ЦIыху 200 зэпеуащ Iуащхьэмахуэ и саугъэтым папщIэ
2019-07-02
- «Iуащхьэмахуэ и саугъэт» лыжэм дихьэх-хэм я урысейпсо зэIущIэр Къэбэрдей-Балъкъэрым щызэхуащIыжащ. Слалом инымрэ слалом къызэрыгуэкIымрэ щызэпеуэн папщIэ Iуащхьэмахуэ лъапэ щызэхуэсат къэралым и щIыналъи 10-м я лIыкIуэу спортсмен 200.
- ЦIыхубзхэр, цIыхухъухэр, ныбжьыщIэхэр мэкъуауэгъуэм и 24 — 28-хэм щызэпеуащ «Гара-Баши», «Мир» станцхэм я зэхуакум хуэзэ щIыпIэм. Слалом инымрэ слалом къызэрыгуэкIымкIэ цIыхубзхэм я деж щытекIуащ Москва областым щыщ Прокопьевэ Александрэ, Москва къалэм къикIа Ткаченкэ Екатеринэ сымэ. ЦIыхухъухэм я деж слалом иным Овчинников Алексей, слалом къызэрыгуэкIым Еджиевский Антон сымэ текIуэныгъэр къыщахьащ. А тIури Красноярск щыщщ.
- НэхъыщIэ дыдэхэм (илъэс 12 — 13-м итхэм) я деж слалом иным Москва къикIахэу Аржановэ Софьерэ Колунов Ильярэ текIуэныгъэр къыщахьащ. Илъэс 14 — 15 зи ныбжь хъыджэбз цIыкIухэм Сахалиным щыщ Гайдамашук Каринэ, а ныбжь дыдэм ит щIалэ цIыкIухэм я деж Красноярск щыщ Бушмин Иван къыщыхэжаныкIащ.
- Слалом къызэрыгуэкIым хиубыдэу къыщы-зэдэжэм илъэс 12 — 13-м ит хъыджэбз цIыкIухэм я деж Мончегорск къикIа Буланкинэ Юлие, илъэс 14 — 15 зи ныбжьхэм я деж Сахалиным щыщ Артамоновэ Алинэ япэ къыщищащ.
- «Спортым и щIымахуэ лIэужьыгъуэхэм дахьэххэм я дежкIэ Iуащхьэмахуэ и гъэмахуэ уэсыр тыгъэ лъапIэщ. Абы Iэмал къет бгы-лыжэкIэ къыщажыхь зэманыр мази 10-м нэгъэсынымкIэ. АдэкIэ лэжьыгъэшхуэ екIуэкIынущ илъэс хъурейм бгы-лыжэм дихьэххэм мы курортым къыщажыхьу щIыным хуэгъэзауэ. Иджыпсту щыIэ кIапсэ гъуэгухэмрэ къэжыхьыпIэхэмрэ Iэмал къат мы щIыпIэм зэуэ командэ зыбжанэм зыщагъэсэнымкIэ», — жеIэ «Кавказ Ищхъэрэм и курортхэр» акционер зэгухьэныгъэм и генеральнэ директор ТIымыжь Хьэсэн.
- «Кавказ Ищхъэрэм и курортхэр» акционер зэгухьэныгъэм и пресс-IуэхущIапIэ.