Битокъу Владимир и фильмыщIэ
2020-11-24
- «Псы куухэр» фильмымкIэ цIэрыIуэ хъуа, Налшык щыщ режиссёр щIалэ, Сокуров Александр КъБКъУ-м щригъэджахэм яз Битокъу Владимир «Мамэ, сэ сыкъэкIуэжащ» («Мамэ, я дома») зыфIища и фильмыщIэр хьэзыр зэрыхъуам кинопродюсер Роднянский Александр и инстаграм напэкIуэцIым щыгъуазэ дыщещI.
- Битокъу Владимир «Мамэ, сэ сыкъэкIуэжащ» зыфIища и фильмыщIэр нэдгъэсыну Iэмал дгъуэтащ гъэмахуэм. Уз зэрыцIалэм и зэранкIэ лэжьыгъэр зэпыдгъэун хуей хъури, мы илъэсым тхуэмыухын ди гугъащ. АрщхьэкIэ псори къыдэхъулIауэ, иджы монтажри и кIэм нос.
- Илъэс ныкъуэ ипэкIэ сытепсэлъыхьат а проектым. Иджыпсту аргуэру а лэжьыгъэри ар зыгъэхьэзыра IэщIагъэлI щIалэри фигу къызогъэкIыж. Сокуров Александр щэджащэм и гъэсэнщ Владимир. Мис а Къэбэрдей-Балъкъэрым къыщызэIуихауэ щыта, Бэлагъы Къантемыр, Золотухин Александр сымэ зыщIэса еджапIэрщ Битокъуми къиухар. Шэч къытезмыхьэжу гугъэ сиIэщ къыкIэлъыкIуэ илъэсым абыхэм ящыщ Коваленкэ Кири гу зэрызылъыдигъэтэнум.
- Битокъу Владимир Дудь Юрий деж щыфлъэгъуагъэнщ. И унагъуэр зыхуей хуигъэзэн папщIэ, япон шхыныгъуэхэр зыбгрызыш, зи гуращэхэмрэ мурадхэмкIэ хьэлэлу къыбдэгуашэ щIалэ жану ущрохьэлIэ абы а нэтыным. IэщIагъэлIхэм Битокъур къызэрацIыхур «Кинотавр» зэпеуэм «дебютхэм я нэхъыфI» саугъэт къызэрыщихьа «Псы куухэр» фильмымкIэт. Куэдым ягу ирихьат ар, сэри сахэту. Ди жагъуэ зэрыхъущи, кинопрокатым нэмыса, ауэ интернет IэмалкIэ узэплъыф, куэдым ягу ирихьа а лэжьыгъэр гулъытэншэу къэвмыгъанэ. АпхуэдизкIэ сигу ирихьат Владимир и фильмри, ВГИК-р къэзыух Изюмовэ Машэ диплом лэжьыгъэу игъэхьэзыра сценарий хъарзынэ дыдэр езгъэлъэгъуат. Владимири куэдрэ мыгупсысэу, гуащIэрэ и чэзу дыдэу зэхэлъхьа хъуа хъыбарыр къипхъуэтащ.
- Псори щекIуэкIыр Налшык пэгъунэгъу къуажэ гуэрщ. Автобусым дэс Тоня ЧВК-м (унейуэ къызэрагъэпэщ дзэ зэгухьэныгъэ) хэт и къуэ закъуэр Сирием щекIуэкI зауэм щаукI. ЦIыхубзым ар и фIэщ ищIын идэркъым, хьэдэр имылъэгъуауэ. И къуэм и гъусахэр щIалэр зэраукIам и щыхьэту къоув. Военкоматри, мылицэри, къалэ администрацэри къыдэIэпыкъуфыркъым анэм. Псори зэхигъэкIыну хуежьа Тоня езым и Iуэхур нэхъ гугъуж мэхъу. Махуэ гуэрым зауэлI фащэ щыгъыу цIыхубзым и бжэщхьэIум «уи къуэр сэращ» жеIэри щIалэщIэ гуэр къытоувэ. Абы къуажэм щекIуэкI гъащIэр къызэрегъэдзэкI.
- Роль нэхъыщхьэр къыпхуэмыцIыхуж Раппопорт Ксение игъэзэщIащ. СызэреплъымкIэ, ар актрисэ гъуэзэджэм и роль нэхъыфIхэм язщ. Абы и гъусэщ Борисов Юрий. КъыпхуэмыIуэтэн хуэдизкIэ и пIэ иува персонаж пэжщ. Зэрыфильмуи апхуэдэу хъуауэ сыщогугъ.
- Роднянский Александр,
- кинопродюсер.