Бзэхэм зэпащIэ
2021-07-13
- Налшык дэт «Синдика» хьэщIэщым «Гъунэгъум и бзэмкIэ уэрэдхэмрэ усэхэмрэ» зэпеуэм щытекIуахэм я саугъэтхэмрэ щытхъу тхылъхэмрэ щратыжащ.
-
«Си жагъуэ зэрыхъущи, си щхьэкIэ ди зэIущIэм сынрихьэлIэфакъым, — закъыхуигъэзащ текIуахэм видео IэмалкIэ Къанокъуэ Арсен. — ИтIани, дызэрызэпэIэщIэм щхьэкIэ къэмынэу, фэ къывбгъэдэкI гухэхъуэгъуэр си дежи къос».
Фигу къэдгъэкIыжынщи, Урысейм и махуэм ирихьэлIэу сенаторым иригъэкIуэкIауэ щытащ уэрэд жыIэнымрэ усэ къеджэнымкIэ зэхьэзэхуэ. Абы къызэщIиубыдар КъБР-м и закъуэкъым, атIэ гъунэгъу республикэхэм ящыщ уэрэджыIакIуэхэри артистхэри, щэнхабзэм епха IэщIагъэ зимыIэ сабийхэри балигъхэри къыдигъэцIыхуащ. Зэпеуэм хэтахэм я фIыгъэкIэ осетинхэм — адыгэбзэкIэ, адыгэхэм — балъкъэрыбзэкIэ, шэшэныбзэкIэ, балъкъэрхэм — адыгэбзэкIэ ягъэзащIэ усэхэмрэ уэрэдхэмрэ дедэIуэну Iэмал дгъуэтащ. ЦIыхупсэм анэдэлъхубзэр зэрыпэгъунэгъурщ и лъабжьэр зэхьэзэхуэр щекIуэкIа махуэхэм къэунэхуа зэкъуэшыныгъэмрэ зэгурыIуэныгъэмрэ. - Чэрим Марианнэ.