Куэд дэмыкIыу псоми къытхуеблэгъэнущ «Аиссе» фильмыр
2020-09-22
- АР-м, КъБР-м, КъШР-м я цIыхубэ тхакIуэ МэшбащIэ Исхьэкъ и Iэдакъэ къыщIэкIа «Аиссе» тхыдэ романымкIэ траха художественнэ фильмыр хьэзыр хъуащ. Ар мазэрэ ныкъуэрэ дэкIмэ, утыку кърахьэнущ.
- Фильмыр Адыгэ Республикэм и бгылъэ щIыпIэ дахэхэм, Санкт-Петербург къалэм щытрахащ, апхуэдэуи пычыгъуэ зыбжанэм Тыркумрэ Франджымрэ щелэжьащ.
- Режиссёр нэхъыщхьэр Урысей Федерацэм гъуазджэхэмкIэ щIыхь зиIэ и лэжьакIуэ , кинорежиссёр цIэрыIуэ Муратов Александрщ, сценарийр зытхар Сафинэ Маринэщ.
- Роль нэхъыщхьэр Нарткъалэ къыщалъхуа, Москва дэт «Гоголь-центр» театрым и актрисэ Мамрэш Светланэ игъэзэщIащ. Абы нэмыщI фильмым щыджэгуащ актёрхэу Дряблов Евгений, Ермин Владимир, Добровольская Евгение, Лазарев Александр, Беляев Юрий, Ткаченкэ Артём сымэ, нэгъуэщIхэри.
- Аиссе и сабиигъуэ ролыр зыгъэзэщIар Адыгэ Республикэм щыщ пщащэ цIыкIу ЕхъулIэ Даянэщ. Абы и адэшхуэ-анэшхуэу джэгуащ Урысей Федерацэм щIыхь зиIэ и артист Зыхьэ Заурбий Адыгэ Республикэм и цIыхубэ артисткэ Уджыхъу Мариетрэ. КъищынэмыщIауэ, фильмым хэтащ Адыгейм и лъэпкъ театрым и актёрхэмрэ «Налмэс» къэрал ансамблым и къэфакIуэхэмрэ.
- Фильмым продюсер нэхъыщхьэ хуэхъуащ Адыгейм и етIуанэ президенту щыта Щэумэн Хьэзрэт, абы доллар мелуан хухихащ «Аиссер» техыным.
- МэшбащIэ Исхьэкъ къызэрыджиIамкIэ, и IэдакъэщIэкI романыр япэу экранымкIэ щалъагъунущ Адыгейм, Краснодар, Ставрополь крайхэм, Къэбэрдей-Балъкъэрымрэ Къэрэшей-Шэрджэсымрэ. Премьерэ нэужьым, фильмыр Урысейм и кинотеатр псоми яIэрыхьэнущ, уеблэмэ къыщIэупщIа телеканалхэри щыIэщ.
- НэщIэпыджэ Замирэ.