Дунейр къэкIухьи, уи унэ ихьэж
2018-07-19
- А псалъэжьращ псом япэу сигу къэкIар Норвегием къикIыжу и щIыпIэ къэзыгъэзэжа Маликов Жэмалдин теухуа тхыгъэм сыкъыщеджэм.
- 90 гъэхэм Шэшэным щекIуэкIа зауэм и зэранкIэ и лъапэр пахын хуей хъуат мы щIалэм.
- Илъэс 15-м ит щIалэ цIыкIуитI, мэзым къэлэр къахьыну кIуауэ, лагъымым теувэри, зыр иукIат, Жэмалдин и лъапэр пиудат. Арати, и адэ-анэм я къуэр ягъэкIуащ Норвегием щыпсэу я благъэхэм деж. ИлъэсипщIкIэ щыIащ ар а къэралым, ауэ игу щигъэтIылъакъым. Улус-Керт къуажэм, и адэжь лъапсэм, къигъэзэжащ. «Сэ унагъуэу сыщыпсэуну абы сехъуэпсакъым, си бын щыспIынуи сыхуеякъым», — жеIэ Жэмалдин.
- Къигъэзэжри, жэм къаш зыбжанэ зэригъэпэщащ, гъэшым кърит хэхъуэр щIым хилъхьащ, бэджэнду къищтауэ иIэти. Абы джабэ нэкIуу гектар 75-рэ къищтэри, гектар 70-м мэзыдэ, адрейм къазмакъ, зэ, фейхоа щыхисащ.
- ЩIалэм и закъуэкъым, абы къыкъуэтщ Норвегием щыпсэу и благъэр. А тIум я мурадщ щIыр гектари 150-м нагъэсыну, Iэщым яшхын къызытрахыни яIэн папщIэ.
- — Жыгхэр къызэщIэувэхукIэ хэхъуэ диIэн папщIэ, жыг зэхуакухэм бжьыныху хэтсащи, къызэретхьэлIэжу зыщэхунуми дыгурыIуащ, — жеIэ Жэмалдин.
- Псалъэм къыдэкIуэу жыпIэнумэ, мэзыдэ мыгъэкъэбза килограммыр сом 600 и уасэщ, нэхъыщхьэращи, Краснодар крайм щыIэщ абы елэжьыж, Урысейми нэгъуэщI къэралхэми щызыщэ фирмэ. Мыри гъэщIэгъуэнщ: «Орехпром»-м къитым къегъэлъагъуэ мэзыдэрэ дэш-хуэу ди къэралым щащэм, абы щIэупщIэу иIэм зэрыхэхъуэр. Къыхэгъэщыпхъэщ: а шхыныгъуэм и нэхъыбэр хамэ къэралхэм къраш, нэгъабэ и закъуэ къашащ тонн мини 10-м нэс (доллар мелуан 50,8-рэ и уасэ).
- IэщIагъэлIхэм зэрыжаIэмкIэ, илъэситI хуэдэкIэ дэм и процент 50-р ди къэралым къыщагъэкIыжу хъунущ. Зэрытлъагъущи, дей хэзысэну хуейр тригъэгушхуэнущ мы шхыныгъуэм щIэупщIэшхуэ зэриIэм, ар узыншагъэмкIэ сэбэпу къалъытэу зи Iэнэ тезымыгъэкIхэм я бжыгъэм къызэрыхэхъуэм тепщIыхьмэ.