ЩIэблэр гъащIэм хэзэгъэн папщIэ
2014-01-18
- Лъэпкъ зэныбжьэгъугъэр гъэбыдэным хуэгъэпса дерс щхьэпэхэр драгъэкIуэкIащ Къэбэрдей-Балъкъэрым и школакIуэхэм. «Мамырыгъэмрэ шыIэныгъэмрэ Кавказ Ищхъэрэм щыгъэбыдэн» фIэщыгъэм щIэту республикэм и школхэм щрагъэкIуэкIа зэIущIэхэм кърикIуахэр къызэщIакъуэжащ.
- КъБР-м щыIэ жылагъуэ, щIалэгъуалэ зэгухьэныгъэхэм я лIыкIуэхэр республикэм и къалэхэм, къуажэхэм дэт школхэм щеджэхэм яIущIащ, зэпсэлъащ, зэчэнджэщащ.
- ЗэIущIэхэр КъБР-м ХъыбарегъащIэ IуэхущIапIэхэмкIэ, жылагъуэ, дин зэгухьэныгъэхэмкIэ и министерствэм и жэрдэмкIэ, «КъБР-м ис лъэпкъхэм яку дэлъ зэныбжьэгъугъэмрэ шыIэныгъэмрэ гъэбыдэн» зыуэ щыт республикэ программэм ипкъ иту къызэрагъэпэщауэ аращ.
- НыбжьыщIэхэм иджыри зэ ягу къагъэкIыжащ, къызыхэкIа лъэпкъ, зэрахьэ дин емылъытауэ, цIыхухэм яку пщIэрэ нэмысрэ дэлъыныр ехъулIэныгъэм и лъабжьэу зэрыщытыр. Абы дэщIыгъуу щIалэгъуалэр гъащIэ узыншэм и телъхьэу псэуну къыхураджэри, афияным, аркъэм дихьэха, а хьэл мыхъумыщIэхэм я зэранкIэ игъуэ нэмысу дунейм ехыжа цIыху цIэрыIуэхэм ятеухуа кинофильм ирагъэплъащ.
- КъБР-м ХъыбарегъащIэ IуэхущIапIэхэмкIэ, жылагъуэ, дин зэгухьэныгъэхэмкIэ и министерствэм щекIуэкIа зэIущIэм и къызэгъэпэщакIуэхэмрэ абы жыджэру хэтахэмрэ зэфIагъэкIа лэжьыгъэр къызэщIакъуэжри, нэхъапэ игъэщыпхъэу къалъытэхэр къагъэлъэгъуащ.
- «Ди жагъуэ зэрыхъунщи, ныбжьыщIэхэм я щхьэ Iуэху зэрахуэфкъым, зыIущIэ лъэпощхьэпохэм хэкIыпIэ къыхуагъуэтыфкъым. Мыпхуэдэ зэIущIэхэм я фIыгъэкIэ, щIалэгъуалэр зэуIуу зэдэлажьэу едгъасэмэ, дунейм декIу цIыху къытхухэщIыкIыну догугъэ», — жеIэ Къалэн куэд зыгъэзащIэ «Галактика» щIалэгъуалэ центрым и унафэщI Къущхьэ Заремэ.
- «ЩIалэгъуалэ жэрдэмхэм я институт» жылагъуэ зэгухьэныгъэм и унафэщI Iэзубэч Азэмэт къызэрилъытэмкIэ, абыхэм къагъэсэбэп Iэмалым щIэблэм дежкIэ мыхьэнэшхуэ иIэщ. «НыбжьыщIэхэр щытыкIэ зэмылIэужьыгъуэхэм идгъэувэурэ абыхэм хэкIыпIэ къыхуагъуэту едгъасэмэ, гъащIэм къигъэгъуэзэнущ», — жеIэ Iэзубэчым.
- КъБР-м ХъыбарегъащIэ IуэхущIапIэхэмкIэ, жылагъуэ, дин зэгухьэныгъэхэмкIэ и министерствэм и къудамэм и унафэщI Шыбзыхъуэ Залым зэрыжиIэмкIэ, проектым и мурад нэхъыщхьэр — лъэпкъ зэмылIэужьыгъуэхэм яку дэлъ зэныбжьэгъугъэр гъэбыдэныр, щIэблэм хабзэрэ пщIэрэ яхэлъу къэгъэтэджыныр — жылагъуэмрэ властымрэ зэдэлажьэмэ, къайхъулIэнущ.
- Джэдгъэф Маринэ.