Нэхъапэм игъэдыхьэшхырт, иджы зэгуегъэп
2018-10-11
- Дэ десэжащ ЛДПР-м и Iэтащхьэ Жириновский Владимир зыми емыщхь жэрдэмхэр къызэрыхилъхьэм. Абы къыхэкIыу куэд щIащ ажэгъафэм и къалэнхэр зэригъэзащIэрэ. АрщхьэкIэ а фIэщыгъэм зэрыхуэфащэм хуэдэу нэхъапэм дигъэдыхьэшхыу щытамэ, иджы дызэгуегъэп.
- Апхуэдэу сощIэж политикыр сыт щыгъуи кавказ лъэпкъхэм къахуэдзэлашхэу зэрыщытар: «Кавказым дыхуейщ абы щыпсэухэр щIыналъэм имысыжу».
- Пэжщ, иужькIэ Жириновскэм зызэтриуIэфIэжа хуэдэщ: тегушхуэжыркъым апхуэдэ лъагъумыхъуныгъэ псалъэхэр къыжьэдэкIын. Арщхьэ-кIэ Кавказ Ищхъэрэр и нэIэм щIигъэкIакъым. «Комсомольская правда» газетым зэритхымкIэ Жириновский Владимир къигупсысащ Урысейр щIэрыщIэу зэрагуэшэжыну Iэмал. Абы къелъытэ къэралыр щIыналъэ 85-рэ хъун хуэмейуэ — 40-ри ирикъунущ. Ахэр щIыпIэхэм щыпсэу лъэпкъхэмкIэ зэхагъэщхьэхукIауэ щытын хуейкъым. Депутатым жеIэ цIыкIухэр нэхъ инхэм хэгъэхьэн хуейуэ. Жириновскэм къелъытэ апхуэдэ тегуэшэкIэм Урысейр сепаратизмэм и шынагъуэм щихъумэ-ну. Къэрал Думэм къыщыщыпсалъэм Жириновскэм къихьащ щIыналъэхэр зэхагъэхьэнкIэ хъунум и щапхъэхэр:
- — ЩIыналъэхэр нэхъ ин хуейщ, щыпсэу лъэпкъхэр зыхуэдэм темыщIыхьауэ. Кавказыр тIууэ бгуэш хъунущ — Кавказ крайрэ Бгырыс крайхэу. Жириновскэм и псалъэхэм ятепщIыхьмэ, щIыналъэхэр щызэхагъэхьэкIэ абыхэм щыпсэу лъэпкъхэр зыхуэдэхэмрэ къадекIуэкI хабзэхэмрэ ятепщIыхь хъунукъым. А щхьэусыгъуэм къыхэкIыу мыбдеж гугъуехьхэр щынэхъыбэнур Кавказырщ.
- — «Дагъыстэн» псалъэм урысыбзэкIэ къикIыр «бгырыс щIыналъэщ». Абы бгырыс лъэпкъ 30 щопсэу. Иджырей Дагъыстэныр, Шэшэныр, Ингушыр зэхыхьэу Бгырыс щIыналъэу щрырет. Щыхьэру къыхах хъунущ республикэхэм я зэхуакум щыIэ Хасавюрт къалэр. Къэбэрдей-Балъкъэрыр, Къэрэшей-Шэрджэсыр, Осетие Ищхъэрэм я зэгухьэныгъэм «Владикавказ» фIащ хъунущ — мис а «Кавказым сритепщэщ» урыс псалъэ дахэр. Аращи, республикихым щыхьэру тIу фIэкIа ямыIэми хъунущ, — жеIэ Жириновскэм.
- Политикым къызэрыхигъэщамкIэ, зэгухьэныгъэщIэхэм лъэпкъ щэнхабзэхэр, газетхэр, школхэр щахъумэнущ.
- Урысейм и политик псоми ящыщу къэралыр зехьэным теухуа программэ гуэри зимыIэ ЛДПР-м и унафэщIым къыщыгъупщар зыщ: Кавказ Ищхъэрэм щыпсэу лъэпкъхэр апхуэдэ гуэшыкIэм хуей? Абыхэм я фIэфIыныгъэр къамылъытэми, хъуну пIэрэ? Абы щыгъупщэжащ зэгуэр Бгырыс АССР-р зэрыщыIар, ар лъэлъэжынри къызыхэкIа щхьэусыгъуэхэри.