Тхыдэр зи щыхьэт
2021-04-27
- Ныпыр дамыгъэ къудейуэ щымыту абы мыхьэнэшхуэ егъэзащIэ, лъэпкъым и напэу ялъытэ. А гупсысэм и щапхъэфIщ чэтэн щхъуантIафэр къыхэзыхыу шабзищрэ вагъуэ пщыкIутIрэ къытещу адыгэм зэхалъхьауэ къадэгъуэгурыкIуэ я бэракъыр. Шэч хэмылъу, ди лъэпкъ ныпым тхыдэ псо къытхуеIуатэ.
-
Лъэпкъ музейм къеблэгъа хьэщIэхэр.
- Лъэпкъ фIыгъуэу щыт адыгэ бэракъым и махуэм ирихьэлIэу, Къэбэрдей-Балъкъэрым и щIыналъэ псоми ар щагъэлъэпIащ, дауэдапщэ зэмылIэужьыгъуэхэр а Iуэхум траухуащ.
- Налшык къалэми мэлыжьыхьым и 25-м щекIуэкIа Iуэхугъуэхэм ящыщщ КъБР-м и Лъэпкъ музейм къыщызэIуаха гъэлъэгъуэныгъэр. IуэхущIапIэм и лэжьакIуэхэм егугъуу ягъэхьэзыра выставкэм къыхэщт адыгэм и Iэщэ-фащэу щыта-ри лъэпкъ ныпым и тхыдэри. Гъэлъэгъуэныгъэр къыщызэIуахым кърихьэлIат Дунейпсо Адыгэ Хасэм и тхьэмадэ Сэхъурокъуэ Хьэутий, абы и къуэдзэ Щоджэн Iэминат, Къэбэрдей Адыгэ Хасэм и тхьэмадэ, «Адыгэ псалъэ» газетым и редактор нэхъыщхьэ ХьэфIыцIэ Мухьэмэд, щIэныгъэм и лэжьакIуэхэр, еджапIэ нэхъыщхьэхэм щIэсхэр.
- Сэхъурокъуэ Хьэутий къызэхуэсахэм яжриIащ ныпым и мыхьэ-нэр, абы и махуэр гъэлъэпIэныр Дунейпсо Адыгэ Хасэм 2010 гъэм къыхилъхьауэ зэрыщытар икIи алъандэрэ гъэ къэс адыгэхэр здэщыIэ щIыпIэ псоми а Iуэхум гуфIэгъуэ зэхыхьэхэр зэрыщращIэкIыр. ХьэфIыцIэ Мухьэмэд къызэхуэсахэм яхуиIуэтащ адыгэм и ныпым и тхыдэр.
- КъыкIэлъыкIуэу а махуэм ахэр щыIащ Налшык къалэм дэт Киноконцерт гъэлъэгъуапIэм щекIуэкIа пшыхь дахэми. Япэ къатым цIыхубэ IэпщIэлъапщIэхэм я IэдакъэщIэкIхэм я выставкэ къыщызэIуахати, цIыхухэм Iэмал яIащ лъэпкъ хъугъуэфIыгъуэхэр нэхъ гъунэгъуу зрагъэцIыхуну.
- Концертым зыкъыщагъэлъэгъуащ республикэм и артист пажэхэми художественнэ самодеятельностхэм хэтхэми. Пшыхьыр щIэщыгъуэ ящIащ КъБР-м, КъШР-м, АР-м, ИР-м щIыхь зиIэ я артисткэ Къэзан Сэтэней, уэрэдус щIалэ Мэремыкъуэ Резуан, «Шагъдий» сабий къэфакIуэ ансамблым, нэгъуэщIхэми.
- БАГЪЭТЫР Луизэ.
- Сурэтхэр Къарей Элинэ трихащ.