IуэхуфIхэм саугъэткIэ поджэж
2018-08-14
- «МИР» («ЩIалэгъуалэ — Жэрдэм — Зыужьыныгъэ») урысейпсо щIалэгъуалэ жылагъуэ зэгухьэныгъэм, хабзэ хъуауэ, ирегъэкIуэкI «МИР-м и саугъэтыр» зыхуэфащэхэм щарит гуфIэгъуэ зэIущIэ. Иджырейр 2018 гъэм щэкIуэгъуэм и 18-м къызэрагъэпэщы- нущ.
- «МИР-м и саугъэтым» и къалэн нэхъыщхьэр IуэхуфIхэр зи IэрыкI, фIы щIэныр зи гъащIэ мардэу псэу, мамырыгъэмрэ зэгурыIуэныгъэмрэ зыгъэнэхъапэ цIыхухэр зэгъэуIунырщ, абыхэм я пщIэр жылагъуэм къыщыIэтынырщ. Апхуэдэу саугъэтымкIэ къагъэлъагъуэ ди къэралым и зэIузэпэщыныгъэм хьэлэлу, псэ къабзэу хуэлажьэ цIыхухэм гулъытэ хэха, щIыхь яхуэщIын зэры- хуейр.
- ЗэрытщIэщи, УФ-м и Президент Путин Владимир и жэрдэмкIэ, 2018 гъэр ягъэуващ Волонтёрхэм я илъэсу. Абы къыхэкIыу мыгъэрей «МИР-м и саугъэтыр», жылагъуэм мыхьэнэ щызиIэр, деIыгъ Президент грантхэм я фондым икIи Урысей Федерацэм и щIыналъэ 60-м щIигъум щолажьэ. Абы хохьэ ди республикэри.
- Саугъэтыр зыхуагъэфэщэну IуэхуфIхэр унэтIыныгъи 8-уэ зэщхьэщыхащ:
- «ХъыбарыфIхэр» саугъэтыр хуагъэфащэ хъыбарегъащIэ IэнатIэхэм я лэжьакIуэхэмрэ блогерхэмрэ ящыщу ди къэралым и цIыхухэм зэфIах IуэхугъуэфIхэм тепсэлъыхьхэм, ди псэукIэр зэрефIакIуэм тещIыхьа хъыбархэр жылагъуэм щызэлъэщIысыным хущIэкъухэм.
- «Сыт щыгъуи ипэкIэ кIуэтэн» саугъэтыр ират хабзэщ блэкIа илъэсхэм лэжьыгъэфIхэр зэфIэзыха псапащIэ, жылагъуэ зэгухьэныгъэхэм.
- «Жэрдэм узыншэ» саугъэтыр хуагъэфащэ цIыхум и узыншагъэр, гъащIэр езыгъэфIакIуэ проектхэр утыку изыхьэхэм, ахэр пхызыгъэкIхэм.
- «Экологие жэуаплыныгъэ» саугъэтыр ират щIыуэпсыр хъумэным хуэгъэпса проектхэмрэ Iуэхугъуэхэмрэ зыгъэнэхъапэхэм.
- «Апхуэдэу щытми» саугъэтыр хуагъэфащэ зи узыншагъэм сэкъат иIэ цIыхухэу, ауэ жыджэру, куэдым щапхъэ яхуэхъуу гъащIэм хэтхэм, IуэхугъуэфI куэд зыхузэфIэкIхэм.
- «ЛIыхъужьыгъэ» саугъэтыр ират 2016 — 2018 гъэхэм къриубыдэу хахуагъэ зыпылъ Iуэхугъуэ зылэжьахэм.
- «Гуп узыншэ» саугъэтыр хуагъэфащэ волонтёр Iуэхухэр гупу зэфIэзых коммерческэ IэнатIэхэм.
- «ЦIыхубэ саугъэт» фIэщыгъэр зиIэр ират IуэхугъуэфI зэфIахам къыпэджэжу ИнтернетымкIэ нэхъыбэм Iэ зыхуаIэтахэм.
- «МИР-м и саугъэтыр» зратхэм яхэхуэн папщIэ зэпеуэм узэрыхэтынумкIэ лъэIу тхылъ ебгъэхьын хуейщ премиямира.мы-мир.рф сайтым. Дэфтэрыр ебгъэхь хъунущ 2018 гъэм фокIадэм и 12 пщIондэ.
- ТАМБИЙ Линэ.