ТIыгум трагъаплъэ
2020-08-08
- Урысей Федерацэм футболымкIэ и кубокыр къэхьыным теухуауэ зэхаубла зэхьэзэхуэм «Спартак-Налшыкым» къыщыщIидзащ финалым и 1/256-нэ Iыхьэм. Абы хьэрхуэрэгъу къыщыхуэхъуащ «ЕсэнтIыгу» командэр.
- Хуабжьу тфIэхьэлэмэтт «Спартак-Налшыкым» и фащэр ящыгъыу зэIущIэр щIэзыдзэнухэр хэт сымэми зэдгъэщIэну. Ахэр, дызэрыщыгугъауэ, фIы защIэу къыщIэкIащ. Зыгъэсэныгъэхэр щекIуэкIым фэбжь зэригъуэтам къыхэкIыу, ди коман- дэм и гъуащхьэтету иужь лъэхъэнэм дызэса Щоджэн Борис и пIэкIэ гъуэм дэуват Налшык къыщалъхуа икIи топ джэгуным зыщезыгъэса, иджыблагъэ къэзыгъэзэжа Антипов Антон.
- Гъуащхьэхъумэхэт Мэкъуауэ Залым, Шумахуэ Заур, Шаваев Магомет, КIэдыкIуей Хьэким. Губгъуэм и кум щыджэгухэрт Джатэрывэ Къазбэч, Iэпщацэ Марат, Пащты Руслан. Я хьэрхуэрэгъухэм я гъуэм ебгъэрыкIуэныр я пщэ дэлът Хьэшыр Алан, Ашу Мурад, Гугуев Магомед сымэ. Ахэр яхъуэжу джэгур ягъэлъэщыну сыт щыгъуи хьэзырт гъуащхьэтет Къардэн Имран, гъуащхьэхъумэхэу Ольмезов Артур, Дэхъу Ислъам, гъуащхьэхъумэныкъуэхэу Клышэ Артём, ХъутIэ Анзор, гъуащхьауэхэу Бахъсэнокъуэ Алихъан, Торосян Севадэ сымэ.
- ЗэIущIэр ирагъажьэри, дакъикъипщI дэкIауэ арат «Спартак-Налшыкыр» япэ щищам. Гугуев Маго- мед и закъуэу хьэщIэхэм я гъуэм пэгъунэгъуу къагъэнащ икIи, гугъу емыхьыщэу, бжыгъэр къызэIуихащ. КъыкIэлъыкIуа дакъикъэ зыхыблыр ардыдэм хурикъуащ, етIуанэ топри хьэщIэхэм яхудигъэкIын папщIэ.
- «ЕсэнтIыгум» и футболистхэм щхьэкъэIэтыпIэ ямыIэу захъумэжырт. Абыхэм къару куэд трагъэкIуэдэн хуей хъурт къыкIэлъыкIуэ топхэр къыхудамыгъэкIын папщIэ. АрщхьэкIэ загъэпсэхуу къихьэжа иужькIэ налшыкдэсхэр яхузэтеIыгъэжакъым. Ди щIалэхэм щапымылъэщыжыххэм хьэщIэхэм хабзэр щIэх-щIэхыурэ къызэпауд хъуащ. Абы и зэранкIэ я гъуащхьэхъумэхэм ящыщ зы джэгум къыхахуащ икIи тIэунейрэ я гъуэм пенальти кърагъэуащ. А тIури Iэзэу игъэзэщIащ «Спартак-Налшыкым» и капитану зэIущIэр езыгъэкIуэкIа Пащты Руслан. Абыхэм я зэхуакум Хьэшыр Алан топ дахэ дыдэ есэнтIыгудэсхэм яхудигъэкIащ.
- Ди щIалэхэм гукъыдэж ин яIэу зэIущIэр ирагъэкIуэкIащ. Нэрылъагъут ахэр топ джэгунымрэ абы къыщахь текIуэныгъэхэмрэ хуабжьу зэрыхуэзэшар. Бжыгъэр 5:0-у зэIущIэр иухащ. Хуеямэ, топ нэхъыбэжи хьэщIэхэм худагъэкIыфынут.
- Пэжщ, «Спартак-Налшыкыр» бжыгъэшхуэкIэ зэрытекIуам зэкIэ и зэфIэкIыр здынэсыр къигъэлъэгъуауэ къыпхуэлъытэнукъым. Сыти жыIи, «ЕсэнтIыгур» Iэзагъыр здынэсыр щызэхагъэкI гуп лъэщхэм ящыщкъым.
- Апхуэдэу щыт пэтми, Урысей Федерацэм футболымкIэ и кубокыр къэхьыным теухуауэ 2020 — 2021 гъэ-хэм екIуэкI зэхьэзэхуэм и пэщIэдзэ зэIущIэр ди щIалэхэм хъарзынэу къайхъулIащ. Шэч хэлъкъым абы тегушхуэныгъэ ин къазэрыхилъхьам. Футболым а Iуэхугъуэм мыхьэнэ пыухыкIа щиIэщ.
- ШыщхьэуIум и 19-м финалым и 1/128-нэ Iыхьэр зэхэтынущ. А махуэм «Спартак-Налшыкым» хьэрхуэрэгъу къыхуэхъунущ Ставрополь и «Динамо»-р. Абыи щытекIуэу къэралым и кубокыр къэхьыным ехьэлIа зэхьэзэхуэм адэкIэ щыкIуэтэну ди щIалэхэм дащогугъ.
- НэхъапэжкIэ, пщэдей, Урысей Федерацэм футболымкIэ и етIуанэ дивизионым и «Ипщэ» гупым 2020 — 2021 гъэхэм я зэпеуэм щыщIидзэнущ. Ди щIалэхэр Дон Iус Ростов къалэм щаIущIэнущ щIыпIэ СКА-м.
- Жыласэ Заурбэч.