Гъэсэныгъэрэ лIыгъэрэ зыхэлъ
2020-08-08
- Лэскэн районым хыхьэ Урыху къуажэм щыщ Чэгъэдухэ я унагъуэм хъыбар гуапэ къаIэрыхьащ я щIалэ Елдар къулыкъу щищIэ дзэ частым къикIыу.
- Ленинград областым хыхьэ Лугэ къалэм зэгъэпэщыжыныгъэ, зэфIэгъэувэжыныгъэ лэжьыгъэхэмкIэ и 69-нэ батальон щхьэхуэр зыхыхьэ войсковой часть №63452-м и командир Чекамисов Ю. и Iэр зыщIэлъ фIыщIэ тхыгъэр къыщIедзэ мы псалъэхэмкIэ: «Рядовой Чэгъэду Елдар Леонид и къуэм хуэгъэза фIыщIэ тхыгъэ». Ар абы къыхуагъэфэщащ зыхурагъэджахэр IэкIуэлъакIуэу къызэригъэсэбэпым, и пщэрылъхэр пылъхьэншэу, жэуаплыныгъэ ин хэлъу зэрызэфIихым, бронетанковэ машинэхэм ехьэлIа Iуэхухэр щагъэзащIэм къигъэлъэгъуа зэпIэзэрытыгъэм папщIэ. Тхыгъэ кIэщIыр дгъэхьэзырыху, абы къыкIэлъыкIуащ иджыри зы ЩIыхь тхылъ, и къалэнхэм зэрехъулIэм папщIэ икIи Урысей Федерацэм и IэщэкIэ ЗэщIэузэда и къарухэм я Тылыр илъэс 320-рэ зэрыхъур щагъэлъапIэм ирихьэлIэу къыхуагъэфэщауэ.
- Апхуэдэ гулъытэ къэзылэжь адыгэ щIалэм куэдкIэ ущыгугъ зэрыхъунум шэч хэлъкъым. Къапщтэмэ, еджэн-ми щехъулIауэ дзэм къулыкъу щищIэну дэкIащ Елдар. Абы къиухащ КъБКъУ-м физкультурэмрэ спортымкIэ и факультетым и бакалавриатыр, а еджапIэ дыдэм экономикэмрэ правэмкIэ и факультетым юриспруденцэмкIэ и къудамэм и магистратурэр.
- Елдар и адэ Леониди дзэм къулыкъу щыщищIэм Чэгъэду Фузелрэ СэIихьэтрэ я унагъуэм апхуэдэ хъыбар гуапэ — фIыщIэ тхыгъэ къаIэрыхьауэ щытат. Ахэр, егъэлеиныгъэ лъэпкъ хэмылъу, ирипагэ хъунут Хэкум и пащхьэм щиIэ къалэнхэм фIыуэ пэлъэщ, «совет зауэлI» фIэщыгъэм хуэпэж, дзэ тхьэрыIуэмрэ Уставымрэ къагъэув Iуэхухэр зыгъэзащIэ я быным и ехъулIэныгъэм, Хэкур фIыуэ зылъагъу, абы и къыщхьэщыжакIуэ нэс зэрагъэсам къыхэкIыу. Ди жагъуэ зэрыхъунщи, Елдар и ехъулIэныгъэм и адэр хэплъэну иухатэкъым, ар 2011 гъэм дунейм ехыжащ. И анэ Равидэ, и анэшхуэ СэIихьэт сымэ къыщхьэщытщ, хуэузыншэщи, къэрал псом щапхъэу щагъэлъагъуэ щIалэщIэм и хъер, и гуфIэгъуэ, и хэхъуэ куэд Тхьэм хигъаплъэ.
- ГъащIэм и гъуэгум дахэу, екIуу узэрытеувам ухущIемыгъуэжу, уи нэхъыжьхэр къыпщхьэщыту, нэхъыщIэхэм щапхъэ уахуэхъуу, жылэр уи зэфIэкIхэм иригушхуэу иджыри ехъулIэныгъэ Iэджэ уиIэну дыпхуохъуахъуэ, Елдар!
- ИСТЭПАН Залинэ.