Iулъхьэр къахуэгъуркъым
2018-10-11
- «Аргументы и факты» газетым и лэжьакIуэ Зотов Георгий иджыблагъэ Армением щыIащ икIи зыIууар телъыджэ щыхъуащ : а къэралым махуэ къэс щагъэтIыс Iулъхьэ къеIызыхыу сэтей къащIхэр. Хабзэхъумэхэм яIэщIэкIыркъым зыри — министрхэри, мелуанырыбжэхэри, уеблэмэ лъэпкъ лIыхъужьхэри. Нэхъапэм мыбы щыкуэдт мылъку зэхэзыдыгъуэхэр. АрщхьэкIэ, гъэщIэгъуэныращи, езы цIыхубэр къэуващ хьэлэлу псэуным и телъхьэу.
- Ереван и тыкуэнышхуэхэм ящыщ зым и менеджер Манукян Эдуард хуабжьу и гуапэщ мазищ хъуауэ Армением коррупцэм и бийуэ щекIуэкI бэнэныгъэр. НаIуэу зэрыщытщи, Кавказым Iулъхьэхэр къыщыIах ижь-ижьыж лъандэрэ. А хабзэ мыхъумыщIэр, уеблэмэ, СССР-м и зэманми ягъэкIуэдыжыфакъым.
- — Зэгуэр сэ Куржым щыслъэгъуауэ щытащ ГАИ-м къулыкъушхуэ щызымыIыгъ офицерхэм я дачэ ехьэжьахэр, — етх журналистым. — Коррупцэр зыхуэдизымкIэ Армением дунейм 107-нэ увыпIэр щиIыгъщ (ищIагъым ущыIэхукIэ нэхъыкIэщ). Урысейр зэкIэ 135-нэ увыпIэм къыщыувыIа хуэдэщ. АрщхьэкIэ республикэ цIыкIум Iуэхухэр щыхьэлэчт: щащэрт икIи къыщащэхурт псори. «Доллар 200-кIэ автомобиль зебгъэкIуэну хуит узыщI тхылъ къыдэпхыфынут, — зеумысыж таксим ирилажьэ Гарик. — Ар щIалэм е хъыджэбзым тыгъэ хуищIырт къыщалъхуа махуэр щагъэлъапIэкIэ. Аращ ди деж гъуэгухэм нэщIэбжьэ куэд къыщIыщыхъум и щхьэусыгъуэр. Машинэр зэрагъэкIуэфыркъым. «Псори зэлъыта цIыхум тыгъэ хуумыщIауэ» курыт школым егъэджакIуэу уувыфынутэкъым. Иджы пIалъэ кIэщIым щытыкIэм зихъуэжащ. АтIэ «ермэлыхэм я щапхъэм» ирикIуэу Урысейм коррупцэр хипIытIэфыну пIэрэ?
- Зэуэ уи нэгу къыщIохьэж мыбы щекIуэкIар! Ереван и тыкуэн абрагъуэхэм илъэс куэдкIэ налогхэр ятакъым. Ахэр сату щIыпIэ цIыкIу дыдэу ятхат. ЗэрыгурыIуэгъуэщи, а псоми щыгъуазэт Армением и правительствэм хэт къулыкъущIэхэр.
- Мыпхуэдэуи уогупсыс: ярэби, сыту тыншу щытыкIэр яхъуэжа: ПцIыIуэпцIышэхэм, хьэжьвакъэжьышххэм япэщIэувэмэ, къэралым и жыпым занщIэу мелуанхэр къихъуэну? КъызэрыщIэкIымкIэ, къихъуэнущ. АрщхьэкIэ нэхъыщхьэр Армением къулыкъушхуэ дыдэ щызыIыгъа, пщIэшхуэ зыщыхуащI цIыхухэри зэрыхилъэфарщ.
- — Армением зыхъумэжыныгъэмкIэ и министрым и къуэдзэу щыта, ермэлыхэм я дзэр къызэзыгъэпэща, дамыгъэ лъапIэ дыдэхэр зыхуагъэфэща Григорьян Манвел щагъэтIысам сэ си гугъащ дунейр къутэжыну,- игу къегъэкIыж юрист Хачикян Самвел. — Си фIэщ хъуртэкъым. Ар тхьэ пэлъытэ цIыхут, Карабахым щекIуэкIа зауэм къыхэжаныкIат! АрщхьэкIэ иужькIэ телевизоркIэ къагъэлъэгъуащ: Григорьян и лъапсэ дэгъуэхэм ахъшэ Iэрылъхьэу доллар минищэхэр къыщагъуэтащ, Урысейм щыпсэу ермэлыхэм къэралым тыгъэ хуащIа «дэIэпыкъуэгъу псынщIэр» зыкIэщIиупщIащ, школакIуэхэм фронтым Iут зауэлIхэм щхьэкIэ зэхуахьэса IэфIыкIэхэр идыгъуащ.
- …Шэджагъуэм Вардананс уэрамым и шей ефапIэм цIыхухэр щым щохъу: телеэкраным къихьащ лъэпкъ шынагъуэншагъэмкIэ IэнатIэм и Iэтащхьэ Ванесян Артур. Абы хъыбар къарегъащIэ аргуэру зы къулыкъущIэм и унэр къызэращамкIэ. «Сэ си фIэщ хъуркъым премьерыщIэ Пашинян Никол экономикэр къиIэтыфыну, арщхьэкIэ коррупцэм полъэщ, — жеIэ журналист Саркисян Баграт. — Армениер Iулъхьэхэм игъэгузэ-ващ. Езы Пашинян тхьэ щеIуэж мылъку зралъэфэлIауэ къищIэмэ, и унагъуэм щыщхэми ящымысхьыну. Деплъынщ. Ауэ абы ерыщу егъэкIуатэ ирихьэжьа Iуэхур».
- Апхуэдэу Урысейм мы Iуэхум щыбгъэдыхьэфыну? Дауи. ЯIыгъ къулыкъухэр зыхуэдэм щемыплъу Iулъхьэхэм я бийуэ ткIийуэ къыщыувмэ. ИтIанэщ цIыхубэм властым щиIэхэр и фIэщ щыхъунур. Арыншамэ, псори щхьэгъэпцIэжщ.