Темыркъан Юрэ и къалэныщIэ
2022-02-25
- Оркестр саугъэт ин Санкт-Петербург щагъэуващ. Абы и унафэщI къалэныр игъэзэщIэну дирижёр цIэрыIуэ Темыркъан Юрэ арэзы зэрыхъуам саугъэтым и мыхьэнэр нэхъ ин зэрищIым шэч хэлъкъым.
- «440 герц» фIэщыгъэм къигъэлъагъуэр «ля» нотэм и зуукIэрщ, лэжьэн щыщIадзэкIэ музыкантхэм зызытраухуэрщ. Зэпеуэм хэт хъунущ ди къэралым и дэтхэнэ симфоние оркестрри. Саугъэтыр адрейхэм ещхькъым: зэпеуэм зыщыхэплъэнур студием щрагъэтха макъамэхэракъым, атIэ интернет Iэмалыр къагъэсэбэпу онлайну къатхэращ.
- Иджыри къыздэсым симфоние музыкэм ехьэлIа саугъэтхэр икъукIэ мащIэт, сыту жыпIэмэ концертхэм я къэпщытэныгъэр къызэбгъэпэщыну гугъущ. «Филармоние программэхэм, спектаклхэм къащхьэщыкIыу, къытрагъэзэжыркъым, — жеIэ саугъэтым и художественнэ унафэщI Маркарян Надеждэ. — Спектаклым мызэ-мытIэу уеплъыж хъунущ. Макъамэ программэр зэ щыIакъэ — ар тхыдэм игъащIэкIэ хыхьауэ аращ. Ар профессиональнэу къыупщытэн папщIэ, жюрир нэхъапэIуэкIэ зэхуэсу концертым кIуэн хуейщ. ЩыIэщ студием щрагъэтха макъамэхэм я нэхъыфIыр къыщыхах зэпеуэ куэд. Ауэ дэтхэнэми къыгурыIуэн хуейщ апхуэдэхэм и деж лэжьыгъэр зыбжанэрэ зэрырагъэтхыр, абыхэм я нэхъыфIыр къызэрыхахыжыр».
- Пандемием и зэманым онлайн Iэмалыр куэду къагъэсэбэп хъуащ. Оркестрым игъэзащIэ макъамэхэр къэпщытэнымкIэ ар уасэ зимыIэ хэкIыпIэу зэрыщытым къызэгъэпэщакIуэхэм гу лъатэри, Iуэхур кърахьэжьащ. «Программэр залым щыIуу, ар интернетымкIэ занщIэу къыщагъэлъагъуэм и деж, абы кIэлъыплъхэм я бжыгъэр куэд мэхъу. Концертым щIэдэIуу хъуам ар зэгъусэу зыхащIэ, я псэр егъэпIейтей. АдэкIи концертыр тхауэ къонэри, и фIагъыр лъэныкъуэ псомкIи къэпхутэну Iэмал уиIэщ», — жеIэ Маркарян Надеждэ.
- «440 герц» саугъэтыр академическэ, классикэ музыкэм пщIэ игъуэтыжынымкIэ, и увыпIэр иубыдыжынымкIэ сэбэп хъуну мэгугъэ абы и къызэгъэпэщакIуэхэр. Дуней псом къыщалъытэ симфоние щэнхабзэ лъагэм и къэралу щытащ ди щIыналъэр нэхъапэм, иужьрей зэманым музыкэ нэхъ мыхьэнэшэхэм ди цIыхухэр дахьэхами.
- Саугъэтым хущIэкъуну хуейхэм я лъэIухэр къыIахын щIадзакIэщ, ар мэлыжьыхьым и 15 хъуху екIуэкIынущ. Зэхьэзэхуэм и унэтIыныгъэ 15-м щытекIуахэм я цIэ Санкт-Петербург къыщраIуэнущ накъыгъэм и 31-м. Оркестрхэм я лэжьыгъэхэр къапщытэнущ ди къралым и филармоние лъэрызехьэхэм я унафэщIхэм, Москва, Петербург, Екатеринбург я макъамэ критикхэм.
- ИСТЭПАН Залинэ.