ЦIыху 82-м унэ къалъос
2019-03-23
- Гъатхэпэм и 21-м Налшык къалэ щекIуэкIащ КъБР-м и Iэтащхьэм и къалэнхэр пIалъэкIэ зыгъэзащIэ КIуэкIуэ Казбек, УФ-м и МВД-м Кавказ Ищхъэрэ федеральнэ округым щиIэ управленэм и унафэщI, полицэм и генерал-лейтенант Бачурин Сергей, УФ-м и Президентым полномочнэ лIыкIуэу ди щIыналъэм щиIэм и аппаратым и инспектор нэхъыщхьэ Ткачёв Евгений, КъБР-м и Парламентым и лIыкIуэ Кривко Михаил, КъБР-м къэрал кIуэцI IуэхухэмкIэ и министр Ромашкин Игорь, къулыкъущIэхэмрэ унафэщIхэмрэ зыхэта зэIущIэ дахэ.
- А махуэм КъБР-м и МВД-м и лэжьакIуэ, ветеран 82-м я унэщIэхэм я IункIыбзэIуххэр иратыжащ. Къати 9-у зэтет, сыт и лъэныкъуэкIи зыхуей хуэгъэза унэр Московскэ уэрамым хеубыдэ.
- — Урысей Федерацэм къэрал кIуэцI IуэхухэмкIэ и министр Колокольцев Владимир и цIэкIэ сынывохъуэхъу, — жиIащ Бачуриным, дауэдапщэр къыщызэIуихым. — Нобэ фи махуэшхуэщ, полицэм и лэжьакIуэхэм псэупIэ ират. ИлъэсиплI и пэкIэ унафэ къащтауэ щытащ полицэм и лэжьакIуэхэмрэ ветеранхэмрэ унэ хуащIыну. УФ-м и МВД-м а Iуэхугъуэм хухихат сом мелуан 330-рэ. Иджы мис, нобэрей зэманым къигъэув мардэхэм тету яухуа унэр хьэзырщ.
- КъБР-м и Iэтащхьэм и къалэнхэр пIалъэкIэ зыгъэзащIэ КIуэкIуэ Казбек къыщыпсалъэм къыхигъэщащ цIыхум и псэупIэ щхьэхуэ иIэжыным мыхьэнэшхуэ зэриIэр, абы куэд зэрыпщигъэпсынщIэр.
- — Мы унэр зыхуаухуа цIыхухэр къэралым илъэс куэдкIэ хуэлэжьащ, языныкъуэхэм нобэр къыздэсми къулыкъу ящIэ — абыхэм шынагъуэншэу дыпсэуным къаруушхуэ трагъэкIуадэ. А лэжьыгъэ мытыншым пэкIуэжу ахэр псэупIэкIэ къызэдгъэпэщыныр ди къалэнщ. АдэкIи фыузыншэу, фи къару илъу, фи IэнатIэм ехъулIэныгъэхэр къыщыфхьу фыпсэуну си гуапэщ, — жиIащ КIуэкIуэм.
- Полицэм и генерал-лейтенант Ромашкин Игорь зэрыжиIамкIэ, иджы КъБР-м и МВД-м и лэжьакIуэу псэупIэ зратын хуейхэм я бжыгъэр тIукIэ нэхъ мащIэ хъуащ зэуэ.
- — Иджыри мыпхуэдэ унитI и кIэм нэдгъэсын хуейуэ яубзыхуащ. Ахэр зэрынэтщIысыну мылъкур къэралым тхухихагъэххэщ. Ар зэфIэкIрэ унэхэр ттыжмэ, псэупIэ хуэныкъуэу чэзум щытхэр зэтекIыпэнущ, — къыхигъэщащ Ромашкиным.
- АдэкIэ унагъуэ 82-м я унэ IункIыбзэIуххэр иратыжащ, къулыкъущIэхэм унэр зыухуа лэжьакIуэхэм фIыщIэ псалъэкIэ зыхуагъэзащ, я пщэ къыдалъхьа лэжьыгъэр нэсу, и чэзум зэрызэфIагъэкIам папщIэ.
- Унэ зратахэм къабгъэдэкIыу зэIущIэм и кIэм къэпсэлъащ полицэм и полковник Кърымыкъуэ Заур. Абы къулыкъущIэхэмрэ унафэщIхэмрэ фIыщIэ яхуищIащ гулъытэ къызэрыхуащIам папщIэ.
- Фырэ Анфисэ.