Шэр зэттын дгъуэтыркъым
2019-09-17
- Хьэмащэ щIыпIэм щыIэ штабым и унафэщI Шурдым Борис ди гъусэу а Iэшэлъашэм щыIэ Iэбгъэ зыбжанэм дыкIуат. Абыхэм ящыщ зыщ Iуащхьэ мылъагэм и лъабжьэм зыщIэзыгъэзэгъа хэщIапIэр.
- Дыщынэсым, абдежым щыIэ ухуэныгъэхэм я гупэ къит псэупIэм зылI къыщIэкIащ. Ар, къызэрытщIамкIэ, Зеикъуэ къуажэм щыщ Бэлей Арсенщ.
- — Дызыпэрыт IэнатIэр цIыхухэм зрамыпэсыж, я щхьэ трамылъхьэж хуэдэу щытщ мы зэманым. Ауэ, дэ дыкъапщтэмэ, нэгъуэщI лэжьыгъэ къыщIэтлъыхъуэн щымыIэу къысщохъу. Iэщ зыдохуэри, ди унагъуэр зэрытпIыжыр аращ. Шы бжыгъэ диIэщ. Жэм къыдош. Зыщэхунухэр къыдокIри, гъэшыр къуажэм ирыдогъэшэх. АрщхьэкIэ, пудыкIейуэщ абыхэм зэрытIахыр. Дэ дызэреплъымкIэ, Хьэмащэ дэт заводыр щIыпIэ администрацэм игъэлэжьэфынут. Заводым лажьэу щIидзэжатэмэ, дызыпэрыт IэнатIэми нэхъ мыхьэнэ иIэнут, — къыджиIащ Бэлейм.
- — Фэ къывэгъэщIылIа цIыхухэр дапщэ фыхъурэ, Арсен?
- — Си къуэшыр си гъусэщ. Дэ тIум, шыхъуэ жыпIэми, Iэхъуэ жыпIэми, цIыхуитху догъэлажьэ. Жэмхэм шэуэ жэщ-махуэм тонным нэблагъэ къащIыдош. Ауэ тхуэщэр килограмм 700-м нызэрыхьэсщ. Адрейр шкIэхэм ирыдогъэф. Къанэм кхъуей хыдох, Iэщыхъуэхэм ди шхын къыхокI.
- — Дэ, псалъэм папщIэ, Налшык щэбэт-тхьэмахуэ махуэхэм щызэхэт жармыкIэм докIуэри, абдежым шэ бащырбэр, литррэ ныкъуэрэ зэрыхуэр, тумэни 7-рэ соми 5-кIэ къыщыдощэху. Фэ дапщэ зэрыфщэр, Арсен?
- — ЗэрыфщIэщи, мы губгъуэм къыщыхъей удзхэр, дагъэ зыщIэлъым хуэдэщ, къэуат зиIэщ. Ахэр лIэужьыгъуищэм ноблагъэ. АтIэми, шатэщ зыхужыпIэну шэ гурыхьым, къабзэм щыщу зы литрыр сом 16-кIэщ зэрытхуэщэр. Ауэ щыхъукIи, шэ литрищым бензин литр къытхущIэкIыжу аращ. ЗэрыгурыIуэгъуэщи, жэмхэм къащIэтш ди IэдакъэщIэкIыр къуажэми къыщымыувыIэу къалэми нашэс. Дэри тыкуэнхэм зэзэмызэ дыщIохьэри, щытлъагъур догъэщIагъуэ: шэр ди деж щыпудми, абдежым щылъапIэщ. КъызыхэкIыр, зэрыжаIэщи, плъэкIмэ зэхэгъэкI. Апхуэдэм дауэ арэзы узэрытехъуэнур?!
- Ди псалъэмакъым Шурдым Борис къыхохьэ.
- — СызэреплъымкIэ, мыбдежым къыщыщIаш гъэшыр, и хущхъуагъэм къыхэкIыу, цIыхухэми заводхэми нэхъ лъапIэу ящэхун хуейт. ИкIи, сэ къызэрыслъытэмкIэ, абы теухуа унафэ ди къэралым къыщащтапхъэт. Бэлей зэкъуэшхэм я гугъу тщIымэ, зэрыцIыкIу лъандэрэ ахэр соцIыхури, я адэр зыпэры- та IэнатIэм пэрыувэжауэ аращ, я лэжьыгъэр я гум дыхьэу, я унагъуэхэри ирапIыжыфу апхуэдэщ. Дауи жыIи, Iэщ гъэхъуным, дахэу урилэжьэфмэ, урипсэуфынущ.
- — Iэщ зыгъэхъум къэралым ахъшэ ириту къекIуэкIащ. А лъэныкъуэмкIэ фи Iуэхур сыт зыIутыр, Арсен?
- — 2017 гъэм сом мелуани 2-рэ сом мин 300-рэ субсидиеу къыдитащ. АбыкIэ Iэщ нэхъ лъэпкъыфIхэм ящыщ бжыгъэ гуэр къэтщэхуащ, мэкъумэш техникэ зэдгъэпэщащ, ди жэмэщхэм языхэзым и щхьэр зэтхъуэкIащ, адрейм ейри къызэрыдгъэщIэрэщIэжын къытхудэхуащ.
- — Къэралым гъэш къэзышхэми ахъшэ ярет. А Iуэхум фыхиубыдакъэ?
- — Ар дэ къыдэхъулIэн папщIэ, шэр зэрытщэмкIэ тхылъ къытIэрыхьэн хуейщ. Ауэ дэ хэт апхуэдэ дэфтэр къыдэзытынур? Къэралым зэригъэув хабзэм тету шэр зэттын дгъуэтыркъым. Арат заводым нэхъ дыщIыхуейри. Апхуэдэу щытамэ, сэ къызэрыслъытэмкIэ, Iэщ гъэхъуным пыщIа цIыхухэм ящыщу нэхъыбэж мы къущхьэхъум къихьэнут.
- Тхыгъэри сурэтхэри КЪУМАХУЭ Аслъэн ейщ.