Узыншагъэр хъумэнымрэ спортымрэ зи гур итхьэкъуа
2019-03-26
- Ди республикэм и мащIэкъым спортым гукъуэпскIэ пыщIа, абы зи гъащIэр тезыухуа, щIэблэ нэхъыбэ а Iуэхум хэшэным телажьэ цIыху хьэлэмэтхэр. Абыхэм ящыщщ Псыгуэнсу къуажэм къыщыхъуа Ибрэхьим Борис.
- ЩIалэ цIыкIум и ныбжьыр илъэсипщI фIэкIа хъуатэкъым и адэр дунейм щехыжам. Бынитхум я нэхъыжьыр езырати, къалэн зыбжанэ и пщэ къыдэхуащ: псом япэу Iэщ зехьэныр. Iэджэрэ къыхуихуащ щIымахуэ уаем мэзым кIуэурэ жэмым иригъэшхын жыг кугъуэ къэпкIэ къихьу.
- 8-нэ классым къыщIэкIа нэужь, Ибрэхьим Борис щIэтIысхьащ Налшык дэт медучилищэм. ИкIи, адрейхэм къахэпэжэкIыу, дохутыр IэщIагъэм зыхуигъэхьэзыращ. Апхуэдэу нэхъуеиншэу емыджамэ, Лениным и цIэкIэ щыIэ стипендиер къратынт?! А зэманырщ Псыгуэнсу щыщ щIалэщIэр спортым щыдихьэхар. Футбол джэгунри и псэм щыщ Iыхьэ хъуат абы. Уеблэмэ и къуажэжьым и командэм хэту республикэм и чемпионатхэм зыкъыщигъэлъэгъуащ.
- Медучилищэр тху защIэу, диплом плъыжькIэ къиухри Мэзкуу дэт Япэ медицинэ институтым щIэтIысхьэну Борис кIуащ. Зы экзамен фIэкIа имыту, 5 къихьри щIэхуащ. Абыи щIалэ ахъырзэману зыкъыщигъэлъэгъуащ Ибрэхьимым. ФIы дыдэу еджэм и закъуэтэкъым, атIэ боксымкIи спортсмен лъэрызехьэ хъуат. Уеблэмэ щIалэгъуалэм я къэралпсо зэхьэзэхуэм чемпион щыхъури, «СССР-м спортымкIэ и мастер» цIэри къыфIащащ.
- Институтыр диплом плъыжькIэ къызэринэкIри, адэкIэ ординатурэр, абы кIэлъыкIуэу аспирантурэр къиухащ. Уеблэмэ аспирантурэм къыщIэкIыным зы илъэс иIэу, уз эрыцIалэхэр зэрагъэхъужым теухуауэ диссертацэ итхри, медицинэ щIэныгъэхэм я кандидат хъуащ. Апхуэдэ щIэныгъэфI зыбгъэдэлъым, IэщIагъэлI щIалэщIэм хуэмыныкъуэу хъурэт институтыр — Борис щылэжьэну къагъэнэжащ здыщIэса еджапIэм.
- А IэнатIэм Iуту адыгэ щIалэм къыхуэзащ Къэбэрдей-Балъкъэрым узынышагъэр хъумэнымкIэ и министр Бер Мухьэдин. Абы зэхихат и лъэпкъэгъу дохутырым и цIэ дахи. «НэкIуэж, уз зэрыцIалэхэм щеIэзэ сымаджэщым дохутыр нэхъыщхьэу узгъэувынщ», — къыжриIащ.
- Адыгэм пищI щыIэ къыщалъхуа хэку цIыкIум?! Борис арэзы хъури, къигъэзэжащ и адэжь щIыналъэм икIи пэрыуващ и IэнатIэщIэм.
- А къулыкъум зэрыпэрыта, дохутыр нэхъыщхьэу щылэжьа илъэсипщIым Ибрэхьим Борис IуэхуфIу, щхьэпэу зэфIигъэкIар куэд мэхъу. ИужькIэ, 1992 гъэм, къыхуагъэфэщащ нэгъуэщI IэнатIэ — ар ягъэкIуащ Долинск щIыпIэм ит санаторэхэр зыхиубыдэ «Налшык курортхэм» и унафэщIу. Абыи Борис лъэкI къыщигъэнакъым — и щIэныгъэри, лъэкIыныгъэри, жэрдэмри хуиунэтIащ зыгъэхъужыпIэ-зыгъэпсэхупIэхэм я Iуэхур дэгъэкIыным.
- Иужь лъэхъэнэм Ибрэхьимым и IуэхущIафэр зэпхар ди спортсменхэрщ — бэнэкIэ хуитымкIэ Урысей Федерацэм и командэ къыхэхам и дохутырщ, къищынэмыщIауэ, Налшык дэт СпортымкIэ уардэунэми щолажьэ. Абы сытым хуэдэу гухэхъуэгъуэ ин къритрэ и нэIэ щIэт щIалэхэм зэхьэзэхуэ зэмылIэужьыгъуэхэм къыщахь текIуэныгъэхэм!
- — Спортыр узыншагъэщ,- жеIэ Борис, — абы уи акъылыр тэмэму егъэлажьэ, гугъуехьыр зищIысыр къыуещIэ, уепсыхь. КъимыдэкIэ уи зэманри убзыхуа мэхъу. Ар еджэным зэран хуэхъуркъым. И дуней тетыкIэкIи, цIыху хэтыкIэкIи, хьэл-щэнкIи, IэпкълъэпкъкIи спортсменыр къахощ адрейхэм.
- Шэч хэмылъу, Борис хуэдэ цIыху — куэдрэ зи цIэ дахэ жаIэ анэкъилъху гумащIэ — зэраIэм ирогушхуэ абы къыдалъхуахэу Валерэ, Людэ, Заур сымэ. И шынэхъыжьым и цIэр сыт щыгъуи и бзэгупэ телът пасэу дунейм ехыжа, къуажэ унафэщIуи, КъБР-м и Парламентым и депутатуи щыта Юри.
- Ибрэхьим Борисрэ абы и щхьэгъусэ Людэрэ унагъуэ дахэ зэдаухуащ. ЗэгурыIуэрэ зэдэIуэжу зэдапIащ икIи гъащIэм и гъуэгу пэжым трагъуэващ япхъухэу Ирэрэ Ланэрэ. Дауи, абыхэм я щхьэр лъагэу ялъагъуж IуэхуфIым, узыншагъэм телажьэ, спортым гу хуэзыщIа щIэблэр гъуэгу тэмэм тетыным зи гъащIэр тезыухуа, къуршым хуэдэу къакъуэт адэ зэраIэм папщIэ.
- Мыз Ахьмэд.