Топ зэрыджэгун хуейр ирагъэлъагъу
2018-08-14
- «Академия» (Дон Iус Ростов) — «Спартак-Налшык» (Налшык) — 1:3 (1:2). Батайск. ДЮСШ №2-м и стадион. ШыщхьэуIум и 12-м. ЦIыхуи 100 еплъащ.
- Судьяхэр: Качанов (Орёл), Селезнёв, Хромей (тIури Воронеж щыщщ).
- «Академия»: Будко, Федотов, Христис (Гордеочук, 70), Тиморгалеев, Далиев, Губочкин, Кузнецов, Кондрюков, Савин, Донсков (Крюков, 83), Ходунов (Белов, 70).
- «Спартак-Налшык»: Щоджэн, Лелюкаев, Тебэрды, Ольмезов, КIэдыкIуей, Белоусов, Шаваев (Салахетдинов, 85), Михайлов (Iэпщацэ, 54), Мэшыкъуэ, Бажэ (Дэхъу, 90+3), Машэжь (Ашу, 90).
- Топхэр дагъэкIащ: Тебэрдым, 10 (0:1). Мэшыкъуэм, 32 (0:2). Кондрюковым, 45-пенальтикIэ (1:2). Бажэм, 65 (1:3).
- Дагъуэ къыхуащIащ Губочкиным, Дэхъум, Ашум, Гордеочук.
- Совет футболист цIэрыIуэ Понедельник Виктор и цIэр зезыхьэ топджэгу академиер Дон Iус Ростов и мызакъуэу, зэрыкъэралу щыцIэрыIуэщ. Абы щагъасэ къэкIуэну дахэ зиIэ щIалэщIэ куэд. «Спартак-Налшыкым» хэтхэм а ныбжьыщIэхэм вэсэмахуэ топджэгум и дерс ирагъэлъэгъуащ.
- ЗэIущIэм и япэ дакъикъэхэм щыщIэдзауэ налшыкдэсхэр ерыщу ебгъэрыкIуэу хуежьащ. Хэгъэрей щIалэщIэхэм ахэр зэрызэтраIыгъэфар дакъикъипщI къудейщ: Мэшыкъуэ Хьэчим угловой къыхита иужькIэ Тебэрды Тимур топыр щхьэкIэ гъуэм дигъэкIащ.
- «Спартак-Налшыкыр» абыкIи къызэтеувыIакъым. Ди щIалэхэм я ебгъэрыкIуэныгъэхэр зэрыпсынщIэт икIи шынагъуэ зыпылът. Мыгувэу Машэжь Ратмир бжыгъэр игъэбэгъуэфыну щытащ. Зы мэскъалкIэ абы «Акаде- мия»-м и гъуащхьэхъумэр зэран къыхуэхъуащ.
- 32-нэ дакъикъэм Мэшыкъуэ Хьэчим къызэхуэсахэм яригъэлъэгъуащ топ зэрыджэгун хуей щIыкIэр: и щIыбыр хуэгъэзауэ абы дахэ дыдэу гъуэр хигъэщIащ. Апхуэдэм зыкIи пэмыплъа хэгъэрейхэм я гъуащхьэтетыр хъеиххакъым.
- Загъэпсэххуным Iуэхур нэблэгъауэ Ольмезов Артур футбол хабзэр ди гъуэм пэмыжыжьэу къызэпиудащ. Пенальти. Ар къагъэсэбэпри, «академикхэм» зы топ къытхудагъэкIащ.
- Джэгум и етIуанэ Iы-хьэм топджэгум и дерсхэм къыпащащ. Ольмезовым аргуэру футбол хабзэр къызэпиудри, ди гъуэм пэмыжыжьэу ростовдэсхэр штрафной къеуащ. Топыр зымащIэкIэ хуэзакъым. Апхуэдэ дыдэ Iэмал ди щIалэхэм щагъуэтым, Бажэ Амир яригъэлъэгъуащ ар къызэрагъэсэбэп щIыкIэр: абы топыр гъуэм и плIанэ-пэ дыдэм дигъэтIысхьащ.
- 3:1-р хэгъэрей ныбжьыщIэхэм яхуэмыгъэзэкIуэжын бжыгъэт. Къэнэжа зэманым налшыкдэсхэм Iуэхур текIуэныгъэм тыншу хуагъэкIуащ. Абы и фIыгъэкIэ ди щIалэхэр ящыщ зы хъуащ зэхьэзэхуэм пашэныгъэр щызыIыгъ командитIым — «Спартак-Налшыкыр» «Чайка»-м къызэрыпикIуэтыр зы топкIэ нэхъыбэ къызэрыхудагъэкIаращ.
- АдэкIэ щыгъуазэ фыхуэтщIынщ Урысей Федерацэм футболымкIэ и етIуанэ дивизионым и «Ипщэ» гупым щыщIэзыдза зэхьэзэхуэм и етIуанэ джэгугъуэм кърикIуа бжыгъэхэм. Мис ахэр: «Спартак-Владикавказ» (Владикавказ) — «Ангушт» (Нэзрэн) — 0:0, «Легион-Динамо» (Мэхъэчкъалэ) — «Черноморец» (Новороссийск) — 0:1, «Динамо-Ставрополь» (Ставрополь) — «Чайка» (Песчанокопское) — 1:4, «Краснодар-3» (Краснодар) — «Урожай» (Краснодар) — 1:1, «Мэшыкъуэ-КМВ» (Псыхуабэ) — «Биолог-Новокубанск» (Прогресс) — 0:1, «Дружба» (Мейкъуа- пэ) — СКА (Дон Iус Ростов) — 2:1.
- ШыщхьэуIум и 18-м зэхэтыну къыкIэлъыкIуэ джэгугъуэр «Спартак-Налшыкым» блегъэкI. Тхьэма- хуитI дэкIмэщ ар зэхьэзэ-хуэм къыщыхыхьэжынур. ШыщхьэуIум и 26-м Краснодар къалэм ди щIалэхэр щаIущIэнущ абы и щIыпIэ командэм.
- Жыласэ Заурбэч.