Мэлыхъуэ Мухьэмэд Нэхъупщ и къуэр
2019-10-17
- Куэдрэ хьэлъэу сымэджа нэужь дунейм ехыжащ Мэлыхъуэ Мухьэмэд Нэхъупщ и къуэр.
- Ар 1945 гъэм фокIадэм и 1-м Бахъсэн районым щыщ Къызбрун ЕтIуанэ къуажэм къыщалъхуащ. Налшык дэта «Севкавэлектроприбор» заводым рабочэу лэжьэн щыщIидзащ. 1969 гъэм и фокIадэ мазэм щегъэжьауэ 1979 гъэм и гъатхэпэм нэсыху Бахъсэн къалэм дэт «Автозапчасть» заводым техническэ къэпщытэныгъэмкIэ и къудамэм и мастеру, сменэм и мастеру, продукцэр щызэпкъралъхьэ, щызэпагъавэ участкэм и мастер нэхъыжьу, а IэнатIэ дыдэм и унафэщIу щытащ. ИужькIэ зэман кIэщIкIэ Налшык и «Къэббалъкърембыттехникэ» зэгухьэныгъэмрэ вольт лъагэ аппаратурэ къыщыщIагъэкI заводымрэ щылэжьащ. 1980 гъэм «Автозапчасть» заводым продукцэр щызэпкъралъхьэ, щызэпагъавэ и участкэм и унафэщIу игъэзэжри, а IэнатIэр 1987 гъэм нэсыху ирихьэкIащ. ИужькIэ Бахъсэн дэт производствэ комбинатым и унафэщIу ягъэкIуащ.
- 1988 гъэм и мэкъуауэгъуэм Мэлыхъуэ Мухьэмэд «Автозапчасть» заводым и унафэщIу хахри, а къулыкъур 1997 гъэм и мазаем нэсыху иIыгъащ. 1997 — 2002 гъэхэм Мэлыхъуэ Мухьэмэд Бахъсэн муниципальнэ районым и щIыналъэ администрацэм и Iэтащхьэу щытащ. 2002 гъэм и фокIадэ мазэм «Къэббалъкъмэкъумэштехникэ» акционер зэгухьэныгъэм и правленэм и тхьэмадэу ягъэуващ, 2003 гъэм и мэлыжьы-хьым щегъэжьауэ 2010 гъэм и дыгъэгъазэм нэсыху «Къэббалъкъмелиоводхоз» управленэ» федеральнэ къэрал IуэхущIапIэм и унафэщIу лэжьащ.
- Сыт хуэдэ IэнатIэ пэрымытами, Мэлыхъуэ Мухьэмэд зи IэщIагъэм хуэIэкIуэлъакIуэ, жэуаплыныгъэшхуэ зыхэлъ цIыхуу, промышленностым и къызэгъэпэщакIуэ IэкIуэлъакIуэу, унафэщI губзыгъэу зыкъигъэлъэгъуащ.
- Мэлыхъуэ Мухьэмэд Нэхъупщ и къуэр жылагъуэ лэжьыгъэми жыджэру хэтащ. Ар мызэу КПСС-м и обкомым, райкомым хагъэхьащ, КъБР-м и Парламентым, Бахъсэн район советым, Бахъсэн къалэ советым я депутату хахащ.
- Апхуэдэ егугъуныгъэмрэ емызэшыж лэжьыгъэмрэ яхуэфэщэн пщIэ ягъуэтащ. Абы Лъэпкъхэм я Зэныбжьэгъугъэ орденыр, медаль куэд къыхуагъэфэщащ, Къэбэрдей-Балъкъэр Республикэм и ЩIыхь тхылъыр къратащ, «РСФСР-м щIыхь зиIэ и машинэухуакIуэ» цIэр къыфIащащ.
- Ныбжьэгъу пэжу, гулъытэ зыхэлъ унафэщIу, унагъуэлI нэсу дунейм тета Мэлыхъуэ Мухьэмэд Нэхъупщ и къуэр зэи ящыгъупщэнкъым абы дэлэжьахэм, зыцIыхуу щытахэм.
- Балъкъыз А. Хь., Сэбан Р. К., Ахъуэбэч А. Н., Къэзан З. Н.,
- Ует А. З., БешкIур А. Т., ПщыукI М. С.,
- Тохъутэмыщ М. З., Къаскъул Хь. Къ., Вындыжь
- А. Хь., Абазэ А. Ц., Къаздэхъу О. Гъу.