«Автозапчасть»-м и зи чэзу лъагапIэ
2019-10-19
- Хабзэ зэрыхъуауэ, Налшык и «Спартак» стадионым жэпуэгъуэм и 9-м щекIуэкIащ Къэбэрдей-Балъкъэрым и Iэтащхьэм и кубокыр къэхьыным ехьэлIа зэхьэзэхуэм и кIэух зэIущIэр. Абы щызэхуэзат Бахъсэн и «Автозапчасть»-мрэ «Тэрчымрэ».
- Къэбэрдей-Балъкъэрым футболымкIэ и чемпионатым пашэныгъэр щызыIыгъ командэхэр кубокым и финалми щызэрихьэлIат. Абы нэсын папщIэ бахъсэндэсхэм зэкIэлъхьэужьу хагъэщIат Псынэдахэ и «Родник»-р (3:0), Къэхъун и «Керт»-р (5:2, 5:1), Бабугент и «ЛогоВАЗ»-р (7:1, 5:2). Джылахъстэнейм и футболистхэр ефIэкIат Шэджэм и «Къундетейм» (2:0), «ХьэтIохъущыкъуейм» (1:1, 4:0), Прохладнэ и «Энергетик»-м (1:1, 2:1). Абы щыгъуэми «Автозапчасть»-р и хьэрхуэрэгъухэм дэни щытекIуамэ, «Тэрчым» ар къыщехъулIар нэгъуэщI щIыпIэхэрат.
- КъБР-м и Iэтащхьэм и кубокым и кIэух зэIущIэр хуабжьу гуащIэ хъуащ. Абы хухаха сыхьэтрэ ныкъуэми къыщIа-гъуа дакъикъэ щэщIми лъэныкъуэхэм бжыгъэр къахузэIухакъым. Апхуэдэу щыхъум, зэIущIэ нэужь пенальтихэм еуэн хуей хъуащ. Метр пщыкIузым и деж щыту Бахъсэн и «Автозапчасть»-м и футболистхэм нэхъ Iэзэу гъуэр хагъэщIащ икIи 5:4-уэ текIуэныгъэр зыIэрагъэхьэри, кубокыр яхьащ.
- Хьэлэмэтращи, илъэситI ипэкIи мы командэхэр финалым щызэхуэзат. А лъэхъэнэм зэхьэзэхуэм зэреджэр Къэбэрдей-Балъкъэрым и кубокт. 2017 гъэм Налшык и «Спартак» стадионым щызэхэта кIэух зэIущIэми «Автозапчасть»-м «Тэрчыр» щыхигъэщIащ, абы щыгъуэм 3:2-уэ.
- Жыласэ Заурбэч.