И цIэр зымыгъэкIуэдын Iэужь
2021-01-19
- КъБР-м и цIыхубэ тхакIуэ Гуртуев Берт къызэралъхурэ илъэси 110-рэ зэрырикъур иджыблагъэ Налшык щагъэлъэпIащ.
- КъБР-м щэнхабзэмкIэ и министр Къумахуэ Мухьэдин Гуртуевым и Iэужьымрэ лъэужь дахэмрэ ягу къигъэкIыжащ къызэхуэсахэм. И усыгъэхэм я гугъу щищIым, абы и уэрэдхэм щхьэхуэу тепсэлъыхьащ. И Iуэтэжхэм ятеухуауэ Къумахуэм жиIащ повестхэмрэ новеллэхэмрэ щызэхуэхьэсауэ абы къыдигъэкIа «Адылгирей» тхылъымрэ «Новый талисман» романымрэ япэ сатырхэм къыщыщIэдзауэ щIэджыкIакIуэр зэрыдихьэхыр, дэтхэнэми пэгъунэгъу гуэр къызэрыщигъуэтыр.
- Гулъытэншэ ящIакъым Гуртуевым балъкъэрыбзэкIэ зэридзэкIа тхыгъэхэ-ри. Пушкин Александр, Шиллер Фрид-рих, Лермонтов Михаил, Райнис Ян, Стальский Сулейман, Маяковский Вла-димир сымэ Iэзэу балъкъэрыбзэкIэ «къигъэпсэлъащ» абы.
- — Сыт зэмани усакIуэхэр Тхьэм и лIы-кIуэу къалъытэу щытащ. Нобэ зи щIы-хьыр дгъэлъапIэ Гуртуев Берт езыр къытхэмытыжми, и цIэр зымыгъэкIуэ-дын Iэужь дахэ къигъэнащ. Ар илъэс 70-м щIигъукIэ и лъэпкъым, литерату-рэм хуэлэжьащ, икIи къэрэшей-балъкъэр литературэм къызэрымыкIуэу хэлъхьэныгъэшхуэ хуищIащ, — жиIащ Къэрэшей-Шэрджэсым и Журналистхэм я зэгухьэныгъэм и тхьэмадэ, «Черкес хэку» газетым и редактор нэхъыщхьэ Тхьэгъэпсэу Увжыкъуэ.
- Философие щIэныгъэхэм я кандидат, усакIуэ Узденовэ Иринэ тхакIуэм и творчествэр зэпкърихри, и усэхэм щыщи къызэхуэсахэм къахуеджащ.
- Кулиев Къайсын и цIэр зезыхьэ Балъкъэр къэрал драмэ театрым и артист- хэр Гуртуевым и усэхэм къеджащ, республикэм и уэрэджыIакIуэхэм абы и уэрэдхэм ящыщ зыбжанэ ягъэзэщIащ.
- Инэрокъуэ Данэ.