«Нартхэм я фIыгъуэхэр» Кърымым щагъэлъагъуэ
2018-07-19
- Ди лъахэгъу сурэтыщI-модельер ТIажь Альбинэ и фондым къыхилъхьэри, УФ-м ЩэнхабзэмкIэ и министерствэр, Лъэпкъхэм я унэу Мэзкуу дэтыр, Урысейм и СурэтыщIхэм я зэгухьэныгъэр я щIэгъэкъуэну Кърымым ще-кIуэкIащ «Нартхэм я фIыгъуэхэр» Х дунейпсо сабий-ныбжьыщIэ зэпеуэ-фестивалыр.
- «Артек» сабий зыгъэпсэхупIэм щекIуэкIа зэпеуэм хэтащ Урысей Федерацэм и щIыналъэ 21-м я сабий 50-м щIигъу, Кърым Республикэм гъуазджэмкIэ и еджапIэхэм, сабий художественнэ школхэм я гъэсэнхэр. СурэтыщI ныбжьыщIэхэм яхэтащ Урысейм ЩэнхабзэмкIэ и министерствэм и «РОСИЗО» Къэрал музей-гъэлъэгъуэныгъэ центрым къызэригъэпэща «Сэ сыщыпсэу дунейр» урысейпсо зэхьэзэхуэм щытекIуахэр, апхуэдэуи «Гъуазджэм и дунейр — Артек» программэм хэтахэр.
- НыбжьыщIэхэр еплъащ тхакIуэ, усакIуэ, зэдзэкIакIуэ, журналист, СКГИ-м режиссурэмкIэ и кафедрэм и доценту щыта Жылэтэж Сэлэдин и сценарийкIэ ягъэхьэзыра «Сосрыкъуэ мывэм и къуэщ» мультфильмым. Урысей Федерацэм и щIыналъэхэм, адрей къэралхэм ящыщ школакIуэхэм ягъэхьэзыращ Кузьмин Валентин и «Сокровище нартов» тхылъым теухуа сурэтхэр.
- Iуэхур къызэзыгъэпэщахэм фIыщIэ хуащIащ проектыр къадэзыIыгъа, «Артек» зыгъэпсэхупIэм унафэщI Каспржак Алексей, абы и чэнджэщэгъу — «Артековец» газетым и редактор нэхъыщхьэ Вербенкэ Алексей, апхуэдэуи «РОСИЗО»-м и лIыкIуэхэу Шереухов Илья-рэ Серовэ Алёнэрэ.
- Фестиваль-зэпеуэм и къызэгъэпэщакIуэ комитетым и унафэщI, УФ-м и Правительствэм щэнхабзэмкIэ и саугъэтым и лауреат ТIажь Борис къызэрыджиIащи, «Нартхэм я фIыгъуэхэр» Iуэхум и мыхьэнэ нэхъыщхьэр къытщIэхъуэ щIэблэр лъэпкъхэм я щэнхабзэм и тхыдэм щыгъуазэ щIы-нырщ, зэчий зыбгъэдэлъ щIалэгъуалэр къэгъэнэIуауэ адэкIэ заужьын папщIэ абыхэм ядэIэпыкъунырщ, Урысеймрэ хамэ къэралхэмрэ егъэджэныгъэмкIэ я IэнатIэхэм щэнхабзэ, лъэпкъ зэпыщIэныгъэр щыгъэбыдэнырщ, зыщегъэужьынырщ, Къэбэрдей-Балъкъэрым и лъэпкъхэм я щэнхабзэр Урысей Федерацэми хамэ къэралхэми егъэцIыхунырщ.
- Зэпеуэм хэтхэм, илъэсихым къыщыщIэдзауэ илъэс 17-м нэс (я ныбжькIэ гупищу гуэшащ), нарт эпосым теухуа я сурэтхэр къызэгъэпэщакIуэ комитетым хуагъэхь. Зэхьэзэхуэм и япэ Iыхьэр школым, IэщIагъэ щрагъэгъуэт еджапIэм, еджапIэ нэхъыщхьэм, студием е кружокым ирегъэкIуэкI. ЕтIуанэр — Налшык къалэ, зэпеуэм и къызэгъэпэщакIуэ комитетым.
- Юбилей фестиваль-зэпеуэм щытекIуахэм я IэдакъэщIэкIхэр, апхуэдэуи илъэсипщIым къриубыдэу жюрим нэхъыфIу къилъыта сабий сурэт 50 щэкIуэгъуэмрэ дыгъэгъазэмрэ щагъэлъэгъуэнущ Мэзкуу (Лъэпкъхэм я унэм), Сирие Хьэрып Республикэм (Дамаск къалэ, Урысей щэнхабзэ центрым).
- Зэхьэзэхуэм и етIуанэ Iыхьэм хэтыну лэжьыгъэхэр егъэхьын хуейщ фокIадэм и 15 пщIондэ. Нэхъ зэпкърыхауэ зэпеуэм кърикIуахэм щыгъуазэ зыщыфхуэщIыфынущ мы сайтхэм: www.elot.ru, www.albina-tazheva.com.
- УЭРДОКЪУЭ Женя.