Ууеймрэ умеймрэ
2019-08-15
- Японхэр хущIокъу Курил Ипщэхэм я хытIыгухэр езыхэм яйуэ дунейм къыщагъэхъуну, хэбгъэзыхьмэ, езыхэми я фIэщ хъужа хуэдэщ. Дэтхэнэ дипломатми пщэрылъ щащIащ а хытIыгухэр Японием Iэрыхьэжыным сыт и лъэныкъуэкIи щIэбэныну. Премьер-министр Абэ и адэм и кхъащхьэм и деж тхьэ щиIуащ мы Iуэхур «зэфIихыну». АрщхьэкIэ, зэрыгурыIуэгъуэщи, умейр ууейуэ жыпIэми, ар ууей хъуркъым. Мис зы щапхъэ. 2020 гъэм Японием щекIуэкIыну Олимп джэгухэм и пэ къихуэу олимп мафIэр къыщрахьэкIыну щIыпIэхэм я картэ къыдагъэкIащ, абы Урысейм и Кунашир, Итуруп, Шикотан хытIыгухэр, адрейхэр Японием и щIыналъэ хуэдэу къыщыгъэлъэгъуащ.
- Илъэс куэд хъуауэ Токио къегъэув а хытIыгухэр езым иратыжыну. Уеблэмэ, лъэныкъуэхэм мамыр зэгурыIуэныгъэ зэращIылIэн папщIэ ар лъэпощхьэпоуэ къелъытэ — ЕтIуанэ дунейпсо зауэр зэриухрэ къэралитIми Iэ традзакъым мамыр зэгурыIуэныгъэм. АрщхьэкIэ Урысейм къегъэув япэщIыкIэ а зэгурыIуэныгъэм Iэ традзэну, иужькIэ а хытIыгухэм ятеухуа зэпсэлъэныгъэхэм щIадзэжын хуейуэ.
- Iуэхур здэщыIэри щIыналъэр зеин хуейм и закъуэкъым. Курилхэр бдзэжьейкIэ фIэкIа нэгъуэщIкIэ къулейкъым. ЩIышхуэ дыдэ зыIыгъ Урысейм и дежкIэ ахэр зы IэпапIэ закъуэщ. АрщхьэкIэ хытIыгухэр Японием зэрыIэрыхьэжу, ахэр США-м къигъэсэбэпынущ УФ-м и КъуэкIыпIэ Жыжьэм и къарухэм къакIэлъыплъын папщIэ. Абы шэч хэлъкъым: Токиорэ Вашингтонрэ быдэу зэпыщIащ икIи япэм иужьрейм хуищIэнущ зыхуей псори. Уеблэмэ Японием къыщыдэкI газетхэм щIауфэркъым Курилхэм Штат Зэгуэтхэм я дзэ базэхэр къызэрыщыхутэнур. АтIэ, Москва ар идэн?!
- — Японием куэд щIауэ зэхегъэгъуащэ езым и гъунапкъэхэр, — къыхегъэщхьэхукI УФ-м ЩIэныгъэхэмкIэ и академием КъуэкIыпIэ ЖыжьэмкIэ и институтым Японием егъэщIылIа къэхутэныгъэхэмкIэ и центрым и Iэтащхьэ Кистанов Валерий. къэралышхуэ тIощIым я унафэщIхэр Осакэ щызэхуэсыным ипэ къихуэу абы картэ къыдигъэкIащ Курилхэр езым ейуэ къыщыгъэлъэгъуауэ. Си гугъэщ Урысейм НэгъуэщI къэрал IуэхухэмкIэ и министерствэм иджы къэхъуар жэуапыншэу къимыгъэнэну.
- Ар захуэу къыщIэкIащ. УФ-м и МИД-м и лэжьакIуэ Захаровэ Марие журналистхэм яжриIащ:
- — Ди жагъуэ зэрыхъунщи, Токио хущIокъу Iуэхум и щытыкIэр зэрихьэкIыну икIи Курил хытIыгухэр Урысейм фIэкIыпIэ имыIэу зэрейм шэч къытригъэхьэну. Дэ къыдолъытэ абы илэжьхэр къызэремызэгъыр нэм къыщIэуэу.