2019-07-23
- БэнэкIэ хуит
- Къэралым и чемпионатым къыщыхожаныкI
- Сочэ къалэ дэт «Айсберг» спорт уардэунэм щекIуэкIащ Урысейм бэнэкIэ хуитымкIэ и чемпионат. Абы щыбэнащ Къэбэрдей-Балъкъэрым и спортсменхэри.
- Зи хьэлъагъыр килограмм 92-м нэблагъэхэм я гупым и финал ныкъуэ зэпэщIэтыныгъэм ди лъэпкъэгъу Урыш Анзор къыхигъэщIащ иужькIэ чемпион хъуа дагъыстэн бэнакIуэ Жабраилов Алихъан. Финал цIыкIум 14:3-уэ Анзор щытекIуащ Осетие Ищхъэрэ-Аланием къикIа Нартикоев Радик икIи зэхьэзэхуэм и жэз медалыр къихьащ.
- Иджыри зы жэз медаль Къэбэрдей-Балъкъэрым къыхуихьащ зи хьэлъагъыр килограмм 74-м нэблагъэхэм я гупым щыбанэ БищIо Тимур.
- ЖЫЛАСЭ Замир.
- Дзюдо
- Медаль псоми щыщ яIэрохьэ
- Череповец къалэм мы махуэхэм щекIуэкIащ Урысейм и еджакIуэхэм дзюдомкIэ я IX гъэмахуэ спартакиадэ. Абы хэтащ къэралым и щIыналъэ 47-м къикIа, зи ныбжьыр илъэс 14 — 16-хэм ит щIалэ, хъыджэбз цIыкIуу 270-рэ.
- Къэбэрдей-Балъкъэрым и командэ къыхэхам зэхьэзэхуэм медаль зэмылIэужьыгъуи 3 къыщихьащ.
- Килограмм 81-м нэблагъэ зи хьэлъагъхэм я зэпэщIэтыныгъэм и кIэух зэIущIэм ди республикэм щыщ Гаев Омар щефIэкIащ хэгъэрей Неробов Марк икIи дыщэ медалыр зыIэригъэхьащ.
- Хъыджэбз цIыкIухэм я деж етIуанэ увыпIэр щиубыдащ Шормэн Элеонорэ (кг 40-м нэблагъэ). Зи хьэлъагъыр килограмм 48-м нэблагъэхэм я зэхьэзэхуэм жэз медалыр къыщихьащ Къанокъуэ Арианнэ.
- КЪЭХЪУН Бэч.