Бацумрэ Бацэмрэ къахожаныкI
2019-09-17
- «Интер» (Черкесск) — «Спартак-Налшык» (Налшык) — 2:2 (1:1). Лермонтов. «Бещтау» стадион. ФокIадэм и 14-м. ЦIыхуи 150-рэ еплъащ.
- Судьяхэр: Васильченкэ (Мейкъуапэ), Мирошник (Ставрополь), Тибилов (Ардон).
- «Интер»: Байчорэ, Лазарев, Тюфяков (Далиев Дени, 69), Алборэ, Далиев Дауд, КIыщ, Митренкэ (Кучиев, 66), Сысуев (Гагиты, 86), Стуканов, Бацу (Джэрыджэ, 78), Столбовой.
- «Спартак-Налшык»: Щоджэн, КIэдыкIуей, Клышэ (Салахетдинов, 79), Сындыку, Ольмезов, Хьэшыр, Дэхъу, Iэпщацэ (Талабкэ, 90), Шаваев, Ашу (Машэжь, 71), Бацэ.
- Топхэр дагъэкIащ: Бацум, 12 (1:0). Бацэм, 17 (1:1). Бацэм, 62-пенальтикIэ (1:2). Бацум, 78 (2:2).
- Дагъуэ къыхуащIащ: Столбовой, Сындыкум, Далиев Дауд, Сысуевым.
- Иужь илъэс зыбжанэм Къэрэшей-Шэрджэсым профессиональнэ футбол командэ имыIауэ, мы гъэм къэунэхужащ. «Нартыр» «Интер»-кIэ яхъуэжами, гуапэщ дяпэкIэ ди къуэш-хэм дазэрыщыхуэзэнур Урысей Федерацэм и чемпионатым ипкъ иткIэ зэхаублэ зэхьэзэхуэхэм. Пэжщ, черкесскдэсхэм зыкъыдагъэлъэгъуакIэщ икIи, къэралым и кубокыр къэхьыным теухуауэ екIуэкI зэпеуэм и 1/64-нэ Iыхьэм хиубыдэу, мазэ ипэкIэ Налшык къакIуэри, ди щIалэхэр къыщыхагъэщIащ. Абы къыпищэну щIэхъуэпсу щэбэт кIуам «Интер»-р утыку къыщихьащ Лермонтов и «Бещтау» стадионым, езым и джэгупIэ губгъуэр зэхьэзэхуэм иджыри зэрыхуэмыхьэзырым къыхэкIыу.
- Черкесск къикIахэм загъэхэгъэрейти, зэIущIэр нэхъ тегушхуауэ ирагъэжьащ. Абыхэм я текъузэныгъэр «Спартак-Налшыкым» зэрыхуэшэчар дакъикъэ пщыкIущщ, Бацу Iэюб жыжьэу щыту лъэщу къеуэхукIэ. Ди гъуащхьэтет Що-джэн Борис абы хуэмыхьэзыру къыщIэкIащ икIи топыр гъуэм дигъэкIащ.
- «Интер»-м и Бацум налшыкдэсхэм я Бацэр къыпагъэуващ. Дакъикъитху дэкIауэ арат, угловой къыхата иужькIэ, Къантемыр бжыгъэр зэхуэдэ щищIыжам.
- ПсынщIэ дыдэу Iуэхур зэрагъэтэмэмыжыфам ди щIалэхэм къаруущIэ къахилъхьащ. Хэгъэрейхэр абы хуэмыхьэзырыщэу къыщIэкIащ икIи, я гъуащхьэтетыр мыхъуатэмэ, бжыгъэшхуэ-кIэ къызэрыхагъэщIэнур хьэкът.
- Зы сыхьэт хуэдизкIэ лъэныкъуэхэр ерыщу зэпэщIэтауэ КIэдыкIуей Хьэким зричащ икIи, я хьэрхуэрэгъу зыбжанэм яIэщIэкIауэ гъуэм щыхуэкIуэм, ираудащ. Пенальти! Ар Бацэ Къантемыр Iэзэу игъэзэщIащ, мыгъэрей зэхьэзэхуэм щыдигъэкIа топхэм я бжыгъэр 8-м нигъэсу.
- Иужь зэIущIэхэм текIуэныгъэр зэрызыIэщIагъэкIар зыщIэж Трубицин Сергей и гъэсэнхэм ар быдэу яхъумэну мурад ящIащ икIи я ехъулIэныгъэр щIагъэбы-дэн папщIэ, ебгъэрыкIуэныгъэ лъэщхэм къыпащэщ. Зыкъомрэ «Интер»-р къригъэлащ я гъуащхьэтетым. АрщхьэкIэ абыи зыри хуещIакъым Iэпщацэ Марат къыщыхэжаныкIам. Топыр хэзымыбжар судьяхэращ, нэхъапэIуэкIэ футбол хаб-зэр налшыкдэсхэм къызэпаудауэ къалъытэри.
- А махуэм Бацэмрэ Бацумрэ я зэпэщIэтыныгъэр имыухауэ къыщIэкIащ. Джэгур иухыным щIагъуэ къэмынэжауэ, Iэюб апхуэдизу лъэщу ди гъуэм къеуати, Щоджэныр зэрыпэлъэщын щыIэтэкъым.
- Аргуэру текIуэныгъэр зэраIэщIэкIыр зи гум щIыхьа «Спартак-Налшыкым» и футболистхэр къыхагъэщIэпэнми зымащIэщ иIэжар. Абы щыгъуэми Хьэшыр Алан очкоищыр къытхуихьыфыну щытащ, топым щеуэм и лъакъуэхэр зэхэзэрыхьащ армыхъумэ. Арати, лъэныкъуэхэр зэрытемыгъэкIуауэ, 2:2-уэ, зэбгъэдэкIыжащ. Налшыкдэсхэм я дежкIэ ар зэкIэлъхьэужьу ещанэщ.
- Зэхьэзэхуэм зэрыщIидзэрэ бжьыпэр зыIыгъа Мейкъуапэ и «Дружба»-м тепщэныгъэр зыIэщIигъэкIащ, Адыгейм и къалащхьэм къэкIуа Дон Iус Ростов и СКА-р зригъэфIэкIри. Ешыгу Сэфарбий и гъэсэнхэр мы зэпеуэм япэу къыщыхагъэщIауэ аращ. Абы япэ къищащ Астрахань и «Волгарь»-р.
- Щэбэт кIуам, икIэм-икIэжым, текIуэныгъэм и IэфIагъыр зыхищIащ зэхьэзэхуэ блэкIам япэ дивизионым пэгъунэгъуа Краснодар и «Урожай»-м. Ар иджы зыщIэбэныр зыхэт гупым хамыгъэкIынырщ.
- АдэкIэ фыщыдгъэгъуэзэнщ етIуанэ дивизионым и «Ипщэ» гупым щекIуэкI зэхьэзэхуэм ипкъ иткIэ иужьу зэхэта джэгугъуэм кърикIуа бжыгъэхэм: «Динамо-Ставрополь» (Ставрополь) — «Алания» (Владикавказ) — 1:3, «Мэхъэчкъалэ» (Мэхъэчкъалэ) — «Черноморец» (Новороссийск) — 2:2, «Мэшыкъуэ-КМВ» (Псыхуабэ) — «Краснодар-3» (Краснодар) — 1:0, «Урожай» (Краснодар) — «Биолог-Новокубанск» (Прогресс) — 1:0, «Волгарь» (Астрахань) — «Анжи» (Мэхъэчкъалэ) — 2:0, «Дружба» (Мейкъуапэ) — СКА (Дон Iус Ростов) — 2:3, «Спартак-Владикавказ» (Владикавказ) — «Легион-Динамо» (Мэхъэчкъалэ) — 1:1.
- Урысей Федерацэм футболымкIэ и етIуанэ дивизионым и «Ипщэ» гупым щекIуэкI зэхьэзэхуэм хыхьэ къыкIэлъыкIуэ зэIущIэр фокIадэм и 21-м зэхэтынущ. А махуэм «Спартак-Налшыкым» и стадионым къыщригъэблэгъэнущ «Спартак-Владикавказ» командэр.
- Жыласэ Заурбэч.