ЗымащIэ яхурикъужакъым
2022-05-19
- «Динамо» (Мэхъэчкъалэ) — «Спартак-Налшык» (Налшык) — 1:0 (1:0). Мэхъэчкъалэ. Есинбаевэ Е. и цIэр зезыхьэ «Труд» стадион. Накъыгъэм и 16. ЦIыху 800 еплъащ.
- Судьяхэр: Карпов (Петрозаводск), Ежак (Сочэ), Чаплыгин (Мэзкуу).
- «Динамо»: Хамхоев, Ибрагимов, Гасанов, Красильниченкэ, Алибеков, Халимбеков, Глушков (Махмудов, 90), Гаджиев (Мелекесцев, 75), Атабаев (Исаев, 62), Юсупов, Дибиргаджиев (Вагидов, 62).
- «Спартак-Налшык»: Антипов, Сындыку, Ольмезов (Мэкъуауэ, 64), Белоусов, Шумахуэ, Жангуразов, Хьэшыр, Дэхъу, Масленников, Бэчбо (Ашуев, 75), ЛIуп.
- Топыр дигъэкIащ Гаджиевым, 44 — пенальтикIэ (1:0).
- 53-нэ дакъикъэм Бэчбом пенальтир худэгъэкIакъым.
- Дагъуэ къыхуащIащ Алибековым, Гаджиевым, Ашуевым.
- Урысей Федерацэм футболымкIэ и етIуанэ дивизионым и Япэ гупым щекIуэкI зэхьэзэхуэм ипкъ иткIэ накъыгъэм и 17-м Дагъыстэ-ным и къалащхьэм щызэхэтащ зэпеуэм бжьыпэр щызыIыгъ «Динамо»-мрэ «Спартак-Налшыкымрэ» я зэIущIэр.
- ЗэпэщIэтыныгъэр пашэм зэрыхуэфащэу, хэгъэрейхэм жыджэру къыщIадзащ. Мэхъэчкъалэдэсхэм я ебгъэрыкIуэныгъэхэр зэтраIыгъэу «Спартак-Налшыкым» и лъэныкъуэмкIэ зыщигъэбыдат. Антиповым и гъуэм и бгъэдыхьэпIэхэр зыхъумэ ди щIалэхэм «Динамо»-р гъунэгъуу кърагъэкIуалIэртэкъым, икIи и къежьапIэм щагъэужьыхырт. ХьэщIэхэми Iэмал ягъуэтыртэкъым контратакэ къызэрагъэпэщу джэгур я хьэрхуэрэгъухэм я лъэныкъуэмкIэ ягъэIэпхъуэну.
- ЛъэныкъуитIми топ зэрыдагъэкIын IэмалыфIхэр къызэрамыгъэпэщыфауэ зэIущIэм и япэ Iыхьэм и ныкъуэр и кIэм нэблэгъащ. Командэхэр загъэпсэхуну икIыну дакъикъитI нэхъыбэ къэмынэжауэ щытыкIэм зихъуэжащ. Ди щIалэхэм яIэщIэкIарэ «Спартак-Налшыкым» и штрафнойм ихьауэ гъуэм хуэкIуэ мэхъэчкъалэдэсхэм я гъуащхьауэ хабзэр къызэпауду фIэкIа Ольмезовымрэ Шумахуэмрэ къахуэгъэувыIакъым — пенальти. Ар Iэзэу зыгъэзэщIа Гаджиевым зы Iэмали къыхуигъэнакъым Антиповым топым къригъэгъэзэну. «Динамо»-м и гъуащхьэхъумэныкъуэ Гаджиевым топыр ди гъуащхьэтетым пэжыжьэ ищхьэ плIанэпэм дигъэкIащ — 1:0.
- ЗэIущIэр щызэпагъэум ипэ къихуэу топ къызыхудагъэкIа налшыкдэсхэм зэрызагъэпсэхуа дакъикъэ пщыкIутхум нэужькIэ я джэгукIэм теплъэщIэ иIэу етIуанэ Iыхьэм къыщIадзащ. Япэ Iыхьэр щымыIа хуэдэу «Спартак-Налшыкым» жыджэрагъышхуэ хэлъу ебгъэрыкIуэныгъэ шынагъуэхэр къызэригъэпэщын щIидзащ икIи ипэкIэ кIуэтащ.
- Тепщэныгъэр зыубыда хьэщIэхэм я гъуащхьауэ нэхъыфI Хьэшырыр 53-нэ дакъикъэм топыр иIыгъыу хэгъэрейхэм я гъуащхьэтет Хамхоевым и штрафнойм щихьэм абы къыпэува Алибековыр лъакъуэкIэ и щхьэм къеуащ. Хабзэ къызэпаудар наIуэ зыщыхъуа зэIущIэм и судья нэхъыщхьэ Карповым метр пщыкIузымкIэ игъэлъэгъуащ, щыуагъэ зыIэщIэщIами дагъуэ хуищIащ.
- Пенальтир игъэзэщIащ Бэчбом. Мурат зэуа топыр «Динамо»-м и гъуащхьэтетым техуэри къигъэлъеижащ. Абы кIэлъеуэжыну хэта ди щIалэхэм я мурадым зыри къикIакъым.
- КъахукъуэкIа IэмалыфIыр къахуэмыгъэсэбэпами «Спартак-Налшыкым» къикIуэтын мурад иIэтэкъым. Ди ебгъэрыкIуэныгъэм кърикIуа угловоймкIэ топыр къызыIэрыхьа Шумахуэм бжыгъэр зэхуэдэ ищIыжыным зымащIэщ иIэжар. Ар щхьэкIэ зэуа топыр сантиметр бжыгъэкIэ хэгъэрейхэм я гъуэм щхьэпрылъэтащ. Куэд дэмыкIыу апхуэдэ дыдэ Iэмал къыхукъуэкIат ЛIупым. Ауэ Ислъам и топри зымащIэкIэ гъуэм техуакъым.
- КIэух дакъикъэхэр къызытехьэлъэ хъуа «Динамо»-м текIуэныгъэ къыхуэзыхь бжыгъэр ихъумэн мурадкIэ гупышхуэу и лъэныкъуэмкIэ къикIуэтыжат. ЗэIущIэм и зэман нэхъыщхьэм къыщIагъуа дакъикъэхэм «Спартак-Налшыкыр» зэрыкомандэу, уеблэмэ Антиповыр яхэту, ипэкIэ кIуэтащ, арщхьэкIэ кIэух бжыгъэм зрамыгъэхъуэжыфу зэпэщIэтыныгъэр иухащ.
- Апхуэдэ щIыкIэкIэ Мэ- хъэчкъалэ и «Динамо»-р зэкIэ IэщIэкIащ иджыри къэс къеныкъуэкъуа СКА-м: ростовдэсхэр а махуэ ды- дэм пэлъэщакъым Прогрессым икIа «Биолог-Новокубанск»-м.
- ЩэщIрэ езанэ джэгугъуэм и адрей зэIущIэхэм мыпхуэдэ бжыгъэхэр къарикIуащ: «ТIуапсы» (ТIуапсы) — «Легион-Динамо» (Мэхъэчкъалэ) — 0:5, «Алания-2» (Владикавказ) — «Дружба» (Майкъуапэ) — 1:2, «Ротор-2» (Волгоград) — «Мэшыкъуэ-КМВ» (Псыхуабэ) — 2:2, «Форте» (Таганрог) — «Чайка» (Песчанокопскэ) — 2:3, СКА (Дон Iус Ростов) — «Биолог-Новокубанск» (Прогресс) — 2:2, «Кубань-Холдинг» (Новокубанск) — «Анжи» (Мэхъэчкъалэ) — 1:0, «Динамо» (Ставрополь) — «ЕсэнтIыгу» (ЕсэнтIыгу) — 3:1.
- КъыкIэлъыкIуэ джэгугъуэр «Спартак-Налшыкым» Волгоград къалэм щригъэкIуэкIынущ. Накъыгъэм и 22-м ар IущIэнущ «Ротор-2»-м.
- Жыласэ Замир.