ЦIыхуми тхылъми ятеухуауэ
2014-03-01
- Налшык дэт Къэрал киноконцерт гъэлъэгъуапIэм гъатхэпэм и 6-м щекIуэкIынущ «Юрий Темирканов. Монолог» тхылъым теухуа пшыхь. Ар зи Iэдакъэм къыщIэкIа Хьэгуарэ Джамилэ, Юрэ и Iыхьлыхэр, ныбжьэгъухэр, лэжьэгъухэр тепсэлъыхьынущ дирижер цIэрыIуэм и хьэл-щэну, и цIыху щIыкIэу зыщыгъуазэхэм.
- «Монолог»-м Iупхъуэр IуигъэкIуэту Темыркъаным и гъащIэм ухишэ пэлъытэщ, и гупсысэм и куууагъымрэ щIэныгъэшхуэ зэрыбгъэдэлъымрэ иджыри зэ наIуэ пщищIу. ГъащIэм, макъамэм, къыдэгъуэгурыкIуа цIыхухэм, и IэщIагъэм Темыркъаныр топсэлъыхь зэми уигъэнэщхъейуэ, зэми дунейр гуапэрэ гуауэу зэрызэхэлъыр зэрыхьэкъыр зыхыуигъащIэу, зэми гушыIэр ебэкIыу.
- Интервьюхэр, тхыгъэхэр, фильмхэмрэ телесюжетхэмрэ щыжиIахэр къызэщIэзыкъуа тхылъыр гъэхьэзырыным илъэситI нэблагъэкIэ елэжьащ Джамилэ. Абы итщ сурэтрэ документу щэм щIигъу, я нэхъыбэр иджы япэу традзэу аращ.
- Темыркъан Юрэ Хьэту и къуэм и гъащIэр щIэблэм я дежкIэ щапхъэщ, ехъулIэныгъэр укъызыхэкIа лъэпкъым и инагъ-цIыкIуагъым зэремылъытар, узыпэрыт Iуэхур фIыуэ плъагъумэ, лэжьыгъэм зыщумыдзеймэ, абы зэчийр щIыгъужмэ, нэхъ лъагапIэ ин дыдэми узэрынэсыфынур зыхозыгъащIэщ», — къыддогуашэ Печатымрэ цIыхубэ коммуникацэхэмкIэ къэрал комитетым и унафэщIым и къуэдзэ Хьэгуарэ Джамилэ. Абы зэрыжиIэмкIэ, тхылъым дэтхэнэ зыми къыщигъуэтынущ фIэгъэщIэгъуэнын; гъащIэм хуэзыгъэIущхэр Темыркъаным и псалъэхэм къызэрыхагъуэтэнуми шэч хэлъкъым.
- КъБР-м ЩэнхабзэмкIэ и министерствэмрэ Печатымрэ цIыхубэ коммуникацэхэмкIэ къэрал комитетымрэ къызэрагъэпэщ пшыхьыр щIидзэным и пэ къихуэу пэIущIэм деж къыщызэIуахынущ Темыркъаным теухуа гъэлъэгъуэныгъэ. «Монолог» тхылъри абдеж щащэнущ. Пшыхьыр сыхьэт 16.00-м щIидзэнущ.
- ДЖЭДГЪЭФ Маринэ.