ЩIэблэр зыхэпIыкIын хуей Iуэху
2019-07-02
- Къэралым и щIыпIэ куэдым мы зэманым щокIуэкI «Армэ-2019» гъэлъэгъуэныгъэхэр. Дзэ техникэм, Iэщэфащэхэм, зыхъумэжыныгъэ комплексым и иужьрей ехъулIэныгъэхэм я выставкэ убгъуа иджыблагъэ щекIуэкIащ Налшык къалэми. Ар къызэригъэпэщащ Урысей Федерацэм ЗыхъумэжыныгъэмкIэ и министерствэм.
- Гъэлъэгъуэныгъэр мэкъуауэгъуэм и 28 — 30-хэм щекIуэкIащ Абхъазым и утымрэ «Спартак» стадионым пэгъунэгъу щIыналъэмрэ. Выставкэм хиубыдэу къызэхуэсахэм я нэгу зрагъэужьащ республикэм и эстрадэм и артистхэм, апхуэдэу дзэ подразделенэ щхьэхуэхэм къулыкъу щызыщIэхэм. Езыхэм ябгъэдэлъ зэфIэкIхэр япэ махуэм 346-нэ бригадэ хэхам къулыкъу щызыщIэхэм, етIуанэ махуэм — 31-нэ инженер-сапер полкым хэтхэм ягъэлъэгъуащ.
- — «Армэ-2019» гъэлъэгъуэныгъэр Къэбэрдей-Балъкъэрым зэрыщрагъэкIуэкIыр ди республикэм и мызакъуэу, зэрыщыту Кавказ Ищхъэрэм и дежкIи Iуэхушхуэщ, — жиIащ КъБР-м и Правительствэм и УнафэщIым и къуэдзэ Къардэн Мурат. — Нобэ мыбы щIалэгъуалэр куэду къекIуэлIащ. Мыпхуэдэ Iуэхухэрщ щIэблэр зыхэпIыкIын хуейр, Хэкур фIыуэ ялъагъуу, абы иригушхуэу щытын папщIэ.
- Мы гъэлъэгъуэныгъэр нэхъыбэу зытеухуар ди щIыналъэм къулыкъур щезыхьэкI дзэ частхэмрэ соединенэхэмрэ къызэрызэгъэпэща техникэр, Iэщэ-фащэр Къэбэрдей-Балъкъэрым исхэм егъэлъагъунырщ. Прохладнэ щIыналъэ гарнизоным и унафэщI Стрельцов Вячеслав зэрыжиIамкIэ, Налшык щекIуэкIа гъэлъэгъуэныгъэм утыку къыщрахьащ IэнатIэ зэмылIэужьыгъуэхэм — МЧС-м, МВД-м, Урысей гвардием, дзэ полицэм, нэгъуэщIхэми къагъэсэбэп Iэщэ-фащэр, тIасхъэщIэх техникэ хэхар.
- Мыпхуэдэ зэхыхьэшхуэр Налшык иджы япэу щрагъэкIуэкIыу аращ. Япэрей зэхуэсыгъуэу плIыр Москва и Iэшэлъашэхэм къыщызэрагъэпэщащ. Ауэ мы гъэм Iуэхум зрагъэубгъуну мурад ящIри, къэралым и адрей щIыналъэхэми щыпсэухэм Iэмал ира-тащ дзэм и ехъулIэныгъэхэм щыгъуазэ защIыну.
- Гъэлъэгъуэныгъэм хеубыдэ фоч, автомат зэмылIэужьыгъуэхэр, дзэм хэтхэм я щыгъынхэр, автомобиль техникэр, дзэм къыщагъэсэбэп нэгъуэщI техникэ лъэщыр. А псори зэралъагъум къыдэкIуэу, цIыхухэр едэIуащ куэд щIауэ къулыкъу зыщIэ зауэлIхэм къаIуатэ хъыбар гъэщIэгъуэнхэм. Апхуэдэу махуищым къриубыдэу выставкэм къекIуэлIахэр щыгъуазэ ящIащ кхъухьлъатэзехуэ зэрымыс аппарат щхьэхуэхэм я къэлъэтыхьыкIэм, дзэм къыщагъэсэбэп иджырей автомобилхэм я зэфIэкIыр.
- Бгъэнокъуэ Санэ.