Зы текIуэныгъэм къиIэтыжа гукъыдэж
2019-11-19
- «Краснодар-3» (Краснодар) — «Спартак-Налшык» (Налшык) — 0:1 (0:0). Краснодар. «Краснодар» ФК-м и академием и стадион. ЩэкIуэгъуэм и 17-м. ЦIыху 550-рэ еплъащ.
- Судьяхэр: Соколов, Чекалин, Селезнёв (псори Воронеж щыщщ).
- «Краснодар-3»: Штёпэ, Пивоваров (Манелов, 46), Храмцов (Корнюшин, 31), Пунегов (Мавлянов, 57), Логачёв, Кратков (Байрамян, 79), Симонов, Рейхмен, Самко, Берснев (Пидлисняк, 60), Волков.
- «Спартак-Налшык»: Щоджэн, Сындыку, Белоусов (Талабкэ, 90+1), Ольмезов, КIэдыкIуей, Iэпщацэ (Iэщын, 80), Салахетдинов, Дэхъу, Хьэшыр, Машэжь, Ашу (Бацэ, 76).
- Топыр дигъэкIащ: Хьэшырым, 90+2 (0:1).
- Дагъуэ къыхуащIащ: Ольмезовым, Бацэм, Самко.
- Урысей Федерацэм футболымкIэ и етIуанэ дивизионым и «Ипщэ» гупым 2019 — 2020 гъэхэм щекIуэкI зэхьэзэхуэм щыщу мы илъэсым щыIэну иужь джэгугъуэм хэтыну «Спартак-Налшыкыр» вэсэмахуэ Краснодар кIуащ, мазитIым нэблэгъауэ текIуэныгъэм и IэфIагъыр Iумыхуарэ, мазэрэ ныкъуэм щIигъуауэ и хьэрхуэрэгъухэм топ яхудимыгъэкIыфу. АдэкIэ зэпеуэр мазиплIкIэ зэпагъэунут икIи мы гъэм и кIэух зэIущIэм куэдкIэ елъытат, езы командэми къыдэщIхэми сыт хуэдэ гукъыдэж яIэу щIымахуэ зэман кIыхьыр ягъэкIуэнуми. Ар фIы дыдэу псоми къагурыIуэрт икIи хуэфэщэну загъэхьэзырат.
- «Краснодар-3»-мрэ «Спартак-Налшыкымрэ» нобэкIэ яIэ зэфIэкIхэр зэрызэщхьэщыкIышхуэ щыIэкъым. Абы и щыхьэтщ зэгъунэгъуу турнир таблицэм и кIэух увыпIэхэм зэрыщытыр. Апхуэдэхэм я зэпэщIэтыныгъэр гуащIэ щыхъу щыIэщ, къарукIэ зэрызэхуэдэм къыхэкIыу, икIи ехъулIэныгъэр зыIэрыхьэр нэхъ ерыщырщ. «Спартак-Налшыкым» абыкIэ дэбгъуэн щыIэтэкъым — Владикавказ щыIэу 0:8-уэ къызэрыхагъэщIар нэхъ псынщIэIуэу зэрапшыныжыным абы щыджэгухэр щIохъуэпс.
- ИпэкIэ кIуэтэн хуейуэ щытыкIэм къигъэувми, ди щIалэхэр нэхъыбэу зыхущIэкъуар я гъуэм и бгъэдыхьэпIэхэр къызэрырагъэбыдэкIынырщ. ЯщIэжырт иужь джэгугъуитхум жэуапыншэу топ пщыкIуплI къызэрыхудагъэкIар. Хэгъэрейхэри здэпIащIэ щыIэтэкъым. А псом къыхэкIыу лъэныкъуитIым языхэзыр япэу гъуэм щеуар зэIущIэм и 22-нэ дакъикъэращ: Iэпщацэ Марат «Краснодар-3»-м и гъуащхьэтетыр джэгум къыхишащ. ИужькIи футболистхэм гугъу зэрызрагъэхьыща щыIэкъым.
- Апхуэдэ щытыкIэм краснодардэсхэр игъэбэлэрыгъащ. Абыхэм къащыхъуащ «Спартак-Налшыкым» адэкIи апхуэдэу иригъэкIуэкIыну икIи зэIущIэр фIамыхь къудеймэ арэзыуэ. АрщхьэкIэ, ди щIалэхэр хуабжьу хуейт текIуэну. Абы щыхьэт техъуащ джэгум и етIуанэ Iыхьэм и щIэдзэкIэр. Налшыкдэсхэм хэгъэрейхэр апхуэдизу я гъуэм ирагулIыжати, топыр дэнэкIэ Iуахуми ядэрт.
- «Краснодар-3»-м лIыгъэ хэлъу зихъумэжащ джэгум хухаха зэманыр иухыхукIэ. Щыхуэмыхьыжар къыщIагъуа дакъикъищращ. А зэман кIэщIым къриубыдэу налшыкдэсхэр апхуэдизу лъэщу ебгъэрыкIуати, тIэунейрэ топ дагъэкIыфыну щытащ. КъызэрехъулIар зэщ, ауэ ари ирикъуащ иджыри къэскIэ дызыпагъэплъа текIуэныгъэр зыIэрагъэхьэн папщIэ. Хьэшыр Алан дигъэкIа топым я гукъыдэжыр къиIэтащ «Спартак-Налшыкым» щыджэгухэми къыдэщIхэми. Абы ипэкIэ ди командэр къыщыхэжаныкIар жэпуэгъуэм и 5-ращ икIи дакъикъэ 585-кIэ (!) къыкIэлъыкIуэм дыпагъэплъащ. Иужь текIуэныгъэр налшыкдэсхэм къызэрахьри куэд щIат — фокIадэм и 21-ращ. А мыхъумыщIагъэ псори зэхуэщIа хъуауэ зэхьэзэхуэр мазиплIкIэ зэпагъэуащ. Иджы Iэмал гъуэзэджэ яIэщ я щыуагъэхэмрэ яхузэфIэмыкIахэмрэ мыпIащIэу хэплъэжу, Iуэхухэр ягъэзэкIуэжыну.
- Мы гъэм и иужьрей джэгугъуэм и стадионым очкоитI щыфIэкIуэдащ зэхьэзэхуэм пашэныгъэр щызыIыгъ «Волгарь»-м. Ар и губгъуэм щыпэлъэщакъым Мэхъэчкъалэ икIа «Легион Динамо»-м. Новороссийск «Черноморец»-р щыхэзыгъэщIа «Алания»-р иджы абы къызэрыкIэрыхужыр очкоиплIщ.
- Зэпеуэм япэ текIуэныгъэр къыщихьащ «Спартак-Владикавказ»-м. АрщхьэкIэ, абы иджыри иужь дыдэ увыпIэр ибгынэфакъым.
- Щыгъуазэ фыхуэтщIынщ Урысей Федерацэм футболымкIэ и етIуанэ дивизионым и «Ипщэ» гупым щекIуэкI зэхьэзэхуэм ипкъ иткIэ мы гъэм иужьу зэхэта джэгугъуэм кърикIуа бжыгъэхэм: «Динамо-Ставрополь» (Ставрополь) — «Урожай» (Краснодар) — 1:2,«Интер» (Черкесск) — «Дружба» (Мейкъуапэ) — 0:1, «Мэхъэчкъалэ» (Мэхъэчкъалэ) — «Биолог-Новокубанск» (Прогресс) — 2:1, «Черноморец»(Новороссийск) — «Алания» (Владикавказ) — 0:1, «Спартак-Владикавказ» (Владикавказ) — «Анжи» (Мэхъэчкъалэ) — 1:0, «Волгарь» (Астрахань) — «Легион Динамо» (Мэхъэчкъалэ) — 1:1, «Мэшыкъуэ-КМВ» (Псыхуабэ) — СКА (Дон Iус Ростов) — 1:1.
- «Ипщэ» гупым зэхьэзэхуэм щыщIидзэжынур гъатхэпэм и 14-рщ. А махуэм «Спартак-Налшыкым» къригъэблэгъэнущ зэпеуэм бжьыпэр щызыIыгъ Астрахань и «Волгарь»-р. АбыкIэ занщIэу къэпщыта хъунущ щIымахуэ лъэхъэнэр ди футболистхэм къызэрагъэсэбэпа щIыкIэр.
- Жыласэ Заурбэч.