Узыншагъэрщ псом япэр
2019-08-15
- Бжыгъэхэм ятепщIыхьмэ, зэрыщыту Кавказ Ищхъэрэм терапевт 4319-рэ щолажьэ. Урысейм Узыншагъэр хъумэнымкIэ и министерствэм къипщытащ ахэр щIыналъэхэм зэрыщытегуэшар. Зи гугъу тщIы IэщIагъэлIхэр щынэхъыбэщ Дагъыстэнымрэ (1342-рэ) Ставрополь краймрэ (986-рэ). Абыхэм якIэлъокIуэ Шэшэныр (580-рэ), Осетие Ищхъэрэ — Аланиер (456-рэ), Къэбэрдей-Балъкъэрыр (405-рэ). Ингушымрэ Къэрэшей-Шэрджэсымрэ щынэхъ мащIэщ — зэрызэкIэлъыкIуэм хуэдэу 311-рэ, 257-рэ.
- АрщхьэкIэ, цIыху минипщI къэс яхуэзэр къэплъытэмэ, псоми япэ итщ Ингушыр — IэщIагъэлIи 9,39-рэ яхуозэ. ЕтIуанэ, ещанэ увыпIэхэм щытщ Осетие Ищхъэрэ — Аланиемрэ (8,48-рэ) Къэрэшей-Шэрджэсымрэ (7,15-рэ). КъакIэроху Шэшэныр (6,46-рэ), Дагъыстэныр (6,16-рэ), Къэбэрдей-Балъкъэрыр (6,15-рэ). Ставрополь крайм цIыху минипщI къэс щахуэзэр IэщIагъэлIи 4 къудейщ.
- Зэрытлъагъущи, мащIэIуэщ. Апхуэдэ дыдэу щытыкIэр нэхъ гугъуж ещI зи гугъу тщIы IэщIагъэлIхэри, адрей дохутырхэри жылагъуэхэм зэхуэдэу зэрытемыгуэшам. Медицинэм трагъэкIуадэм къыдагъэхуэн мурадкIэ, къуажэхэм щызэхуащIыжащ участкэ сымаджэщхэр. Абыхэм япIэкIэ щIыпIэ пхыдзахэм къыщызэIуахащ фельдшер-акушер пункткIэ зэджэхэр. АрщхьэкIэ, ахэр япэлъэщрэ я пщэ далъхьа къалэнхэм? Абы и гугъу тщIыххэнкъыми, я лэжьыгъэр зыхуэунэтIахэри зэIубзкъым. Мис зы щапхъэ закъуэ. Бахъсэн районым щыщ Куба къуажэм зауэ нэужьым район сымаджэщ дэтащ. Абы и унэр СССР-м и Iэтащхьэ Сталин Иосиф и зэманым щыIа архитектурэм тету яухуат: колоннэхэр щIэгъэкъуауэ, блынхэм тхыпхъэщIыпхъэхэр хэщIыхьауэ. Райцентрыр дахыжа иужь, абы и мыхьэнэр нэхъ цIыкIу хъуащ — участкэ сымаджэщым хуэкIуащ. Мыбы щылажьэрт терапевтитI, нэгъуэщI IэщIагъэ зиIэ дохутырхэр. Езы сымаджэщым екIуалIэрт къуажэ Iэгъуэблагъэхэм щыщхэри. Иджы къатитIу зэтет унэшхуэр нэщIщ, дохутырхэри щыплъагъунукъым. Мис аращ емыгупсысу ирагъэкIуэкI «зэхъуэкIыныгъэхэм» дызыхуашар.